Êman jing mnơ̆ng bi knăl yuôm bhăn kơ krĭng Lăn dap Kngư, dưi yap jing krĭng êman kơ lăn čar Việt Nam. Hlăm klei hdĭp mda anak Êđê, Mnông lač kơ êman ăt mâo klei mĭn msĕ si anak mnuih. Kyuanăn pô êman kreh mkŏ mjing nanao klei ngă yang kơ êman, bi êdah ai tiê klei khăp pô hŏng êman H’Hiên Êban jing pô êman ti buôn Ea Mar, să Krông Ana, kdriêk Buôn Đon, čar Dak Lak lač êman jing mnơ̆ng yuôm, yap msĕ si anak mnuih, sa hlăm găp djuê, hlăm ƀuôn sang. Êman lŏ jing klei bi knăl kơ klei dưi, kơ klei mdrŏng sah mơ̆ng sa găp djuê, kyua anăn ară anei găp djuê lehanăn asei H’Hiên Êban ăt myưng mơang, lehanăn bi êdah ai tiê thâo khăp jăk snăk hŏng êman pô msĕ si mnuih hlăm sang:

“Sa thŭn ngă yang kơ êman mâo dua blư̆. Tơdah thâo mâo hĭn grăp blư̆ nga yang čuh sa drei ŭn. Bi tơdah hơăi ăt ngă yang mơh knŏng hjăn hlăm gŏ sang. Mphŭn dôk adôk dliê kmrơ̆ng, êman nao đoh kyâo ba wĭt kơ ƀuôn, nao dŭ mdiê mơ̆ng hma ba wĭt kơ sang, ênuk bi blah êman nao dŭ mnơ̆ng ƀơ̆ng huă, boh phao ktuang, đru lĭng kahan mblah roh”.

Phung tue truh hŏng ƀuôn Đon, Daklak jing msĕ si truh hŏng anôk mâo klei yăl dliê đưm kơ êman. Jih jang mnơ̆ng yua, dôk kriê pioh, dŭm klei bhiăn hŏng êman dôk djă yua ba leh kơ tue hriê čhưn ƀuh lu mta klei ka tuôm ƀuh, hmư̆ lu mta klei ka tuôm hmư̆, yap êman jing mnơ̆ng yuôm bhăn êdi hŏng klei hiu čhưn ênguê ti Buôn Đon lehanăn Lăk. Mâo leh sa wưng sui, knơ̆ng bruă hiu čhưn ênguê ba yua êman hŏng klei amâo mâo djŏ, ngă hmăi amâo mâo jăk kơ klei suaih pral êman. Knơ̆ng bruă sang čư̆ êa čar Dak Lak mâo leh hră mơar mtă brei pral hlue ngă mtam bruă hiu čhưn ênguê jĕ giăm jăk hŏng êman lehanăn mkŏ mjing dŭm mta bruă mpŭ hŏng êman, Lê Minh Dũng, jing tue hriê mơ̆ng Bà Rịa - Vũng Tàu lač hŏng hdră hiu čhưn ênguê anei:

“Hriê truh hŏng Buôn Ma Thuôt, Dak Lak jing nao dlăng êman, ƀuh ti ală mta kơh dŭm drei êman, mgăt êman. Kâo tuôm đĭ leh ti dlông wông êman mdiăng hiu, ƀiădah gưl anei truh hŏng krĭng anei amâo lŏ mâo ôh bruă anăn, snăn amâo lŏ mâo ôh klei đĭ hiu, bi lông mtiŏ êman. Truh tinei kâo mơak snăk kyua mâo hdră mkŏ mjing jăk hĭn hlăm klei thâo mpŭ kơ êman, msĕ si bi hriăm êman thâo kkuh kơ tuê hriê čhưn, êman yua buffet lehanăn bi msiam kơ êman pioh mă rup. Anei jing gưl tal 4 leh kâo truh ti Buôn Đon.”

          Ară anei čar Dak Lak knŏng adôk mă 37 drei đuič êman, hlăm anăn 14 drei ti kdriêk Lăk, 22 drei ti Buôn Đon và 1 drei ti kdriêk Krông Ana. Jih jang klei truh kơ hrŏ êman kyua djiê mduôn. Ti anăp klei êman trŭn hrŏ anei jing sa mta klei dôk rŭng răng, knơ̆ng bruă sang čư̆ êa čar Daklak bi mklă leh hdră đru kơ bruă răng kriê êman, thâo mjĕ mgiăm jăk hŏng êman. Lehanăn đru dlăng kriê klei suaih pral êman; pô êman lehanăn mgăt êman ăt dưi hdĭp mơh hŏng bruă rông êman. Ară anei êpul hgŭm bruă răng mgang hlông mnơ̆ng Asi ƀuăn leh đru êbeh 2,2 êklăk USD pioh kơ bruă răng kriê, lehanăn lŏ bi lar êman mơ̆ng thŭn 2022 - 2026. Êpul bruă anei duh mĭn đru ba brei leh kơ 12 drei êman, hlăm anăn mâo 8 drei êman hlăk dôk mjuăt bi hriăm hŏng bruă mjĕ mjuk jăk hŏng êman ti kmrơ̆ng knŭk kna mkuôm Yok Đôn. Phung tue hiu čhưn amâo lŏ đĭ hiu êman ôh, hrô kơ anăn jing nao dlăng êman, lehanăn nao hiu hlăm dliê dlăng lăn mnga êa mơak. Hockley Ryan Jonathan, jing pô truăn kơ bruă răng kriê hlô mnơ̆ng dliê Asi brei thâo:

“Hmei jing phung bi ala kơ êpul hgŭm bruă răng mgang hlô mnơ̆ng dliê ti Asi, hlăk dôk ngă bruă anăn ti đang dliê knŭk kna mkuôm Yok don, čar Dak Lak. Hmei čang hmăng kơ mgi dih bruă msĕ snei dưi ngă truh kơ anôk mkăn msĕ si ti kdriêk Lăk jing knŏng hiu atăt êman nao hlăm kmrơ̆ng msĕ hŏng ti đang dliê knŭk kna mkuôm Yordon. Atăt wĭt êman hŏng dliê kmrơ̆ng. Sĭt yơh êjai ngă bruă anei ba êman wĭt hŏng dliê jing hĕ klei mnuih ƀuôn sang Việt Nam amâo lŏ ƀuh êman ôh. Drei čiăng kơ mnuih ƀuôn sang tinei dlăng kriê rông ba êman, mnuih Việt Nam srăng mâo dŭm tuor hiu čhưn ênguê yap jing nao čuă êman hlăm dliê. Hmei čiăng kơ mgi dih êman amâo srăng lŏ kbiă nao ôh hlăm dŭm hrue knăm mơak, ƀiădah knŏng dôk hlăm kmrơ̆ng knŭk kna mkuôm Yok don lehanăn Lăk.”

Mbĭt hŏng hdră êlan mơ̆ng bruă sang čư̆ êa, lehanăn dŭm dhar bruă djŏ tuôm hlăm bruă kiă kriê êman, phung pô êman ăt brei mâo klei mđing uêñ hĭn kơ klei suaih pral êman - yap jing mnuih msĕ si hlăm sa boh sang. Tue brei thâo khăp kơ êman msĕ snăn mơh, čiăng kơ êman dôk nanao mbĭt hŏng anak mnuih, jing sa mta mnơ̆ng bi knăl kơ klei ktang, klei hing ang hŏng krĭng lăn Dap Kngư anei./.