Hlăm sa mlam akŏ yan puih, leh hrui pĕ ênŭm kphê kơ sang, suăi êmăn ƀiădah ai tiê mơak mñai, mnuih ƀuôn sang ti ƀuôn Ia Nueng lŏ dơ̆ng bi ngi ti sang khua mduôn Hmrik. Tlao mơak hŏng klei dôk čhưn hrăm hlăm kčŏk êa čê, lehanăn kphê, hmư̆ awa mduôn yăl dliê hŏng ƀuôn sang, kyua adiê hlĭm hjan pĕ kphê suăi êmăn, mđĭ ai jih jang mnuih brei thâo gĭr, hrui pĕ kphê leh ksă bi djăp hnơ̆ng jăk boh kphê. Bi hŏng Thiên, sa čô mnuih hlăm ƀuôn, mâo klei khua mduôn dru kčĕ, anăn jing sa klei hriăm yuôm bhăn. Dŭm thŭn êlâo, êjai ung mô̆ ñu dôk găn hlăm klei dleh dlan, amâo mâo thâo bĭt êlan duah ƀơ̆ng, lĕ hlăm klei kpiê ruă čuă êba nanao, ƀiădah leh mâo Khua mduôn Hmrik nao truh kơ sang mtô mtã, ktrâo brei kơ ñu hdră rông êmô, hdră pla kphê, lehanăn atăt nao čan prăk knơ̆ng prăk đru ba kơ yang ƀuôn. Jih jang klei mtă mtăn, mbĭt hŏng klei ñu gĭt ktĭr brưih đĭ hlăm klei duah ƀơ̆ng, đru leh gŏ sang ñu mâo klei bi mlih. Ară anei, gŏ sang ñu mâo leh truh 20 drei êmô êmŏng siam, mâo đang kphê truh kơ 2ha mâo ba wĭt klei tŭ dưn mơ̆ng kngan pô mă bruă hŏng klei hơĭt. Thiên yăl dliê:

  “Mâo khua mduôn đru, asei mlei kâo lŏ gĭr ktĭr, ba yua klei kreh knhâo, pla kphê, pla mdiê, rông mnơ̆ng ŭn mnŭ êmô kbao, mơ̆ng anăn klei hdĭp hơĭt hĭn leh.”

Klei yăl dliê kơ Thiên knŏng jing sa hlăm dŭm gŏ sang mâo khua mduôn  Hmrik đru čung ba, čiăng kơ klei hdĭp mda mâo klei bi mlih. Amai Ksor H’Chiêm, knuă druh bruă Mặt trận mơ̆ng ƀuôn brei thâo, Ia Nueng dưi thâo jing sa hlăm dŭm boh ƀuôn mâo klei đĭ kyar, êđăp ênang, thâo bi mguôp, jiă knhuah gru dhar kreh, sa kdrêč yuôm bhăn jing klei thâo gĭr mơ̆ng khua mduôn Hmrik. Ñu thâo bi mgrăng klei amâo mâo thâo bi djŏ hlăm ƀuôn sang, ñu truh hŏng grăp boh sang čiăng kčĕ mtô, mtă mtăn brei thâo bi kriê pioh knhuah gru dhar kreh klei bhiăn pô, mđrăm mbĭt thâo bi răng mgang ƀuôn sang… Ngă djăp mta bruă hlăm klei thâo bi hmô jăk, čiăng kơ phung hđeh gưl mrâo tui hriăm. Amai  H’Chiêm lač:

Bă“Ya mta klei awa mtô mblang kčĕ brei, jih jang mnuih bi tui gưt. Awa bŏ hŏng klei mtăp mđơr, thâo bi grăng djăp mta boh klei mâo hlăm ƀuôn sang hŏng klei khăp, hlei pô ngă soh snăn mâo klei mtă mtăn êdu êun, brei thâo ƀuh jing klei amâo mâo djŏ. Kyua k’hưm mơ̆ng awa, jih jang bruă dleh ăt jing ênưih mơh, djăp mta bruă mghaih msir hŏng klei ênưih sơăi. Mâo awa đru ƀuôn sang pô đĭ kyar, kreh dhar. Awa amâo mâo djŏ knŏng mtă mtăn kơ klei kriê pioh knhuah gru aê aduôn pô, ƀiădah lŏ mtô bi hriăm amuôn adei tui duah klei đĭ kyar, thâo bi mguôp.”

