Bur msăm, msĕ si drei hmư̆ anăn pia ñu snăn, mâo klei msăm, ƀâo mngưi mnâo kpiê čeh. Mdê hŏng dŭm mta mnơ̆ng ƀơ̆ng mkăn msĕ si điŏ brông, mnŭ ăm... kreh yua ƀơ̆ng hlăm anôk huă mnăm lu mnuih hlăm ƀuôn sang, ƀiădah bur msăm jing mnơ̆ng kreh yua hlăm gŏ sang mnuih K’Ho.

Diñu riă bur msăm pioh ƀơ̆ng hlăm grăp hrue, djă ba kơ hma pioh huč čiăng hlao mhao hrô kơ êa mnăm. Tui si aduôn K’Bri dôk ti Kon Tách Đăng, wăl krah Đinh Văn, kdriêk Lâm Hà, čar Lâm Đồng, mnơ̆ng pioh riă bur bi msăm jing djăp mta braih. Aduôn K’Bri lač:

“Riă bur anei hŏng djăp mta braih jing dưi sơăi, tăp năng braih mdiê hma, braih êba, amâodah hŏng ktơr tŭ mơh. Bi hŏng braih huă aguah tlam ruah jăk hĭn braih khăng, braih mdiê hma kpuh. Jăk hĭn ăt jing brai mơ̆ng mdiê puôt”.

Čiăng mâo riă sa gŏ bur pioh bi msăm, snăn arăng knă êsei êlâo, lehanăn mă êsei lŏ riă bi jing bur. Knhuang tal êlâo nao plêč braih, đăm plêč doh đei ôh huĭdah luič hĕ jih klei kdlik mơ̆ng braih. Leh kơ anăn drŏng gŏ dlông kpur. Čiăng dưi mâo bur msăm, snăn gŏ riă bur bi blang man huič, amâo mâo jăk ôh êih đei, kyuadah leh đĭ jing kpei tơl msam leh mmông anăn bur lik leh anăn m’êa sơăi.

Leh riă amâo mâo guôm leh hnơ̆ng ƀăt ôh, knŏng tưl êăt leh, drei tuh hlăm boh giêt krô, leh kơ năn kăt hĕ krĭp. Yuôl ti mtih hlăm brô 1;2 hrue bur srăng msăm, mmông anăn jing bur msam leh. Aduôn K’Bri lač kơ klei riă bur msăm snei:

“Drei riă bur man bi braih blang jing dưi leh yơh, mmông anăn kơh bur srăng jăk, amâo mâo jăk ôh riă braih tơl ê ih. Kreh ƀuh jing 1;2 hrue snăn bur srăng msăm yơh. Čiăng dưi mâo bur msăm leh riă lui êăt lehanăn trô hlăm giêt boh giêt krô drei anăn leh kơ anăn yuôl hĕ dlông pra pui”.

Bi lač kơ mnơ̆ng ƀơ̆ng mkăn mbĭt anăn, snăn aduôn K’Bri lač, bur msăm drei dưi ƀơ̆ng hŏng djăp mta mnơ̆ng ƀơ̆ng mkăn. Tui si anôk drei bi huă ƀơ̆ng, amâodah tui si klei khăp mơ̆ng mdê bi mnuih. Ñu brei thâo:

Drei dưi ƀơ̆ng hŏng djăp mta mnơ̆ng drei čiăng ƀơ̆ng, msĕ si djam hla rơ̆k thâo dah čĭm mbĭt... ƀiădah jăk hĭn drei ƀơ̆ng hŏng kan krô, kan hŭl drei ăm hĕ lehanăn tlê hŏng amrêč mtah”.

Mnuih K’Ho ƀơ̆ng bur msăm jing sa mnơ̆ng ƀơ̆ng mâo mnơ̆ng tŭ jăk, amâo mâo dưi kƀah ôh. Mta bur anei mâo lu klei tŭ jăk, kreh pioh huič mnăm, djă hiu ba kơ hma, mă bruă suăi êmăn hlăm pưk hlăm hma. Mbĭt hŏng anăn, bur msăm lŏ dưi bi kdơ̆ng hŏng hdrak ngă, đru kơ asei mlei kjăp hĭn. Bur msăm jing mnơ̆ng ƀơ̆ng mưng juăt hŏng mnuih K’Ho. Anei jing knhuah dhar kreh mnơ̆ng ƀơ̆ng mâo leh mơ̆ng ênuk aê aduôn pô đưm. Hung tue truh kơ Lâm Đồng dưi lông ƀơ̆ng bur msăm čiăng kơ thâo si jing mnâo mnañ mơ̆ng mta bur msăm anei./.