Ti krah alŭ 8, ƀuôn hgŭm Ayun Pa, đang war điêt mơ̆ng ayŏng Kpă Sa jing anôk truh kơ mnuih ƀuôn sang čiăng duah anôk êđăp ênang, jăk siam hlue si knhuah mnuih Jarai. Mơ̆ng thŭn 2018, Sa mphŭn mkra mđĭ wăl lăn  pla mjing, rông mnơ̆ng, mjing grăp anôk, pruê̆ kyâo jing anôk jăk siam. Amâo djŏ knŏng hjăn bruă bi siam kơ war sang 200m2 ôh, Sa lŏ hưn kơ mnơ̆ng ƀơ̆ng djuê ana msĕ si hla hbei ƀlang, amrêč hdăm sao, leh anăn dŭm mta mnơ̆ng yua mnuih Jarai… hlăm hla pŏk web ala ƀuôn. Dŭm video, rup anăn mgei ai tiê êpul êya, leh anăn lu mnuih duah hiu čhưn dlăng msĕ si anôk điêt hưn mdah dhar kreh alŭ wăl.

“Tal êlâo pô ăt bi mĭn, kyua war sang pô ka siam ôh, kyua anăn ba pla djam tam mkra mjing bi siam hĭn leh anăn jăk, doh hĭn. Kâo mkra war anei mơ̆ng 2028, truh ară anei.  Grăp hruê kâo mkra mjing, bi mĭn si ngă kơ wăl anei, wăl adih čiăng kơ siam hĭn, jing luc clu hruê mmoong kơ war pla mjing, rông mnơ̆ng, mơ̆ng aguah truh tlam tăp năng kăn jih mơh bruă, grăp hruê pô mkra nanao čiăng kơ đang war anei siam hĭn, grăp čô srăng khăp hĭn.”

Đuĕ mơ̆ng Ayun Pa, nao ti să Ia Ly, gru hmô “Ƀuôn dhar kreh hiu čhưn ênguê  Jarai” mơ̆ng amai H Uyên Niê dôk bi mrâo bruă djuê ana ƀrư̆ luč riam. Mphŭn mơ̆ng klei bi mĭn tơdah ƀuh mnơ̆ng čŭt hơô, mñam bŭng amâodah tăp mdiê dưi ngă hlăm klei hdĭp grăp hruê, ñu hŏng sa êpul phung mniê hlăm ƀuôn mkŏ mjing bruă hiu čhưn dlăng kơ phung tue. Jih jang dưi hưn mdah tŭ dưn kyua fanpage ƀuôn, Kyua anăn, phung mniê mâo thiăm prăk hrui wĭt, kriê pioh bruă djuê ana hŏng kiê kngan mă bruă grăp hruê. Amai H’Uyên Niê brei thâo:

“Diñu bi tuôm hŏng pô hlăm hla pŏk web ala ƀuôn leh anăn fanpage ƀuôn. Ƀuôn mâo sa Fanpage anăn jing ƀuôn hiu čhưn ênguê êpul êya. Tơdah phung tue blŭ hrăm tinăn amâodah mơ̆ng anăn kah mbha hŏng phung găp. Dŭm bruă ngă phŭn hlăm ƀuôn ăt jing kdrăp djuê ana, hrĭ mñam, tăp mdiê, bruă tŭk knă msĕ si tram braih, koh mơô brei kơ phung tuê dưm braih hlăm đĭng mơô,brông điŏ čiăng kơ grăp yan snăñ tue srăng lông ngă bruă yan anăn. Sitôhmô wưng knhal jih thŭn snăn kpĕ kphê snăn snăn phung tue srăng pĕ kphê leh anăn mă rup.”

