Ti gŭ ana kyâo prŏng ti pin êa, dŭm ƀĕ knang êa dôk đoh rôč, H’Djuôn Niê (amí Tuir), ti buôn Phơng, să Ea Tul, kdriêk Čư̆ Mgar, čar Dak Lak lŏ tui mmuiñ klei khan mrâo hriăm. Klei khan anei lač kơ Dăm Yi, hlăm anăn mâo lu kdrêč yăl dliê djŏ tuôm kơ pin êa ƀuôn Sah B, să Ea Tul ară anei. Kyua mrâo tui hriăm snăn ñu kreh lŏ bi hdơr nanai čiăng kơ tuič. Amĭ Tuir, brei thâo hlăk krah thŭn anei, ñu nao hlăm adŭ hriăm kơ klei yăl m mta klei muiñ khan anak Êđê pô, mâo klei hriăm kơ klei duê, bi mdjŏ hlăm klei muiñ khan. Êdei kơ 20 thŭn adŭ anei mâo lŏ mkŏ mjing, kyuanăn mơ̆ng leh hmư̆ hing bi hưn pŏk adŭ anei, ñu hơ̆k mơak nâo čih anăn hriăm:

 Asei mlei kâo pô wăt hlăm klei kdŏ, mmuiñ, kưt kâo nao hgŭm sơăi. Kyuanăn, leh mâo nao hriăm adŭ anei, kâo bŏ hŏng klei mơak, kâo ƀuăn srăng gĭrmơ̆ng ară anei srăng mtô bi hriăm kơ anak čô pô mgi dih, thaoa mơh kơ ya mta pô hriăm leh, čang hmăng srăng jing kdlưn hĭn kyua mâo hriăm djăp ênŭm hĭn. Wăt hlăm klei eirei, kưt, mmuiñ bi kmlah čiăng kơ jih jang phung hđeh bi kriê pioh.

Adŭ mtô bi hriăm klei muiñ khan mâo knơ̆ng bruă dhar kreh, mjuăt asei mlei, lehanăn hiu čhưn ênguê Daklak mkŏ mjing leh ti să Ea Tul dôk hlăm hdră kriê pioh, mđĭ bi lar knhuah gru dhar kreh amâo mâo êdah klă ti čar Daklak. Bruă anei mâo Anôk bruă hgŭm hŏng tač êngao čar Jeollabuk (Dhŭng Korea) đru.

Mâo leh truh 30 čô mnuih hriăm jing Êđê ti să Ea Tul nao hriăm, hriăm nanao 3 mlam hlăm sa hrue kăm. Nao mtô jing pô mbruă Y Dhin Niê (ama Ruin), ti buôn Triă, să Ea Tul lač: Asei ñu đĭ hriê kơ prŏng mơ̆ng adŭ mtô bi hriăm hlăk thŭn 2004 mâo pô mbruă jing Y Wang H Wing pô mtô bi hriăm. Mơ̆ng anăn truh kơ ară anei, ñu mâo klei găl đuĕ hiu hlăm djăp anôk mdah klei muiñ khan lehanăn hưn mdah dhar kreh djuê ana pô truh hŏng lu lăn čar. Ară aneimâo adu mtô bi hriăm, ñu lŏ mâo klei găl hĭn mtô jih klei pô thâo kơ mnuih ƀuôn sang čiăng hriăm, kñăm mđrăm mbĭt bi kriê pioh:

Asei mlei kâo čang hmăng kriê pioh kyuadah mâo leh dŭm gưl aê ama pô nao êlâo djă pioh. Kâo lŏ mtô bi hriăm klei khan Dăm Yi. Tơdah hlei pô čiăng lŏ hriăm, kâo srăng lŏ mtô bi hriăm. Kâo knŏng čang hmăng kơ diñu gĭr hriăm bi tuič, thâo lŏ bi hdơr nanao, bi kriê pioh, lehanăn đru lŏ mtô bi hriăm kơ mnuih mkăn hlei pô čiăng tui hriăm.

