Akŏ thŭn anei, Ti sang rang mdah hƀuê ênuk čar Dak Lak, ƀuôn prŏng Ƀuôn Ama Thuôt mkŏ mjing klei rang mdah mâo akŏ “Trường Sa – anôk akŏ êa poh yă”. Klei rang mdah mâo giăm 100 pŏk rup kơ dŭm mta bruă bi hriăm mprăp klei kdơ̆ng mblah leh anăn klei hdĭp aguah tlam mơ̆ng phung knuă druh, lĭng kahan leh anăn mnuih ƀuôn sang ti Plao ksĭ Trường Sa, rup bi hmô 21 plao ksĭ hlăm Plao ksĭ Trường Sa mbĭt hŏng dŭm mta mnơ̆ng msĕ si hla čhiămg gru lăn čar, hla čhiăm gru kahan êa yang ƀuôn Việt Nam, mnơ̆ng dhơ̆ng mkra mơ̆ng hruh ƀriăng, hruh tuôr mơ̆ng phung lĭng kahan ti plao ksĭ Trường Sa čŏng ngă mă. Hlăm hdră lŏ mdah 5 hlâo film Klei čih – hră mơar kơ Trường Sa.

          Klei rang mdah iêo jak lu mnuih ƀuôn sang leh anăn phung tuê nao čuă dlăng. Tôn Thất Tuấn Ninh, ti kdriêk Lak, čar Dak Lak brei thâo, dŭm mta mnơ̆ng rang mdah hâo hưn lu jơr, jĕ giăm, klă sĭt kơ plao ksĭ Trường Sa lu tĭng leh anăn bŏ hŏng ai hdĭp.

          "Ti Lăn Dap Kngư, hlăm anăn mâo čar Dak Lak, gưl tal êlâo kâo dưi nao hgŭm čuă dlăng klei rang mdah dưi hưn kơ klei hdĭp leh anăn bruă knuă mơ̆ng phung lĭng kahan ti plao ksĭ Trường Sa, čiăng kơ mnuih ƀuôn sang Lăn Dap Kngư dưi thâo klă klei hdĭp ti anôk akŏ êa poh yă mơ̆ng lăn čar.”

Amâo djŏ knŏng ti ƀuôn prŏng Ƀuôn Ama Thuôt, mơ̆ng thŭn 2014 truh kơ ară anei, Knơ̆ng bruă klei mrâo leh anăn hâo hưn čar Dak Lak mkŏ mjing leh lu bruă hâo hưn kơ bruă răng mgang klei dưi kiă kriê Plao ksĭ. Hlăm anăn mâo klei hiu rang mdah “Hoàng Sa, Trường Sa jing dŏ Việt Nam - dŭm mta mnơ̆ng bi klă hƀuê ênuk leh anăn hdră bhiăn” ti dŭm kdriêk: Mdrak, Ea Kar, Ea Sup, Krông Bông, Ea H’Leo, Čư̆ Kuiñ leh anăn wăl krah Ƀuôn Hồ. Hlăm grăp anôk rang mdah hră hưn anôk leh anăn hră mơar jing mnơ̆ng bi klă hƀuê ênuk leh anăn tur knơ̆ng hdră bhiăn bi klă klei dưi kiă kriê mơ̆ng Việt Nam hŏng 2 plao ksĭ Hoàng Sa leh anăn Trường Sa ti ksĭ Ngŏ. Dŭm mta hră mơar dưi čih yap mơ̆ng lu phŭn hră mơar hƀuê ênuk mơ̆ng Việt Nam leh anăn dŭm lăn čar, boh nik jing dŭm hră mơar, hră ktrâo anôk dưi čih kač, kđăm mkra mơ̆ng ênuk gưl 16 truh kơ ară anei ti Việt Nam leh anăn lu lăn čar tar rŏng lăn.

Nguyễn Quốc Hiệp, K’iăng khua kiă kriê knơ̆ng bruă klei mrâo leh anăn hâo hưn čar Dak Lak, Khua êpul mkŏ klei rang mdah brei thâo: Dŭm mta hră mơar leh anăn giăm 100 hră ktrâo anôk dưi rang mdah jing bi kƀĭn dŭm hră mơar dưi bi klă mơ̆ng êlâo truh kơ ară anei hlăm lăn čar leh anăn tar rŏng lăn, mñă klă bruă mkŏ mjing, hluê ngă leh anăn răng mgang klei dưi kiă kriê mơ̆ng Việt Nam hŏng 2 plao ksĭ Hoàng Sa leh anăn Trường Sa. Hlăm grăp gưl rang mdah dưi iêo jak dŭm êbâo gưl čô mnuih ƀuôn sang nao čuă dlăng, ksiêm hriăm.

