Gŏ sang Liêng Hót Ka Hiên (djuê ana K’Ho Čil) ti alŭ Srê Đăng, ƀuôn hgŭm Tân Hội, čar Lâm Đồng mâo knhuah mưng mkra ƀêñ, hlăm anăn ƀêñ ktơr jing leh sa mta mnơ̆ng “mâo anăn knăl” hing êdi hlăm krĭng. Truh kơ Liêng Hót Ka Hiên khua thŭn, ñu lŏ mtô klei thâo mkra ƀêñ ktơr hŭl kơ phung amai adei, anak čô hlăm gŏ sang, kyua anăn dưi pia jing “ƀêñ ktơr hŭl djuê ana”.

Liêng Hót Zi Jăk iêu Liêng Hót K’Hiên hŏng amĭ da. Leh hriăm jih trung cấp Dược, amai yua klei thâo leh hriăm čiăng mkra “ƀêñ ktơr hŭl djuê ana” mơ̆ng gŏ sang hĭn mơh jăk hĭn. Amai Liêng Hót Zi Jăk, brei thâo:

 “Ƀêñ ktơr jăk, tui hluê hŏng klei jăk mơ̆ng mjeh ktơr. Ƀêñ jăk hĭn jing dưi mkra mơ̆ng ktơr pô čŏng pla. Lehanăn ktơr yua mkra ƀêñ amâo khua amâo dah mda đei ôh. Gơ̆ khua man dưn snăn kơh mkra ƀêñ amâo krô amâo dah mơêa đei”.

          Mnuih K’Ho ară anei kreh yua ktơr kô̆ čiăng mkra ƀêñ. Mjeh ktơr anei gơ̆ ê’un, jăk ƀơ̆ng, mâo hnơ̆ng boh lu lehanăn wưng hrui đăk ăt pral hĭn mơh mkă hŏng mjeh ktơr kñĭ. Hluê si klei thâo mơ̆ng mnuih ƀuôn sang, dŭm boh ktơr khua man dưn dưi hnêč nao đăk hlăm aguah ưm čiăng dưi mâo mta mmih jăk hĭn. Boh ktơr leh wĭt đăk hlŏng dưi mkra mtam čiăng dưi krơ̆ng kjăp mnâo mmih. Tôk ktơr ăt dưi ba yua čiăng đŭng ƀêñ. Amai Liêng Hót Zi Jăk brei thâo:

 “ Leh wĭt đăk ktơr, lôk jih tôk, leh kơnăn riêk jih ktơr dưm hlăm maĭ kwă, dưm ƀiă ƀêñ hra lehanăn êa ksâo. Tơdah dưm lu đei ƀêñ hra lehanăn êa ksâo srăng luič mnâo mmih jăk čŏng mâo mơ̆ng ktơr. Leh kơnăn srăng mă tôk ktơr đŭng ƀêñ lehanăn ba nao hŭl hlăm brô 2 mmông gơ̆ ksă yơh”.

Ƀêñ ktơr ênưih ngă, păt čiăng jih krĭng ƀuôn sang, phung mniêK’ho thâo mkra ƀêñ ktơr hŭl. Mâo lu mnuih kyua amâo wăn, čiăng ƀơ̆ng ƀêñ ktơr anei grăp hruê hŏng hnơ̆ng man dưn snăn diñu kreh nao blei. Mơ̆ng anăn, ƀêñ ktơr hŭl lŏ jing sa mta mnơ̆ng ba čhĭ, amâo djŏ knŏng mkăp kơ alŭ wăl ƀiădah lŏ ba čhĭ hlăm hla pŏk ala ƀuôn. Amai Liêng Hót Rebeca anak khua Liêng Hót K’Hiên, êngao mmông mtô ti sang hră, amai ăt mkra “ƀêñ ktơr djuê ana” hlăm gŏ sang.

 “Kâo jing sa čô nai mtô, ƀiă mmông wăn, ƀiădah kâo ăt hnêč mkra ƀêñ. Êlâo hĭn jing mkăp kơ gŏ sang, leh kơnăn ba čhĭ kơ mnuih ƀuôn sang hlăm krĭng mâo leh hnư hrui wĭt mơh. Yuôm bhăn jing anak čô pô thâo kriê pioh kjăp lehanăn lŏ čuê knhuah gru mơ̆ng gŏ sang, mơ̆ng djuê ana”.

Amai Lơ Mu Liviơ sa čô tuê juăt mưng blei ƀêñ ktơr hŭl mơ̆ng gŏ sang Liêng Hót K’Hiên brei thâo snei:

 “Ƀêñ ktơr jing sa mta mnơ̆ng ƀơ̆ng jăk mơ̆ng djuê ana, grăp čô thâo mkra sơaĭ. Ƀiădah mkra ƀêñ lehanăn ba čhĭ ti ƀuôn anei knŏng gŏ sang Rebeca đuič ngă. Gŏ sang amai mkra jăk, doh, kâo mơak êdi kyua hlăm krĭng ƀuôn sang ăt dôk gŏ sang lŏ čuê lehanăn kriê pioh bruă mkra ƀêñ djuê ana pô čiăng kơ bruă anei amâo luič ram, ƀiădah lŏ mđĭ hnư hrui wĭt gŏ sang. Jăk êdi kâo dlăng kơ amai adei mnuih K’ho pral kdal, mĭn mrâo lehanăn thâo mđĭ lar, kriê pioh bruă djuê ana đưm, hlăm anăn mâo bruă mkra ƀêñ anei”.

          Ƀêñ ktơr hul mơ̆ng gŏ sang Liêng Hót K’Hiên mkra dưi ba čhĭ kơ lu anôk hlăm čar Lâm Đồng. Êngao anăn, ƀêñ ktơr anei dưi ba čhĭ kơ mnuih blei êngao čar. Grăp blư̆ gŏ sang ñu mkra 200 klŏ ƀêñ, grăp klŏ 20 êbâo prăk… Anei jing hnư hrui wĭt amâo lu ôh ƀiădah ăt đru kơ gŏ sang lŏ mâo thiăm hnư hrui wĭt. Boh nik ñu ƀuh ktưn hưn kyua thâo kriê pioh lehanăn mđĭ lar bruă mkra ƀêñ jing “bruă djuê ana”mơ̆ng gŏ sang./.