Mbĭt hŏng adŭ mtô bi hriăm klei muiñ khan ti să Ea Tul, boh nik mtô duê klei Êđê ăt mâo mkŏ mjing leh ti să Čuôr Dăng, kdriêk Čư̆ Mgar. Adŭ hriăm mâo 20 čô, lu jing mnuih Êđê ti să tui hriăm. Phung hriăm mâo leh phung mbruă lŏ mtô dŭm knhuah gru dhar kreh djuê ana pô, mtô bi hriăm klei thâo kưh khan, klei duê yua hlăm klei blŭ hlăm grăp hrue.  H’Tuyết Niê, ti ƀuôn Čuôr Dăng A, să Čuôr Dăng, kdriêk Čư̆ Mgar lač:

Mơ̆ng dŭm adŭ hriăm anei, kâo mâo hriăm lehanăn srăng lŏ mtô bi hriăm kơ phung gưl êdei čiăng kơ digơ̆ thâo săng hĭn kơ dŭm klei Kưt, Ay-ray anei pioh kơ phung hđeh thâo kơ dhar kreh aê ama pô đưm, amâo mâo lui, amâo mâo wơr ôh knhuah gru klei bhiăn anak Êđê.

Mbĭt hŏng dŭm boh adŭ mtô bi hriăm klei khan klei duê Êđê, Knơ̆ng bruă dhar kreh, mjuăt asei mlei, lehanăn hiu čhưn ênguê Daklak lŏ pŏk adŭ mtô tông čing Arap mbĭt hŏng kdŏ čhuang mnuih Jrai ti să Ea Sol, kdriêk Ea H’leo; mbha čing lehanăn kdrăp čŭt h’ô djuê ana pô kơ êpul tông čing, êpul kdŏ mmuiñ. Knơ̆ng bruă nao ksiêm, tui duah dŭm ênhiang tông čing, klei blŭ duê anak Êđê čiăng čih pioh, mjing hdruôm hră. Lại Đức Đại, K’iăng khua knơ̆ng bruă dhar kreh, mjuăt asei mlei, hiu čhưn ênguê Daklak lač, mâo klei đru mơ̆ng anôk bruă hgŭm hŏng tač êngao čar Jeollabuk (Dhŭng korea), jih jang bruă kriê pioh dhar kreh ti alŭ wăl mâo ngă leh hŏng klei kjăp, tŭ jing. Anei ăt jing thŭn tal 2 čar Jeollabuk đru kơ čar Daklak, hŏng ênoh bi liê đĭ leh truh 55 êbâo USD.

Čar Jeollabuk bi mni êdi klei thâo bi mguôp mơ̆ng čar Daklak lehanăn diñu lŏ mđĭ ênoh đru. Knư̆ hrue knư̆ diñu ƀuh klei đru anăn ba wĭt leh klei tŭ dưn êdi hlăm klei hdĭp mda yang ƀuôn, hlăm klei bi kriê pioh knhuah gru dhar kreh amâo mâo êdah klă jing čing čhar, lehanăn lu knhuah gru mkăn. Mơ̆ng klei čar Jeollabuk đru snăn hmei mâo bruă klam bi kriê pioh bi jăk hĭn, mâo klei mdidng hĭn. Ala čar mah jiăng pô mâo leh ai tiê đru hlăm bruă bi kriê pioh, snăn pô msĕ mơh gĭr jih ai tiê yơh, ngă lu hĭn mơ̆ng 2 - 3 blư̆ mkă hŏng êlâo dih, brei bi gĭr yơh.

Čar Daklak mâo leh 3 knhuah gru dhar kreh amâo mâo êdah klă jing klei muiñ   Êđê mâo tŭ yap hlăk thŭn 2014; klei duê Êđê lehanăn klei mơak hdĭp jŏk mnuih M'nông mâo tŭ yap thŭn 2022. Hŏng dŭm boh adŭ mtô bi hriăm mâo pŏk, srăng đru jăk hĭn pioh   hĭn boh tŭ dưn bi kriê pioh dŭm knhuah gru dhar kreh anei hlăm wưng tinăp./.