H’Rưm H’Mŏk, ti ƀuôn Hra Ea H’Ning, să Drai Bhăng, kdriêk Čư̆ Kuiñ, čar Dak Lak yăl dliê: Thŭn 2020, êjai êbeh leh 60 thŭn, asei mlei awăt amâo lŏ dưi mă bruă ktrŏ. Čiăng mâo prăk yua grăp hruê leh anăn rông sa čô anak êwiên, ñu lŏ mĭn kơ bruă pơ̆k mñam. Hlăk dôk điêt ñu mâo amĭ mtô kơ bruă pơ̆k mñam. Đĭ hriê kơ prŏng, ñu thâo raih amâo mâo pô hmao ôh. Lŏ wĭt hŏng bruă pơ̆k mñam, hruê mlan găn hgao ñu ăt guiñ guiñ hŏng anôk pơ̆k mñam. Hrô kơnăn, dŭm blah mnơ̆ng pơ̆k mñam mơ̆ng ñu amâo mâo djăp klei čiăng phung blei yua. Kyua ñu thâo ngă Kteh, jing thâo đêč boh mnga siam hĭn hlăm kdrăp čŭt hơô mnuih Êđê, ƀiă sơnăk mnuih dôk thâo ngă.

“Mâo bruă pơ̆k mñam anei brei kơ kâo mâo prăk yua aguah tlam. Kâo mduôn leh, amâo lŏ dưi nao hma, kyuanăn kâo pơ̆k mñam. Kyua mâo pơ̆k mñam anei amai adei mâo bruă mă, mâo prăk ba wĭt. Kâo hơ̆k mơak kyua thŭn leh khua ƀiă adôk mâo bruă mă. Sa mlan kâo mâo mơ̆ng 3 – 4 êklăk prăk, kyuanăn kâo hmâo klei hdĭp jăk hĭn”.

Amai H’Neo, sa čô hlăm êpul hgŭm bruă pơ̆k mñam ƀuôn Hra Ea H’Ning brei thâo: amai nao hgŭm hlăm êpul anei giăm leh 3 thŭn. Hlăm wưng mrâo nao, phung amai amâo mâo anôk giêng mrai, kyuanăn dôk ti gŭ sang krum hlăm ƀuôn ngă anôk giêng mrai.

“Mơ̆ng mâo êpul pơ̆k mñam truh kơ ară anei klei hdĭp kâo mâo klei hơĭt hĭn. Sa mlan dưi mñam 4 blah, hrui wĭt mâo 4 êklăk prăk. Hlăm êpul pơ̆k mñam djăp pô dleh dlam sơăi. Hlăm 6 čô amai adei pơ̆k mñam diñu dleh dlan sơăi”.

Mnơ̆ng pơ̆k mñăm mơ̆ng êpul hgŭm bruă ti ƀuôn Hra Ea H’ning mâo phung blei yua khăp čiăng êdi. Thŭn 2022, êpul hgŭm bruă mâo êpul Từ tâm Đắk Lắk iêo mkrum mđup brei sa boh sang krum mâo ênoh 300 êklăk prăk. Sang krum dưi mdơ̆ng kjăp ti djiêo sang dhar kreh ƀuôn. Mơ̆ng anăn, grăp čô hlăm êpul mâo anôk mă bruă jăk găl.

Amai H’Tin H’Mŏk, knuă druh mniê ti ƀuôn Hra Ea H’Ning, jing sa čô êngao kơ êpul hgŭm bruă pơ̆k mñam ƀiădah kreh nao mđĭ ai, đru kơ phung pơ̆k mñam hlăm kle hưn mdah, ba čhĭ mnơ̆ng dhơ̆ng. Amai H’Tin H’Mŏk lač:

 “Phung Êđê hmei mpŭ kơ kdrăp čŭt hơô djuê ana. Phung mniê Êđê khăp čŭt hơô mnơ̆ng pơ̆k mñam, kyuanăn kdrăp čŭt hơô djuê ana dưi djă pioh. Kdrăp čŭt hơô djuê ana mâo mơ̆ng ênuk aduôn aê kyuanăn anak čô truh kơ ară anei ăt dôk djă pioh, ba yua”.

Y- Xuyên Ƀuôn yă, k’iăng khua bruă sang čư̆ êa să Drai Bhăng brei thâo: Ƀuôn Ea H’Ning mâo êbeh 400 gŏ êsei, lu jing mnuih Êđê. Klei hdĭp mnuih ƀuôn sang knang kơ bruă lŏ hma. Ară anei hlăm ƀuôn ăt adôk 100 gŏ êsei ƀun, êbeh 50 gŏ êsei giăm ƀun. Bruă sang čư̆ êa să dlăng yuôm bhăn bruă phung mniê hlăm ƀuôn lŏ wĭt ngă bruă pơ̆k mñam, dưi kriê pioh knhuah gru dhar kreh djuê ana, mâo prăk ba wĭt čiăng bi hơĭt klei hdĭp. Boh klei tinei jing phung mda asei amâo mâo lŏ khăp ôh kơ dŭm mta bruă đưm msĕ si hrĭ mñam, mkra mjing kdrăp pĕ tông djuê ana, pơ̆k mñam. Kyuadah čiăng thâo kơ bruă anei srăng mâo mmông hriăm sui. Ƀiădah prăk mâo ba wĭt amâo mâo lu mkă hŏng dŭm bruă mkăn. Y- Xuyên Ƀuôn yă lač: pô thâo mbruă srăng dưi hdĭp hŏng mnơ̆ng pô mkra mjing, êjai anăn kơh bruă anei dưi bi lar.

 “Ti ƀuôn Hra Êa H’Ning anei mâo êpul pơ̆k mñam mơ̆ng phung amai adei mniê. Kyuanăn phung amai adei mâo bruă mă hơĭt. Ƀiădah prăk mâo mơ̆ng bruă anei ka lu ôh, ak năng hŏng ai tiê digơ̆. Diñu pơ̆k mñam čiăng mâo bruă mă đuč, bi prăk kăk ƀiă kyuanăn amâodưi iêo jak phung mda asei, phung êdam êra.”