Thŭn anei, 77 thŭn leh, asei mlei amâo jăk lŏ suaih msĕ si êlâo ôh, ƀiădah grăp blư̆ ƀuôn sang mâo bruă, mâo klei bi kƀĭn, knăm mơak, thâodah klei bi grăng hlăm ƀuôn sang, mđĭ ai mnuih ƀuôn sang, Khua mduôn Hmrik jing mnuih ba akŏ nanao. Ya mta klei khua mduôn Hmrik mtă mtăn jih jang mnuih hmư̆, lehanăn yap ñu jing kŏ arăng bâo hlâo arăng yap, jing mnŭt akŏ êa hră akŏ ƀuôn mnuih mâo k’hưm êdi hŏng ƀuôn sang. Asei leh khua mta mmăt leh, ƀiădah awă ăt tui hriăm nanao djăp mta klei mrâo mrang, boh nik hlăm klei duh ƀơ̆ng. Mbĭt hŏng klei ngă lŏ hma pla mjing, thâodah rông mnơ̆ng, ƀuôn Ia Nueng hlăk dơ̆ng rŭ mjing sa boh ƀuôn hiu čhưn ênguê. Hŏng hdră êlan duh ƀơ̆ng mrâo, bi mâo hdră mkŏ mjing kjăp, snăn khua mduôn Hmrik lŏ atăt dŭm čô amuôn adei hlăm ƀuôn tui nao hriăm truh kơ Kon Tum, Daklak, lehanăn mâo klei mĭn ciăng nao tui hriăm truh kơ krĭng yŭ dưr tui hdră arăng duh ƀơ̆ng.

Klei hdĭp mda mâo leh lu klei bi mlih, lehanăn khua mduôn Hmrik mâo nanao klei mtă mtăn kơ amuôn adei anak čô, drei dưi mâo klei hdĭp mda êđăp ênang h’uh mđao ară anei kyua mâo Đảng, Knŭk kna mâo leh dŭm hdră êlan jăk đru kơ mnuih djuê ƀiă pô; msĕ si mkra brei êlan klông, ba êa doh truh kơ ƀuôn sang, đru kơ hdră êlan duh mkra pla mjing lehanăn rông mnơ̆ng. Kyua anăn, mnuih ƀuôn sang bi hlue gưt hdră êlan mơ̆ng Đảng lehanăn knŭk kna. Khua mduôn Hmrik lač:

“Jing khua mduôn hlăm ƀuôn sang, snăn pô mđrăm mbĭt hŏng knŭk kna, hŏng bruă sang čư̆ êa mđĭ ai, mtô mblang, mtrŭt mjhar mnuih ƀuôn sang thâo gĭr hlăm klei duh ƀơ̆ng, mkŏ mjing klei hdĭp kreh dhar, kriê pioh knhuah gru dhar kreh. Dlăng kơ mnuih ƀuôn sang leh trei mđao, kâo mơak leh. Adôk suaih pral kâo ăt sa ai hŏng ƀuôn sang, kơ bruă sang čư̆ êa.”

R’Cơm H’myư, K’iăng khua bruă mặt trận ƀuôn hgŭm Biển Hồ, čar Gia Lai brei thâo, khua mduôn Hmrik jing leh klei bi hmô mngač kơ knhuah dôk dơ̆ng ƀơ̆ng huă, mâo klei đua klam hŏng yang ƀuôn. Amâo mâo djŏ knŏng ƀuôn  Ia Nueng, mnuih ƀuôn sang hlăm dŭm boh ƀuôn ti ƀuôn hgŭm Biển Hồ mpŭ sơăi kơ awa. Ya mta bruă mâo mơ̆ng ƀuôn hgŭm čiăng mâo awa nao mtrŭt mjhar, mđĭ ai, ƀuh jing ba wĭt klei tŭ dưn hĭn. R’Cơm H’myư lač.

 “Klei hing ang mơ̆ng awa Hmrik jing prŏng snăk, truh hŏng jih jang mnuih djăp gưl hđeh êlăk hlăk ai, hlŏng truh hŏng phung khua asei huĭ mpŭ đup gưt sơăi klei awa mtă mtăn. Mâo awa mtô kơ knhuah dôk dơ̆ng ƀơ̆ng huă, mtô kơ klei bhiăn hdĭp, lui hĕ ya mta klei amâo mâo jăk, bi gĭr duh ƀơ̆ng, lehanăn thâo bi kriê pioh knhuah gru dhar kreh djuê ana pô, êjai hlăm ênuk mrâo mrang ară anei. Mơ̆ng anăn đru bi mkŏ mjing klei hdĭp jăk yâo kreh dhar trei mđao, lehanăn yâo mơak.”

 Êdu êun, jăk ênang, thâo jĕ giăm hŏng jih jang mnuih, anăn yơh jing ai ktang mơ̆ng awa HMrik lehanăn lu phung khua mduôn mkăn hlăm čar Gia Lai. Diñu jing leh anôk kơ amuôn adei ti Ia Nueng lehanăn dŭm boh ƀuôn mnuih Jarai, Bahnar hlăm kluôm čar jưh knang. Hlăm ai tiê mnuih ƀuôn sang awa jing nanao gru bi hmô mngač hlăm bruă thâo kriê pioh knhuah gru dhar kreh, mkŏ klei thâo bi mguôp hlăm ƀuôn sang, thâo bi lar knhuah hdĭp jăk, klei thâo bi mguôp, klei thâo gĭr, čiăng kơ ƀuôn sang knư̆ hrue knư̆ trei mđao, lehanăn hnŭk ênang./.