Tơdah Kpă Sa leh anăn H’Uyên Niê lar bra knhuah dhar kreh hlăm đang war leh anăn kdrăp mnơ̆ng djuê ana, snăn Rcom Bus - êkei êdam Jarai 23 thŭn ti Pleiku ruah klei kdŏ mmuñ lehh anăn rup siam čiăng yăl dliê kơ lăn Dap Kngư bŏ hŏng mrâo mrang. Fanpage “Tarzan Tây Nguyên” ñu mâo êbeh 160 êbâo gưl ktuê dlăng. Clip ayŭ kipah leh anăn dôk djiêô drai êa amâodah đĭ čư̆ hlăm kdrăp čŭt hơô djuê ana jing kpin jiă kma mngăt êwa Dap Kngư. Bus brei thâo, mơ̆ng sa čô hđeh ñŭt huĭ, huĭ kơ djă đĭng blŭ ti anôk lu mnuih, ñu mưng hŏng bruă mdar vlog leh anăn jhŏng hĭn hlăm djăp video. Amâo hriăm kơ klei mmuñ êlam ôh, Bus ăt mjing leh knhuah mdê hjăn, ƀŭk dlông, klĭt uê leh anăn ai tiê jăk kyua anăn arăng iêô ñu jing “tarzan Lăn Dap Kngư”. Dŭm MV đĭ čư̆, yuôt klei, hlăp kdrăp tông ayŭ djuê ana mơ̆ng Bus khăng mâo dŭm êtuh êbâo gưl dlăng; clip tal êlâo mâo êbeh 200.000 gưl khăp dlăng. Mơ̆ng anăn, Bus jing sa čô “bi ala hiu hưn bruă hiu čhưn ênguê” jăk snăk.

“Kâo hưn kơ dhar kreh leh anăn klei bhiăn hdĭp mda hlăm hla pŏk web ala ƀuôn čiăng kơ grăp čô mnuih thâo kơ dhar kreh Lăn Dap  Kngư mâo klei jăk, klei siam snăk leh anăn lu jơr. Lăn Dap Kngư jing sa klei yuôm bhăn snăk, lăn adiê jăk siam êdi. Kâo pô jing mnuih Lăn Dap Kngư kâo ƀuh ka thâo jih ôh krĭng Lăn dap Kngư anei, ênai čing čhar, knhuah dhar kreh mnuih djuê ƀiă kâo khăp snăk leh anăn ktưn hưn tơdah dưi mđĭ kyar dhar kreh djuê ana pô, hưn mdah kơ jih jang mnuih thâo lu hĭn.”

Ayŏng Đỗ Đức Thanh, K’iăng Khua dlăng bruă êdam êra, Khua êpul hgŭm phung êdam êra čar Gia Lai lač, anei jing klei bi mklă kơ bruă klam mlih mrô hŏng phung êdam êra. Klei mbruă  grăp čô amâo djŏ knŏng đru kơ diñu pô đĭ kyar ôh ƀiădah lŏ lar rup Gia Lai - sa krĭng lăn lu klei jăk siam, jĕ giăm, lu klei găl hiu čhưn ênguê.

“Dưi bi mklă kdrăp mrô leh anăn hla pŏk web ala ƀuôn jing sa hlăm dŭm kdrăp tông ayŭ jăk siam tŭ dưn mjing klei găl kơ phung êdam êra dưi thâo giăm hĭn kơ dhar kreh djuê ana ăt msĕ mơh klei mphŭn čô̆ kơ bruă, čŏng mkra mjing video clip, rup čiăng hưn mthâo drei pô dôk ngă ya klei čiăng mphŭn čô̆ kơ bruă. Diñu hưn kơ grăp čô thâo klei ktưn hưn ăt msĕ mơh bruă pô dôk ngă čiăng mđĭ kyar. Mơ̆ng anăn ăt hưn mdah rup ƀuôn sang, alŭ wăl hŏng klei jăk siam čiăng kơ rup ƀuôn sang truh hŏng êpul êya, iêô jak lu hĭn tue hiu čhưn ti alŭ wăl.”

Mơ̆ng đang war điêt ti Ayun Pa, truh kơ jar mñam kdrăp djuê ana ti Ia Ly amâodah ênai ki pah kwang ti krah dliê krmơ̆ng Pleiku… Phung mda asei mnuih djuê ƀiă ti Gia Lai dôk yăl dliê klei dhar kreh ƀuôn sang pô hlue si hdră mrâo mrang: mbruă leh anăn ktưn hưn.  Diñu jing phung bi ala hiu hưn dhar kreh Lăn Dap Kngư, đru mguôp yuôm bhăn hlăm bruă ba rup Gia Lai giăm hĭn hŏng tue hlăm ala čar leh anăn ala tač êngao.