Mơ̆ng aguah ưm, ti wăl tač adŭ bruă dhar kreh leh anăn hâo hưn kdriêk Ea Hleo, čar Dak Lak mâo leh lu mnuih mtŭk mtlak mơak mñai. Djăp mta bruă dưi dăp hlăm dŭm anôk mdê mdê msĕ si: Anôk răng mdah hdruôm hră leh anăn mnơ̆ng dhơ̆ng Stem, anôk rang mdah rup hluê si akŏ mdê mdê, anôk ksiêm hriăm kơ hdruôm hră leh anăn dhar kreh dlăng hră, bi tuôm hŏng phung čih hră leh anăn klei bi lông yăl dliê hluê akŏ hdruôm hră. Grăp anôk anăn dưi iêo jak lu phung hđeh sang hră leh anăn wăt phung nai, phung amĭ ama nao hgŭm, ktuê dlăng. Hơ̆k mơak djă hnư mnơ̆ng mrâo mâo mă, adei Bùi Trần Bảo Thư, hđeh sang hră adŭ 6A5, sang hră gưl 2 Lê Quý Đôn, wăl krah Ea Drăng, kdriêk Ea Hleo brei thâo:

 Mơ̆ng aguah ưm kâo hriê tinei dlăng kdŏ mmuñ, mă hdruôm hră, bi tuôm hŏng phung amiêt awa čih klei yăl dliê, ksiêm hriăm kơ dhar kreh dlăng hră. Hlăm dŭm mta bruă anăn kâo khăp êdi kơ klei hlăp lêñ, ktuê dlăng dhar kreh dlăng hră kyua mâo lu klei găl tŭ jăk, leh anăn mơak mñai. Kâo hmăng hmưi sang hră srăng mkŏ mjing lu hĭn dŭm mta bruă leh anăn klei hlăp lêñ kơ ƀĭng găp hlăm êpul čiăng mâo thiăm klei hriăm leh anăn hlăp lêñ.

Amâo djŏ knŏng dưi mâo hlăm mta bruă jăk mơak leh anăn tŭ dưn, phung hđeh sang hră nao hgŭm lŏ dưi mâo dŭm pŏk hdruôm hră klei yăl dliê kơ phung hđeh. Dŭm mta phŭn klei kah mbha mơ̆ng phung tuê ăt dưi đru kơ phung hđeh sang hră thâo săng klă hĭn kơ boh tŭ dưn bruă dlăng hră, mơ̆ng anăn diñu mâo klei khăp čiăng hĭn hŏng bruă dlăng hră leh anăn mâo klei hriăm mơ̆ng klei dlăng hră. Adei Phan Thị Phương Thúy, hđeh sang hră adŭ 9A, Sang hră gưl tlâo knŭk kna rông ba hđeh sang hră mnuih djuê ƀiă kdriêk Ea Hleo brei thâo:

 “Kâo hmư̆ phung čih klei duê, klei yăl dliê blŭ hrăm jăk êdi. Mâo lu êpul jăk êdi, yăl dliê kơ Awa Hồ hmư̆ mgei ai tiê. Kâo hmư̆ jăk leh anăn čiăng dưi ngă msĕ sơnăn mơh. Kâo dê ƀiă mơh nao dlăng hră kyua amâo mâo đei khăp ôh, knŏng dlăng hdruôm hră hơăi đuč, bi hdruôm hră klei yăl dliê knŏng dlăng ƀiă đuč. Ƀiădah ară anei hmư̆ diñu kah mbha kâo ƀuh mâo klei khăp čiăng kơ hdruôm hră hĭn leh anăn khăp kơ klei čih yăl dliê hĭn.”

