Mlam mơak čing čhar Ngŏ Dhŭng Asi thŭn 2025 mâo 3 êpul ala tač êngao lehanăn 5 êpul phung mbruă hlăm ala čar, mâo: Lào, Campuchia, Malaysia; dŭm čar: Lâm Đồng, Dak Lak, Gia Lai, Quảng Ngãi lehanăn Phú Thọ. Blŭ hrăm ti knăm anei, Đinh Văn Tuấn, kơiăng khua knơ̆ng bruă sang čư̆ êa čar Lâm Đồng mñă klă boh tŭ yuôm êdah êdi, lar bra ai ktang lehanăn klei bi mguôp ai tiê anak mnuih hluê ênai čing čhar. Mlam mơak hlai mbĭt ênai dhuai čing čhar Ngŏ Dhŭng Asi thŭn 2025 amâo djŏ knŏng jing sa wăl anôk bi mni knhuah gru, ƀiădah lŏ jing anôk bi mklin klei mĭn mrâo, bi mguôp êpul êya, klei čang hmăng kpưn đĭ mơ̆ng dhar kreh Việt Nam hlăm ktuê êlan krĭng wăl lehanăn tar rŏng lăn”

Dăl hlăm hƀuê ênuk čing čhar amâo djŏ knŏng kdrăp tông, anei jing mngăt êwa, jing klei blŭ mơ̆ng mnuih Lăn dap kngư hŏng čư̆ dliê. Grăp ênai čing jing sa klei yăl dliê, grăp ênhiang tông jing mngăt êwa mơ̆ng dhar kreh, mkŏ ênuk đưm, ară anei lehanăn êdei anăp. Mlam mơak hlai mbĭt ênai dhuai čing čhar Ngŏ Dhŭng Asi thŭn 2025 jing wưng čiăng kơ ênai čing kpưn đĭ truh krĭng knông lăn mkŏ hŏng ƀĭng găp hlăm krĭng wăl mjing ênai kwang jăk êdi mơ̆ng dhar kreh lehanăn ai tiê bi hgŭm mguôp”.

Klei bhiăn khua mduôn ngă Yang ti mlam mơak anei ba mơĭt asăp akâo kơ ƀuôn sang trei mđao, yan ngă bruă jăk găl lehanăn knăm mơak dưi mkŏ mjing hŏng klei jăk, bŏ klei khăp. Ti wăl anôk anei mdah leh wăl anôk ƀuôn sang đưm hŏng Sang Roong, čeh kpiê, pur dôk trơ̆ng… dŭm êpul tông čing ba mdah leh ênai kwang mơ̆ng čing čhar ti krĭng čư̆ dliê, bi êdah klei hgŭm mguôp, klei mơak lehanăn klei bi mguôp êpul êya hơĭt kjăp.

Mlam mơak lŏ jing wưng čiăng kơ phung mbruă čar Lâm Đồng bi mjĕ mjuk, tui hriăm, kah mbha klei thâo kñăm hưn mthâo pŏk rup dhar kreh, anak mnuih Lâm Đồng hŏng dŭm djue ana, tuê hiu čhưn hlăm lehanăn êngao ala čar. Amai Ka Duýp, êpul phung mbruă djuê ana K’ho, să Đinh Trang Thượng, čar Lâm Đồng brei thâo:

Hmei hriê mơ̆ng êpul tông čing hŏng êbeh 40 čô hŏng sa ai tiê hơ̆k mơak, čiăng bi mjĕ mjuk, čiăng tui hriăm kơ dŭm êpul tông găp, čiăng thâo săng hĭn kơ dhar kreh jăk siam mơ̆ng dŭm djuê ana mkăn. Pô srăng ktưn hưn hĭn kơ dhar kreh čing čhar ti alŭ wăl pô. Mơ̆ng dŭm klei hriăm mâo êpul ƀĭng găp ba wĭt, jing klei mrâo êdi kơ êpul tông čing pô.

Mlam mơak hlai mbĭt ênai dhuai čing čhar Ngŏ Dhŭng Asi thŭn 2025, Êpul brei klei pah mni kdlưn hĭn mơ̆ng gưl dlông ala čar Việt Nam  jao leh klei Bi mklă tŭ yap 2 Klei pah mni kdlưn hĭn Việt Nam truh kơ Anôk bruă sang čư̆ êa čar Lâm Đồng, mâo: Klei pah mni kdlưn hĭn “Wăl anôk mdah čing čhar mguôp hŏng dhar kreh kdŏ mmuñ prŏng hĭn” lehanăn Klei pah mni kdlưn hĭn “Hdră kdŏ mmuñ mguôp hŏng klei mdah hdră tông čing čhar bi mguôp êpul êya, jak iêu lu phung mbruă, nghệ sĩ – diễn viên lehanăn mnuih ƀuôn sang nao hgŭm lu êdi hŏng hdră We are LamDong”.

Ƀri gưl anei, ti Đà Lạt, Lâm Đồng lŏ mkŏ mjing lu hdră jăk jĭn msĕ si: Hdră mdah mnơ̆ng pơ̆k mñam, Knăm mơak Knhuah gru Kphê tar rŏng lăn 2025 hŏng lu wăl anôk tui ksiêm, klei bi kƀĭn trông, hdră dhar kreh – hiu čhưn ênguê jăk siam, msĕ si Mlam mơak lehanăn Countdown kkuh drông thŭn mrâo. Hdră anei amâo djŏ knŏng bi mni kơ knhuah gru dhar kreh, hưn mthâo pŏk rup alŭ wăl ƀiădah lŏ mjing ai êwa hơ̆k mơak, jak iêu lu mnuih ƀuôn sang, tuê hiu čhưn ênguê truh ti Đà Lạt hlăm dŭm hruê knhal jih thŭn.