Thŭn 2022, knơ̆ng bruă sang čư̆ êa čar Kon Tum mkŏ mjing leh klei mpŭ mni mơ̆ng knŭk kna “Mnuih mbruă kdlưn hĭn” hlăm klei kriê pioh knhuah gru dhar kreh amâo mâo êdah klă kơ 15 čô mnuih mbruă. Jing sa hlăm 15 čô mâo tŭ mă klei pah mni anei, êlâo kơ thŭn mrâo 2023, khua mduôn A Blung, 73 thŭn, ti Kon Pao Kla, să Đăk Pxi, kdriêk Đăk Hà lač:

“Kâo mâo klei myun êdi lehanăn lač jăk kơ klei khua lăn čar mđup brei anăn knăl Mnuih mbruă kdlưn hĭn anei. Mgi dih tơdah mâo klei suaih pral, thŭn 2023 kâo srăng mtô bi hriăm phung amuôn adei hlăm ƀuôn tông čing čhar, kdŏ suang. Brei drei thâo bi mpŭ, kriê pioh dhar kreh djuê ana pô, đăm lui luič ram ôh. Hlăm dŭm knăm mơak drei bi djă yua čing čhar, kdŏ suang snăn kơh dưi kriê pioh knhuah gru dhar kreh djuê ana, snăn kơh phung ƀuôn sang drei mơak mñai”.

Hlăm gưl mđup brei anăn knăl “Pô thâo mbruă êdah êdi” hlăm mnơ̆ng kriê pioh dhar kreh amâo êdah klă tal 3 thŭn 2022, čar Lâm Đồng mâo 6 čô thâo mbruă dưi mđup brei. Phung anei mâo lu klei đru mguôp hlăm bruă răng kriê, mđĭ lar ênoh dhar kreh djuê ana mơ̆ng mnuih djuê ana tinei K'Ho, Mạ, Chru. Pô thâo mbruă Điểu K'Bôi, să Đồng Nai Thượng, kdriêk Cát Tiên, sa hlăm 6 čô mnuih dưi mđup brei anăn knăl pô thâo mbruă êdah êdi tal anei brei thâo:

Kâo pô mrâo mâo Đảng, Knŭk kna mđup brei anăn knăl pô thâo mbruă êdah êdi anăn kâo ktưn hưn leh anăn bi mni kơ Đảng, Knŭk kna. Kâo ƀuăn srăng gĭr răng mgang, mđĭ lar ênoh yuôm dhar kreh djuê ana Mạ pô. Hlăm klei hdĭp grăp hruê, kâo mtă mtăn kơ mnuih ƀuôn sang gĭr ktưn mă bruă čiăng kơ klei hdĭp dưi trei mđao. Wăt tơdah klei hdĭp amâo mdei đĭ kyar ƀiădah dŭm klei dhar kreh djuê ana pô brei dưi kriê pioh leh anăn mtô bi hriăm kơ phung hđeh.”

Hlăm thŭn 2022, čar Gia Lai mâo klei dưi mkŏ mjing bi hdơr 90 thŭn hrue mkŏ mjing čar. Hlăm jih jang bruă kđi čar mâo dŭm êpul tông čing, êpul ngă bruă hrĭ mñam, mnơ̆k msa... pătdah mâo mkŏ mjing jêñ jêñ, hŏng dŭm klei mdah jăk êdi, jiă knhuah gru dhar kreh pioh kơ tue tơdah truh kơ Gialai mâo nao dlăng. Amai Gơnh, ti ƀuôn Ktu, să Kon Chiêng, kdriêk Mang Yang lač: 

“Thŭn 2022, čar mkŏ mjing knăm bi hdơr 90 thŭn hrue mkŏ mjing čar, snăn mâo lu bruă dhar kreh dưi mkŏ mjing, msĕ si tông čing čhar, kdŏ čhuang, lehanăn mdah dŭm mta bruă hrĭ mñam, pơ̆ok mñam... kâo khăp snăk kơ jih bruă anăn. Anei ăt jing wưng čiăng kơ phung ƀuôn sang mơ̆ng djăp anôk hriê bi tuôm, mjĕ mjut, bi hriăm êmuh kơ ya mta jing klei jăk klei siam hlăm klei hdĭp. Klei anei srăng đru kơ hđeh gưl mrâo thâo kriê pioh mpŭ yua, dhar kreh yuôm bhăn mơ̆ng aê aduôn pô kơ mgi dih”.

Amai Bloi, sa čô thâo pơ̆k mñam ti ƀuôn Chuet 2, ƀuôn hgŭm Thắng lợi, ƀuôn prŏng Pleiku, Gia Lai gĭr mđĭ lar bruă pơ̆k mñam mnuih Jrai. Amai Bloi ktưn hưn kyua pô jing sa hlăm phung mda asei dôk mđĭ lar bruă pơ̆k mñam djuê ana:

“Čiăng thâo pơ̆k mñam, brei tui hriăm mơ̆ng amĭ. Mđing dlăng aduôn hŏng amĭ mñam čiăng kriê pioh dhar kreh pơ̆k mñam djuê ana pô.  Čang hmăng kơ anak čô čĕ êdei anei, diñu amâo srăng lui, amâo wơr ôh leh anăn lŏ djă pioh dhar kreh djuê ana pô. Ƀiădah ksiêm dlăng kơ bruă duh mkra snăn prăk čhĭ amâo đei lu ôh, yuôm bhăn hĭn ai tiê mñam pioh dhar kreh pô đuč, čiăng mtô kơ anak čô êdei anei hmei thâo mñam, čang hmăng anak čô amâo luč ôh dhar kreh pô.”