Hrue mơak dhar kreh dŭm djuê ana ti čar Gia Lai jing leh sa kdrăp amâo mâo dưi kƀah ôh ti ƀuôn Roh (ƀuôn hgŭm Pleiku) mâo bi êdah jêñ jêñ hŏng ƀuôn sang. Čing, t’rưng, klông pút, kwang nanao leh mjing klei iêo jak jăk êdi.

Pô mbruă Siu Thưm – khua êpul brei thâo, čiăng mâo ênŭm kdrăp mdah jăk, klei yuôm bhăn hĭn jing, klei bi mguôp hlăm klei pĕ tông, mjing sa ai êwa siam hlăm dŭm kdrăp pĕ tông mdê mdê. Kdrăp pĕ tông mơ̆ng ƀuôn Roh mâo brô̆ t’rưng jing phŭn, čuê anăn klông pút, kŏk điêt, dŭm boh hgơr, čing, êriâo, dang. Grăp mta mñê mâo bi mguôp leh mbĭt hlăm klei mbruă mơ̆ng phung thâo pĕ tông;

“Phŭn tal êlâo, leh pŏk knŏng mâo ƀiă mnuih bi mguôp. Ƀiădah ară anei, dưi mâo leh mơ̆ng 2–3 êpul, dưi hiu mdah leh hlăm djăp anôk. Diñu khăp êdi kơ kdrăp pĕ tông anei, khăp kơ knhuah gru dhar kreh djuê ana pô. Kâo mâo klei čiăng dliê hŏng drei snei, khăp nanao kơ dhar kreh jăk siam mơ̆ng aê aduôn pô đưm; đăm hngah ôh mơ̆ng kdrăp pĕ tông djuê ana pô, čiăng kơ jih jang mnuih dưi mâo klei mơak”.

Alê khua êbŭng mda lŏ čăt. Tơdah phung mbruă hlăm kdrăp pĕ tông dơ̆ng wĭt hŏng aê duôn, ƀiădah phung mda asei lŏ dơ̆ng čuê, djă pioh jih jang knhuah gru mơ̆ng kdrăp pĕ tông dŭm djuê ana ti Gia Lai hŏng klei jăk snăk. Ti ƀuôn Jut 1, ƀuôn hgŭm Ia Hrung, čar Gia Lai, khădah mrâo 15 thŭn, Siu Ting Ning mâo leh lu thŭn tui hlue ana hlăm djăp bruă dhar kreh, hiu mdah tông čing hlăm dŭm knăm mơak ƀuôn sang. Ting Ning mbĭt hŏng mah jiăng ñu jhŏng mkŏ mjing leh sa êpul tông čing hđeh, nao mdah hlăm dŭm sang huă mnăm hlăm ƀuôn prŏng Pleiku, mbĭt anăn nao bi mguôp hlăm dŭm knăm mơak, bi hgŭm hlăm dhar kreh hlăm čar, lehanăn êngao čar.

 “Êpul tông čing hmei jing hđeh kkiêng mơ̆ng thŭn 2008 - 2011. Phung mniê mâo 7 čô, êkei mâo 5 čô. Êpul tông čing hmei mâo nao mdah leh ti wăl tač klei bi mguôp prŏng ti Pleiku, nao truh hlăm dŭm anôk taih kbưi msĕ si ti Quảng Ngãi, Quảng Trị. Bi hưn mdah kơ kdrăp pĕ tông djuê ana pô, lehanăn ktrâo atăt brei kơ tue hdră pĕ tông. Kâo ƀuh mơak êdi kơ knhuah gru dhar kreh djuê ana pô. Kâo čang hmăng dhar kreh anei dưi kriê pioh nanao truh kơ êdei anăp”.

Dhar kreh đưm mơ̆ng dŭm djuê ana ti Gia Lai ară anei amâo mâo djŏ knŏng lŏ kơrŭ wĭt, lŏ bi lar, ƀiădah nao mđrĭng hŏng anăn mđĭ ênoh mâo ba wĭt kơ pô. Ti ƀuôn  K’Dang, ƀuôn hgŭm Tơ Tung, čar Gia Lai, lŏ kuič mjhar leh pui kơ bruă hiu čhưn ênguê hlăm yang ƀuôn, hŏng dŭm knhuah gru jăk siam djuê ana Bahnar.

Ti homestay A Ngưi, phung tue amâo mâo djŏ knŏng dlăng, ƀiădah lông hdĭp mbĭt hŏng dhar kreh Bahnar, hŏng ênai čĭng, hŏng rup krah, hŏng dŭm gru grua mnơ̆ng pơ̆k mñam. A Ngưi čŏng ba yua hla pŏk yang ƀuôn msĕ si Zalo, Facebook, website, fanpage lehanăn dŭm atur kơ bruă hiu čhưn ênguê čiăng dưi iêo jak phung tue hriê čhưn mơ̆ng jĕ giăm hlŏng taih kbưi.

“A Ngưi hlăk dôk tĭng čiăng pŏk sa anôk bi lar bruă anei hŏn phung hđeh, lông hlăp lehanăn ba yua kdrăp djuê ana pô ti alŭ wăl, thâo hriăm kdŏ čhuang, thâo tông čing, thâo mkra dŭm mta mnơ̆ng ƀơ̆ng djuê ana pô, msĕ si điŏ brông, mnŭ ăm. Mơ̆ng dŭm bruă ênưih, jĕ giăm snăn, A Ngưi đăo knang phung hđeh mda asei srăng thâo khăp, lehanăn thâo djă pioh ngăn dưn mơ̆ng aê aduôn pô đưm”.

Mđrăm mbĭt hŏng phung hđeh mda asei, êpul bruă êdam êra ăt mkŏ mjing leh mơh lu bruă ngă, đru bi kriê pioh, lehanăn lŏ bi lar knhuah gru aê aduôn pô đưm. Đỗ Đức Thanh – K’iăng khua bruă êdam êra Gia Lai brei thâo:

“Êpul bruă êdam êra, dŭm êpul hgŭm mâo mkŏ mjing leh lu bruă ngă mjing leh anôk hlăp, mâo dŭm klei hâo hưn, klei lông ngă, đru bi kriê pioh knhuah gru aê aduôn đưm. Phung hđeh mda asei bi êdah ai tiê klei thâo khăp kơ ƀuôn sang, kơ lăn čar, khăp kơ dhar kreh djuê ana pô. Hmei ƀuh dŭm bruă anăn pioh kơ klei hưn mdah, klei jing, kơ dhar kreh djuê ana truh hŏng djăp čar kwar kluôm ala.”

Hlăm klei hdĭp ênuk mrâo mrang ară anei, dhar kreh djuê ana ti Gia Lai hlăk lŏ čuê ba kơ hđeh gưl mrâo, lehanăn diñu hlăk mâo dŭm klei mĭn dưn yua kriê pioh hŏng dŭm bruă ngă klă sĭt hlăm klei hdĭp. Hlăm klei myưng m’ang, hŏng klei mĭn knhêč, lehanăn ai tiê thâo duh myơr, diñu jing leh kdrông mkŏ dhar kreh čư̆ čhiăng pô hlai mbĭt hŏng klei hdĭp ênuk ară anei, mơ̆ng anăn dhar kreh aê aduôn pô đưm, amâo mâo djŏ knŏng jing dŏ hlăm klei hdĭp mhpŭn dô ôh, ƀiădah lŏ kwang nanao hlăm klei hdĭp ară anei lehanăn kơ êdei anăp./.