Hlăm anăn čar Gia Lai adôk djă pioh truh 4.500 rĭng čing, lu hĭng êdi hlăm 5 čar toi lăn dap kngư. Anôk bruă dhar kreh čar Gia Lai lač, kriê pioh lehanăn mđĭ bi lar dhar kreh čing čhar nanao ăn jing bruă ngă amâo mâo dưi lui ôh mơ̆ng mnuih ƀuôn sang djuê ana Bahnar, Jrai, mjing klei tŭ dưn kơ dhar kreh čing čhar đĭ kyar, pioh kơ bruă mđĭ kyar bruă duh mkra ala ƀuôn, boh nik mtrŭt mđĭ bruă hiu čhưn ênguê hlăm čar. Thŭn 2022, bruă bi kriê pioh lehanăn mđĭ bi lar dhar kreh čing čhar Lăn Dap Kngư čar Gia Lai wưng thŭn 2021-2025 mâo knơ̆ng bruă dhar kreh mjuăt asei mlei lehanăn hiu čhưn ênguê mdah leh hŏng knơ̆ng bruă sang čư̆ êa čar ksiêm dlăng bi mklă. Mơ̆ng anăn mâo lu mtya bruă srăng dưi ngă hŏng klei klă mngač, mâo hdră mă bruă jăk.  Kpă Choé, ti Plei Pel A, să Ia Sol, kdriêk Phú Thiện, sa čô mnuih thâo khăp čiăng lehanăn mâo nanao klei myưng m’ang kơ dhar kreh čing čhar djuê ana pô, mâo klei hmăng hmưi snei:  “Čing čhar mâo leh mơ̆ng đưm đă lă êlâo leh, jing ngăn dưn mơ̆ng aê aduôm pô. Ñu siă suôr hŏng klei hdĭp dhar kreh mnuih djuê ana Jrai, jing leh mnơ̆ng ƀơ̆ng kơ ai tiê amâo mâo dưi kƀah ôh hŏng hmei lehanăn hmei mpŭ kơ mnơ̆ng anei. Ênai čing čhar kwang nanao hlăm klei mnăm huă, ngă yang adiê klei djiê brŭ... Jing leh klei m’yưng m’ang êdi mơ̆ng mnuih djuê ana Jrai. Čang hmăng kơ anak čô gưl êdei thao bi kriê pioh, đăm lui luič ram ôh”./.

Hŏng klei mĭn kriê pioh kjăp knhuah dhar kreh djuê ana K’ho, K’Đức Tuấn ti să Tà Nùng, nah êngao ƀuôn prŏng Đà Lạt, čar Lâm Đồng lui mkrah ha kphê čiăng mkra sa anôk hiu čhưn – dhar kreh jăk siam. Anei jing anôk jưh jơ̆ng jăk êdi kơ phung tuê hiu čhưn mơ̆ng Êlan dơ̆ng prŏng 27 truh kơ Đà Lạt, găn êlan dơ̆ng čar 725 mơ̆ng čar Lâm Đồng. Mơ̆ng êlan, phung tuê dưi ƀuh ƀuôn sang mnuih K’ho mbĭt hŏng đang kphê mtah mda. Kbưi kbưi jing đanfg kngô mtah mdambĭt hŏng êa krông Camly jăk siam. K’Đức Tuấn – pô hiu čhưn anei brei thâo, boh tŭ yuôm tinei jing dŭm kdrăp mơ̆ng đưm hđăp, kdrăp tông ayŭ mơ̆ng đưm mnuih djuê ana K’ho. Phung tuê hiu čhưn tinei dưi lŏ dôk hlăn sang dlông, ƀơ̆ng dŭm mta mnơ̆ng jiă knhuah djuê ana lehanăn nao ti mlam tông čing čhar. Tal êlâo kâo hŏng mô̆ bi trông hlăm brô 1 mlan, srăng mkŏ mjing anôk kriê pioh čing čeh, mnơ̆ng đưm mơ̆ng djuê ana K’ho. Kyua ară anei, dŭm mta mnơ̆ng đưm mơ̆ng mnuih K’ho ƀrư̆ luič ram, amâo dưi kriê pioh lu ôh. Leh mâo klei mĭn kâo hưn yơh hŏng găp ti kdriêk Dam Rông, brei diñu duah, tui ksiêm dŭm mta mnơ̆ng đưm mơ̆ng djuê ana pô. Kâo jao prăk êlâo, leh mâo mnơ̆ng kâo srăng nao mdiăng ba wĭt. Bi sang dlông kâo mâo găp ti Dak Lak, brei duah brei. Ênoh sang mơ̆ng 300- 400 êklăk prăk”.

K Čil Ha Ổn (kkiêng thŭn 1934) ti alŭ mrô 3, să Dà Sar, kdriêk Lạc Dương čar Lâm Đồng brei thâo, Aê aduôn K’Ho Cil mơ̆ng đưn hdĭp mda ti gŭ jơ̆ng čư̆ Bidoup - Aduôn Čư̆ Jŭ (dôk hlăm kdriêk Lạc Dương lehanăn Đam Rông ară anei). Grăp blư̆ mâo găp djuê amâodah ƀuôn sang mkŏ mjing klei ngă yang huă mnăm djŏ boh mnga, snăn bi yua ênhiang čing yơh kñăm mđĭ hĭn klei yuôm bhăn mơ̆ng klei ngă yang adiê. Čiăng kơ ênai čing dưi kriê pioh nanao hlăm klei hdĭp phung ƀuôn sang K’Ho, asei Čil Ha Ổn tuôm mtô bi hriăm leh lu gưl hđeh thâo raih lu ênhiang čing. Hlăm anăn mâo klei tông čing drông tue jing klei tông amâo mâo dưi kƀah ôh hlăm knăm ngă yang mdiê: “Kyuadah hmei jing gưl nao êlâo, snăn lŏ mtô bi hriăm kơ hdră tông čing kơ phung čô anak pô. Lehanăn klei tông čing yuôm bhăn êdi jing klei ngă yang mdiê, ktơr mơ̆ng hma leh wĭt kơ sang, leh klei anăn kơh mkŏ mjing klei huă mnăm, lehanăn ƀri wưng anei mơh tông ênhiang čing iêo aê aduôn atâo atiêt lehanăn drông tue, hŏng ênai siam mơak, anăn yơh jing ênhiang čing tal êlâo pioh tông”./.