Hluê si Nguyễn Huy Dũng, Khau adŭ bruă Dhar kreh hâo hưn kdriêk Ea Hleo, sa ai hŏng hruê hdruôm hră leh anăn dhar kreh dlăng hră thŭn 2023, alŭ wăl mâo leh hdră êlan hluê ngă hrăm mbĭt lu mta bruă. Êdah êdi msĕ si: Mkŏ mjing hruê kñăm hŏng akŏ “Hdruôm hdră leh anăn thun mda”, rang mdah, đru kơ ƀĭng dlăng 2.500 pŏk hdruôm hră hŏng lu mta msĕ si: Hdruôm hră kơ phung hđeh, hdruôm hră klei kreh knhâo, hdră dlăng, hdruôm hră mtô kơ klei hdĭp, klei bhiăn ala čar, bruă mdrao mgŭn, hdruôm hră klei mrâo. Rang mdah rup leh anăn rup kač “Ea H’leo jăk siam”. Mkŏ mjing klei bi lông dŭm klei hlăp đưm, bi mđăo mâo hnư mnơ̆ng, bi tuôm hŏng phung čih klei yăl dliê, phung čih klei duê, klei bi lông yăl dliê klei čih mơ̆ng hdruôm hră…Hdră anei dưi mâo lu klei uêñ mĭn, nao hgŭm mơ̆ng giăm 1.000 gưl čô hđeh sang hră leh anăn phung nai ti dŭm sang hră gưl 2, gưl 3 hlăm kluôm kdriêk. Mbĭt hŏng anăn, kdriêk ăt uêñ mĭn kơ phung hđeh sang hră dleh dlan hŏng lu hdră bi lông, bi lar dhar kreh dlăng hră ti dŭm sang hră. Nguyễn Huy Dũng brei thâo:

 Hmei lŏ mâo hdră êlan jing bi lar kơ dŭm sang hră, leh anăn alŭ wăl, hlăm anăn mâo mđup brei kơ dŭm sang dlăng hră msĕ si bi krum mguôp hdruôm hră leh anăn mđup brei kơ phung hđeh mâo klei hdĭp dleh dlan, hdră anăn srăng mâo hlăm jih mlan 4 anei leh anăn hlăm wưng kơ anăp.

Ba hdruôm hră truh kơ kngan phung hđeh sang hră krĭng taih kbưi jing sa hlăm dŭm mta bruă êdah êdi mơ̆ng Êpul phung čih klei yăl dliê Dak Lak sa ai hŏng hruê hdruôm hră leh anăn dhar kreh dlăng hră thŭn anei. Niê Thanh Mai, Khua kiă kriê êpul hgŭm brei thâo, mâo klei dưi mơ̆ng Êpul hgŭm phung čih klei yăl dliê Việt Nam, Êpul hgŭm phung čih klei yăl dliê Dak Lak mđup brei leh dŭm êtuh pŏk hdruôm hră hlăm hdră “Mđup brei hdruôm hră čih klei yăl dliê kơ phung hđeh krĭng taih kbưi” leh anăn mkŏ mjing lu mta bruă mjĕ êrô, bi tuôm hŏng phung čih hră. Niê Thanh Mai hmăng hmưi, hluê anăn srăng mâo klei jĕ hĭn leh anăn mâo lu hdruôm hră hĭn, mơ̆ng anăn srăng mkăp mmông lu hĭn kơ klei dlăng hră, ksiêm duah kơ grăp pŏk hră.

 Ba hdruôm hră truh kơ krĭng taih kbưi leh anăn mâo dŭm mta bruă mđup brei hdruôm hră ăt msĕ hŏng dŭm mta bruă mkăn čiăng bi lar klei khăp kơ hdruôm hră kơ phung hđeh sang hră krĭng taih kbưi. Boh nik thŭn anei hŏng hdră mđup brei hdruôm hră kơ phung hđeh krĭng taih kbưi, krĭng mnuih djuê ƀiă, Êpul hgŭm phung čih klei yăl dliê Việt Nam mđup brei 4.000 pŏk hdruôm hră kơ čar Dak Lak leh anăn mbĭt hŏng Êpul hgŭm phung čih klei yăl dliê Dak Lak nao truh ti dŭm sang hră ti lu kdriêk, boh nik mđing kơ dŭm sang hră hlăm ƀuôn mâo phung hđeh sang hră mnuih djuê ƀiă.

Amâo djŏ knŏng sa ai hŏng hruê hdruôm hră leh anăn dhar kreh dlăng hră, bruă ma hdruôm hră truh kơ grăp sang hră, boh nik jing sang hră krĭng ktaih kbưi dôk mâo lu anôk bruă ti čar Dak Lak hluê ngă hŏng hdră sang dlăng hră thâo mđuê̆, kuič mngač klei thâo, Sang hră kêñ krô. Hluê anăn mđing truh kơ mta kñăm mtrŭt mjhar leh anăn mđĭ kyar dhar kreh dlăng hră hlăm yang ƀuôn, mkŏ mjing klei mưng dlăng hră, đru mđĭ kyar dhar kreh dlăng hră ƀrư̆ tŭ dưn leh anăn klă klơ̆ng hĭn.