Mnuih Mạ lač, čing čhar mbĭt hŏng kdrăp čut hơô jing ngăn dưn yuôm bhăn bi knăl kơ klei mdrŏng sah mơ̆ng sa găp djuê lehanăn kơ jih ƀuôn. Mphŭn tal êlâo, čing čhar knŏng jing kdrăp pioh tông yua hlăm dŭm klei huă mnăm đuič amâo mâo duah yua ôh hlăm dŭm hrue aguah tlam.

Tui si đa đa phung ksiêm duah, năng ai čing čhar hŏng kông jing mnơ̆ng yua gưl êdei kơ čing boh tâo, mơ̆ng phŭn tal êlâo mâo čing čhar ba tông ti anôk hua êsei mrâo, amâodah knăm trŭn kơ bruă, êdei anei lŏ thâo ba yua hlăm djăp klei huă mnăm mơ̆ng mnuih ƀuôn sang, msĕ si klei ƀhur knga, klei lui msat, hua êsei mrâo, amâodah hua mnăm leh mdiê ênŭm kơ hjiê, knăm ngă yang ƀơ̆ng kbao... Snăn bi ba yua čing čhar sơăi, jing mnơ̆ng pioh yua bi êdah klei iêo mguôp jih jang mnuih. Pô mbruă hŏng čing čhar K’ Thang ti wăl krah Lạc Dương, kdriêk Lạc Dương, čar Lâm Đồng lač: Ăt msĕ hŏng mnuih djuê ana K’Ho hlăm alŭ wăl mơh, mnuih Mạ   yua čing čhar jing pioh tông hlăm kdrăp tông anei mâo sa rĭng truh kơ 6 boh, grăp boh čing mâo đŏk mdê mdê:

Dŭm boh čing hlăm rĭng čing anei mâo đŏk mñê mdê mdê, mơ̆ng điêt kơ prŏng mâo đồ rê mi fa sol. Rĭng čing anei mâo anăn pia mơ̆ng čing ana truh kơ čing kluič, jih 6 boh mâo anăn mdê mdê sơăi.

Tui hlue anăn pia mdê mdê čing mnuih Mạ lehanăn dŭm djuê ana hlăm alŭ wăl msĕ mơh, mâo čing amĭ, čing ama, čing ayŏng khua truh kơ grăp boh hlŏng kơ knhal tuič anăn jing čing kluič. Klei anei jing bi djŏ hŏng dhar kreh mơ̆ng dŭm djuê ana hlăm alŭ wăl, jing tui hlue si klei bhiăn mă djuê tĭng kơ amĭ.

Tui si K’ Chẻo ti să Lộc Tân, kdriêk Bảo Lâm, čar Lâm Đồng, mbĭt hŏng mnơ̆ng pơ̆k mñam snăn čing čhar mnuih Mạ dưi yap jing ngăn kĭr yuôm bhăn bi knăl kơ klei dưi, kơ knuih kơhưm lehanăn klei mdrŏng sah mơ̆ng grăp gŏ sang, găp djuê lehanăn kơ jih ƀuôn. Hlăm thŭn truh yang huă mnăm, amâo dah ya mta bruă jing yuôm bhăn ênai čing dơ̆ng bi kwang, mbĭt hŏng lu kdrăp čŭt hơô lu mta mơ̆ng êkei lehanăn mniê djuê ana Mạ.

Lač kơ dhar kreh, snăn čing čhar, lehanăn kdrăp čŭt hơô, snăn čing čhar mâo sơăi hlăm djăp knăm mkŏ mjing mđrĭng mbĭt hŏng čing čhar, snăn ao djuê ana pô yơh jing mnơ̆ng čŭt hơô mtrŭt brei hơô bi djăp, mơ̆ng anăn mâo nanao klei bi kriê pioh.

Êlâo dih, čiăng dưi mâo tloh blei ênŭm sa rĭng čing mnuih Mạ mâo klei bi mlih hŏng mnơ̆ng, tui hlue hŏng ênoh yuôm mnơ̆ng bi mlih mdê mdê. Čing knư̆  jing dŏ đưm, snăn knư hĭn mơh jing yuôm bhăn, mâo đa đa rĭng čing bi mlih truh bi mlih truh kơ dŭm pluh drei êmô, kbao, lehanăn dŭm mta ngăn dŏ yuôm mkăn.

Tui si klei bhiăn mnuih djuê ana Mă, čing čhar mâo kriê pioh leh mơ̆ng dŭm ênuk aê aduôn pô đưm snăn jing yuôm bhăn snăk. Dŭm găp djuê gŏ sang ăt adôk djă pioh čing čhar lŏ čuê aê ama pô êlâo, anăn jing klei năng mơak, mâo lu găp djuê bi mni, lehanăn mpŭ. Kyuanăn êlâo dih, mnuih djuê ana Mạ mâo sơăi ƀiă êdi sa rĭng čing, amâodah lu hĭn kơanăn.

Čing mnuih djuê ana Mạ mâo 6 boh lehanăn điêt prŏng mdê mdê hŏng boh prŏng mơ̆ng 20 - 60 cm. Hŏng mnuih Mạ, čing yap jing ngă dŏ yuôm bhăn pioh kơ anak mnuih bi mguôp hŏng yang adiê. Kyuanăn ênai mơ̆ng čing amâo mâo djŏk nŏng pioh tông jing mnơ̆ng bi mơak ti anôk huă mnăm đuič ôh, ƀiădah jing sa asăp bi blŭ hrăm truh hŏng yang adiê hlue ênai čing.

Pô mbruă K’Thang lač:

Mphŭn dô aê aduôn pô ruah hrue ênang sang êđăp, thŭn mlan jăk êa hlĭm hjan, jing thŭn djŏ boh mnga, snăn bi jak iêo yơh jih jang mnuih hlăm ƀuôn bi mkrum mdiê kuê, čiăng mlih hŏng sa drei kbao pioh nga yang, snăn ƀuôn sang mkŏ mjing yơh klei tông čing.

Boh nik grăp blư̆ yua čing hlăm knam mơak mơ̆ng yang ƀuôn mnuih djuê ana Mạ snăn mâo sơăi klei bhiăn iêo čing, sitôhmô râo čing./.