Hlue si klei hưn mdah mơ̆ng Anôk bruă hiu čhưn ênguê leh anăn sang jưh Biệt Điện (ti ƀuôn prŏng Ƀuôn Ama Thuôt, Dak Lak), mơ̆ng 10/2, anôk bruă klă sĭt mdei bruă đĭ êman ti wăl hiu čhưn ênguê Kban Yuôl Ƀuôn Đon ti să Krông Ana, kdriêk Ƀuôn Đon; hrô kơ mnơ̆ng dhơ̆ng hiu čhưn jiă kma dhar kreh alŭ wăl mguôp hŏng dŭm bruă hiu čhưn jăk kơ êman msĕ si brei êman hlăp lêñ hŏng tuê hiu čhưn.

Ăt djŏ tuôm kơ hdră anei, hlăm hdră Knăm mơak Êman Ƀuôn Đon - sa hlăm dŭm bruă ngă phŭn hlăm Knăm mơak Kphê Ƀuôn Ama Thuôt tal 8, thŭn 2023 mkŏ  mjing hlăm mlan 3 kơ anăp ti Dak Lak, srăng amâo mâo ôh dŭm bruă msĕ si: êman bi lông êran, bi lông luê êa, bi lông čưng boh, bi lông ktŭng klei êman hŏng mnuih. Hrô kơ anăn srăng mâo dŭm boh phŭn msĕ si: Ngă yang asei kơ êman, brei êman nao hlăm klei huă čhưn, bi msiam êman, êman bi lông kkuh kơ phung tuê, brei êman mă rup hŏng tuê hiu čhưn…