Hlăm anăn, hlăm brô 12% jing phung tuê mơ̆ng ala tač êngao. Kluôm ênoh prăk hrui wĭt mơ̆ng bruă hiu čhưn ênguê mâo 824 êklai prăk, êgao êbeh 50 êklai prăk mkă hŏng hdră kčah thŭn 2022. Bruă hiu čhưn ênguê ti čar Dak Lak hnưm dưi krŭ wĭt leh Covid-19 dưi ksiêm dlăng. Phung tuê hiu čhưn ênguê kreh ruah dŭm anôk hiu čhưn ênguê mrâo, mâo lu klei mdê, kyuanăn srăng hriê ti dŭm anôk hiu čhưn ênguê ti čar Dak Lak. Aduôn Nguyễn Thụy Phương Hiếu – K’iăng khua knơ̆ng bruă Dhar kreh, mjuăt ktang asei mlei leh anăn hiu čhưn ênguê čar Dak Lak brei thâo, čar dôk mâo dŭm hdră êlan đru kơ dŭm êpul êya, grăp čô mđĭ kyar bruă hiu čhưn ênguê, hlăm anăn knăm kơ bruă hiu čhưn ênguê wăl mnơ̆ng hdĭp – yang ƀuôn hŏng bruă kriê pioh dhar kreh dŭm djuê ana.

Wưng thŭn 2021 – 2025, čar čuăn ruah duh bi liê kơ 5 ƀuôn mnuih djuê ƀiă, hŏng ênoh mơ̆ng 800 êklăk prăk truh kơ 1 êklai prăk čiăng mđĭ kyar bruă hiu čhưn ênguê:

“Hdră mtrŭn mrô 08 mơ̆ng Êpul gơ̆ng bruă ƀuôn sang čar Dak Lak mơ̆ng thŭn 2021 – 2025, hlăm 4 thŭn anei srăng đru kơ 5 ƀuôn mđĭ kyar bruă hiu čhưn ênguê. Bi hlăm hdră đru hluê si hdră mtrŭn mrô 08 mơ̆ng bruă Kƀĭn ala kơ bruă đru kơ mnuih djuê ƀiă hlăm wưng anei mâo hdră mrô 06 leh anăn čar Dak Lak đru leh kơ 2 ƀuôn jing ƀuôn Akŏ Dhông leh anăn Tơ̆ng Jŭ, leh anăn kơ hdră anei, knơ̆ng bruă mâo leh klei mă bruă hŏng dŭm ƀuôn čiăng ngă bruă mđĭ kyar bruă hiu čhưn ênguê dhar kreh yang ƀuôn.”