Ƀri wưng hruê bn tar rŏng lăn 31/10, ƀuôn prŏng Đà Lạt klă klơ̆ng mâo UNESCO tŭ yap, nao hgŭm hlăm dŭm ƀuôn prŏng mbruă UNESCO hlăm klei kdŏ mmuñ. Anei jing bruă yuôm bhăn čiăng kơ ƀuôn prŏng Đà Lạt bi klă, lŏ dơ̆ng bi lar klei găl mbruă kơ klei kdŏ mmuñ, đru pŏk mlar klei mjĕ giăm bi mguôp tar rŏng lăn, mtrŭt mđĭ klei đĭ kyar bruă duh mkra ala ƀuôn mơ̆ng alŭ wăl dôk đĭ kyar.

Hluê si Trần Quang Tú, khua bruă sang čư êa ƀuôn prŏng Đà Lạt, êngao kơ bruă mtrŭt mđĭ klei hâo hưn, mđĭ klei thâo săng, bruă klam mơ̆ng yang ƀuôn, Đà Lạt dôk hluê ngă hrăm mbĭt lu hdră êlan knăm djă pioh anăn knăl, mtrŭt mđĭ ƀuôn prŏng mbruă mđĭ kyar klei kdŏ mmuñ djŏ hŏng klei ƀuăn hŏng UNESCO. Hlăm anăn, kñăm kơ bruă kriê pioh klei kdŏ mmuñ knhuah gru, mkŏ mjing klei găl kơ hdră êlan čiăng iêo jak, mtrŭt mđĭ boi lu jơ dŭm mta klei kdŏ mmuñ.