"Mơ̆ng klei rang mdah mâo đru mguôp leh yuôm bhăn čiăng mđĭ klei thâo săng, klei đua klam mơ̆ng grăp čô knuă druh, đảng viên lehanăn jih jang mnuih ƀuôn sang Việt Nam msĕ mơh, dưi bi mguôp leh jăk hlăm bruă răng mgang klei dưi êngiê êa ksĭ, plao ksĭ lăn čar, lehanăn ngă jăk 2 bruă čuăn hdră êlan jing rŭ mdơ̆ng lehanăn răng mgang lăn čar”.

Bruă hâo hưn kơ klei dưi kiă kriê Plao ksĭ lŏ mâo dŭm alŭ wăl ti čar Dak Lak hluê ngă leh anăn bi lar truh kơ phung nai leh anăn hđeh sang hră hlăm dŭm sang hră. Ti wăl krah Ƀuôn Hồ, klei bi lông “Adei khăp kơ êa ksĭ, Plao ksĭ Việt Nam” dưi mkŏ mjing ti knhal jih thŭn 2023 hluê si hdră anôk kdŏ mmuñ kơ dŭm sang hră gưl 2. Hlăm klei bi lông, wăt phung nai leh anăn phung hriăm mâo klei mprăp klă nik, ksiêm hriăm êlam hĭn kơ klei dưi kiă kriê Plao ksĭ lăn čar, mơ̆ng anăn bi êdah klei mbruă hlăm klei bi lông hlak mblang, klei thâo leh anăn klei hlăp gưt hâo hưn.

Nai H’Bhai Mlô, sang hră gưl dua Trần Phú, ƀuôn hgŭm Đoàn Kết, wăl krah Ƀuôn Hồ brei thâo: Klei bi lông amâo djŏ knŏng mkŏ mjing anôk hlăp lêñ jăk ƀiădah lŏ mđĭ hĭn klei thâo mơ̆ng phung nai leh anăn hđeh sang hră kơ Plao ksĭ Việt Nam, mơ̆ng anăn ksul mbŭ, rông ba klei khăp čiăng hŏng ƀuôn sang, lăn čar.

"Brei kơ phung hđeh dưi nao jĕ hnưm hĭn hŏng boh tŭ yuôm plao ksĭ, hƀuê ênuk dŭm gưl ayŏng ama săn asei hlăm dŭm gưl bi blah răng mgang plao ksĭ. Čiăng kơ phung hđeh nao jĕ hnưm, mơ̆ng anăn mâo klei thâo klă kơ boh tŭ yuôm êa ksĭ, plao ksĭ mơ̆ng lăn čar pô. Phung hđeh sang hră ăt hur har ksiêm hriăm leh anăn čŏng pô tui duah dŭm klei êmuh, dŭm klei hriăm kơ êa ksĭ, plao ksĭ”.

Bi hŏng adei Trần Nguyễn Đăng Khoa, hđeh sang hră adŭ 11A11, sang hră gưl tlâo Y-Jut, să Ea Bhôk, kdriêk Čư̆ Kuiñ, čar Dak Lak, kyua mâo klei khăp sơnăn yơh ñu kreh ksiêm hriăm kơ klei hưn, dlăng video clip kơ plao ksĭ hlăm internet, đru kơ adei thâo săng klă hĭn kơ boh tŭ yuôm mơ̆ng plao ksĭ lăn čar:

"Hŏng kâo jing sa čô hđeh sang hră čiăng gĭr ktưn hriăm thâo hĭn, hur har hâo hưn truh kơ grăp čô kơ klei dưi kiă kriê êa ksĭ, plao ksĭ mơ̆ng Việt Nam. Klei hmăng hmưi mơ̆ng kâo jing sa čô kahan êa, kyuadah plao ksĭ jing sa kdrêč kđeh êrah mơ̆ng drei, jing pô răng mgang ñu, anăn jing bruă klam yuôm bhăn êdi./.