Hlăm boh sang dlông ayŏng Y Wôn Knul (Ama Nhiên), ti ƀuôn Akŏ Dhông, ƀuôn prŏng Buôn Ama Thuôt, sa êpul êdam êra giăm pluh čô mnuih dôk hriăm tông kdrăp tông ayŭ djuê ana, tăp năng tông čing kram, čing knah, đa đa tông tơrưng, đa đa lŏ ayŭ đĭng buôt leh anăn mmuñ khan. Ayŏng Y Wôn Knul brei thâo, ƀrư̆ hruê mâo lu tuê hiu čhưn hriê ti Ƀuôn Ama Thuôt čiăng hmư̆ ênhiang mmuiñ djuê ana, ksiêm hriăm kơ dhar kreh djuê ana Êđê. Boh nik, hlăm knăm mơak kphê anăp truh, anôk bruă hiu čhưn ênguê mâo leh lu mmông mdah ti sang:

Mprăp kơ knăm mơak snăn ayŏng adei brei ăt mâo mmông čiăng lŏ dôk mbĭt yăl dliê, hriăm tông čing amâodah dŭm kdrăp tông ayŭ truh kơ klei mmuiñ kưt, khan, kơ kdrăp tông ayŭ ti Lăn Dap Kngư, kơ klei tông čing, tơrưng, đinh buôt, đinh năm, kưt, čiăng kơ ñu jăk hĭn, hưn mthâo, pô mpŭ kơ dhar kreh pô leh anăn pô ăt mpŭ kơ phung hmư̆ kơ klei anăn.

Jing anôk hiu čhưn ênguê dhar kreh jăk siam ti ƀuôn prŏng Ƀuôn Ama Thuôt, dŭm hruê anei, Ƀuôn Akŏ Dhông dôk dưi bi msiam lu klei jăk siam mprăp kơ bruă ngă hlăm knăm mơak. Mƀĭt hŏng mprăp anôk anơ̆ng kdrăp mnơ̆ng dôk jưh homestay leh anăn mnơ̆ng ƀơ̆ng, gŏ sang hlăm ƀuôn mkra pưk sang, sang dlông, bi msiam pưk sang, mnư̆ mnang, mdhă ktrâo lač đru kơ tue hiu čhưn găl ênưih hĭn hlăm hdră hiu čhưn hlăm ƀuôn. Amai H Tit Aliô, ti ƀuôn Akŏ Dhông kah mbha, gŏ sang ñu bi liê giăm 400 êklăk prăk mkra sang dlông gŏ sang pô, đru drông tue tơdah mâo êpul nao čhưn dlăng, huă mnăm. Amai H Tit Aliô brei thâo:

Knăm mơak anei ñu djŏ tuôm kơ amâo djŏ knŏng kphê ôh ƀiădah ñu lŏ jing dhar kreh mnuih Ê đê ti Ƀuôn Ama Thuôt anăn jing ƀuôn sang mơak mñai leh anăn hur har dôk čang guôn. Kâo ƀuh ƀuôn sang mơak mñai hĭn, dôk bi đru mjêč mprăp leh anăn pioh kơ yan Festival kphê anei. Ƀuôn sang mâo dŭm bruă ngă msĕ si čing čhar, mnơ̆ng ƀơ̆ng, dưi mnăm kphê amâo liê prăk. Hlăm ƀuôn snăn mâo dŭm gŏ sang msĕ si Eirei, Tăng Bi, sang čhĭ kphê Arul, Akŏ Dhông diñu ăt dôk mprăp mjêč kơ Festival tal anei.

Ti dŭm ƀuôn sang ti čar Dak Lak, mnuih ƀuôn sang ăt mâo lu mđing truh, bi lu jơr thiăm dhar kreh mơ̆ng knăm mơak kphê, msĕ si mkŏ mjing Hrue Dhar kreh - mjuăt ktang asei mlei dŭm djuê ana, mkŏ mjing kơ dŭm knăm mơak djuê ana msĕ si ngă yang tuh akŏ pin êa, ngă yang asei, knăm mơak êman, ngă yang asei kơ êman... Hlue si ayŏng Y Thiên Adrơ̆ng, khua sa anôk bruă hĭ čhưn ênguê ti ƀuôn prŏng Ƀuôn Ama Thuôt, ñu mkra mjing leh dŭm gưl hiu čhưn ênguê jiă kma dhar kreh ƀuôn sang čiăng kơ tue hiu čhưn mâo klei găl dưi hiu dlăng dhar kreh, bi tuôm hŏng mnuih ƀuôn sang- pô dhar kreh ti grăp boh ƀuôn.

Knăm mơak kphê Ƀuôn Ama Thuôt tal 8 anei mâo lu mnui ƀuôn sang ti Dak Lak dôk guôn. Hlăm ai êwa mơak mñai leh anăn ai êwa "Mlan tlâo Lăn Dap Kngư", dŭm ƀuôn sang mprăp hlai mbĭt čiăng mjibg sa gưl knăm mơak jiă kma knhuah kphê leh anăn lu jơr dhar kreh./.