Knŏng hŏng kdrăp krah mâo sa boh mnhat ƀŏng, sa kdrêč kyâo khăng dlông sa pah kngan pioh krah, leh sa gưl ksiêm dlăng phŭn kphê, pô thâo mbruă Y Ser Ƀuôn Krông, ti ƀuôn Tơ̆ng Jŭ, să Ea Kao, ƀuôn prŏng Ƀuôn Ama Thuôt mâo leh klei mĭn krah ya rup. Amâo guôn čih kač êlâo ôh, hŏng klei thâo sui thŭn ñu pral krah rup hŏng phŭn kphê. Rup anăn ƀrư̆ jing leh ñu krah. Krah êjai, ayŏng Y Ser Ƀuôn Krông yăl dliê êjai:

“Anei jing rup mniê nao djăt êa ti pin êa. Anei jing rup krah hŏng kyâo mơ̆ng mnuih Lăn Dap Kngư, pô čiăng lŏ mña wĭt klei hdĭp mơ̆ng mnuih ƀuôn sang hlăk đưm.  Pô dlăng phŭn kyâo leh anăn bi mĭn kơ ya rup pô srăng krah. Si phŭn snăn pô bi mĭn kơ rup êkei djă kgă amâodah mniê dôk mnei, mniê gui bŭng nao hma, hlue si phŭn kyâo pô mâo”.

 Hlăm klei bi lông krah rup hŏng ana kphê dưi mkŏ mjing hlăm knăm mơak kphê ti ƀuôn prŏng Ƀuôn Ama Thuôt tal 8 mrâo êgao, mâo 53 cô thâo mbruă hriê mơ̆ng dŭm kdriêk, wăl krah, ƀuôn prŏng ti čar Dak Lak leh anăn dŭm čar krĭng Lăn Dap Kngư. Hŏng akŏ “Dhar kreh, kdŏ mmuiñ, dliê kmrơ̆ng, anak mnuih Lăn Dap Kngư” lu phung thâo mbruă ba yua klei thâo krah rup hŏng kyâo djuê ana čiăng mjing rup krah. Dŭm rup mưng mâo msĕ si: klei mkŏ mjing knăm mơak, mnăm piê čeh, tông čing, tăp mdiê, ƀă anak, nao dlăng hma mâo phung thâo mbruă krah rup.

        Pô thâo mbruă Y Dhok Adrơng, ti să Čư̆ Suê, kdriêk Čư̆ Mgar, čar Dak Lak brei thâo: klei mdê êdi kyâo Lăn Dap Kngư leh anăn mnuih Êđê jing khăng yua kyâo khăng, rơ̆ng msĕ si ana juăr, Kčĭk … pioh krah. Hŏng kphê snăn brei ruah phŭn kphê khua, ƀhu krô kơh dưi krah.

Ana anei kâo krah rup amĭ ƀă anak. Kyua hlăk đưm tơdah hlăk điêtt grăp blư̆ nao hma snăn amĭ khăng ƀă pô ti rŏng. Hŏng rup krah snăn ana kyâo prŏng srăng ênưih mkra leh anăn mjing rup hĭn. Bi hŏng kphê snăn dleh hĭn, pô ngă čiăng dưi pioh rup kyâo, krah dleh mơh, bi mguôp hŏng masin kơh dưi ngă.

 Knŏng hlăm 3 hruê, phung thâo mbruă bi leh 48 rup krah hŏng kyâo hŏng lu rup krah jiă kma klei hdĭp mda mnơ̆ng dhơ̆ng leh anăn ai tiê mnuih Lăn Dap Kngư. Dŭm rup krah bi leh dưi mâo êpul bruă mdah hlăm wăl hiu čhưn ênguê Kŏ Tam hưn mthâo hŏng mnuih ƀuôn sang leh anăn tuê hiu čhưn.

Dưi nao dlăng, ktuê dlăng hdră pô thâo mbruă mjing rup jăk siam mơ̆ng phŭn kphê hlăm dŭm hruê mkŏ mjing knăm mơak, ayŏng Nghiêm Bá Nam, tuê hiu čhưn mơ̆ng ƀuôn prŏng Hà Nội brei thâo, anei jing gưl tal êlâo ñu ƀuh phung thâo mbruă mjing rup hŏng ana kphê. Ñu bi kngăr kyua mơ̆ng kyâo msĕ si lăm lui, bi mklă hlâo kngan phung thâo mbruă hŏng kdrăp ênưih mâo ƀiădah mâo rup krah jăk siam.

“Mơ̆ng dŭm mta ana kphê lăm lui leh snăn phung thâo mbruă dôk mkra mjing rup krah thâo mbruă pioh dlăng, jing siam snăk. Phung thâo mbruă srăng dưi mâo rup krah yuôm bhăn, pô srăng dưi ba yua jih mnơ̆ng dhơ̆ng mơ̆ng ana kphê.”

 Hŏng dŭm djuê ana ti Lăn Dap Kngư, rup krah hŏng kyâo jing sa mta rup jăk siam mâo leh mơ̆ng sui. Mơ̆ng klŏ kyâo, hŏng kiê kngan thâo mbruă, phung krah rup ba sa rup krah mrâo, jăk siam snăk. Amâo djŏ knŏng krah hlăm kyâo prŏng ôh, ară anei, rup anăn dưi krah mơ̆ng phŭn kphê sui thŭn, ba klei jăk siam mdê hĭn kơ ana kphê.