Aguah mbruê 12/3, ti wăl krah Liên Sơn, kdriêk Lak, čar Dak Lak mkŏ mjing knăm bi lông waih mran ti ênao Lak gưl tal 3 thŭn 2023. Anei jing sa hlăm 18 mta bruă phŭn hlăm knăm mơak kphê Ƀuôn Ama Thuôt gưl tal 8 thŭn 2023 dôk mkŏ mjing ti čar Dak Lak. Klei bi lông mran gưl anei mâo 5 anôk bruă nao hgŭm hŏng 86 čô bi lông mơ̆ng dŭm să, wăl krah leh anăn anôk bruă hiu čhưn ênguê ti kdriêk Lăk. Phung bi lông hlăm 3 mta: bi lông waih mran 4 čô, bi lông mran 3 čô waih leh anăn 2 čô waih. Grăp klei bi lông mâo boh taih 300m. Bi ruê̆ klei bi lông, Êpuol mkŏ mjing mđup brei 2 klei pah mni mrô 1, 3 klei pah mni mrô 2 leh anăn 6 klei pah mni mđĭ ai kơ dŭm mta bi lông.

Êpul bi lông mơ̆ng wăl krah Liên Sơn mâo klei pah mni mrô 1 kluôm êpul. Hluê si êpul mkŏ mjing, klei bi lông waih mran tal anei lŏ dơ̆ng bi klă klei mlih mrâo hlăm bruă kriê pioh leh anăn bi lar knhuah dhar kreh dŭm djuê ana ti alŭ wăl, ba dhar kreh anăn lŏ wĭt hŏng klei hdĭp čiăng đru kơ mnuih ƀuôn sang leh anăn phung tuê. Mbĭt hŏng klei bi lông mran, dŭm hruê êgao ti alŭ wăl kdriêk Lak ăt mâo lu mta bruă bŏ hŏng knhuah dhar kreh djuê ana msĕ si: ngă yang pin êa, ngă yang klei suaih pral êman, tông čĭng, pơ̆ng nưh leh anăn rang mdah mnơ̆ng dhơ̆ng djuê ana.

Ti anôk bruă dhar kreh Ƀuôn Đon, să Krông Ana, kdriêk Ƀuôn Đon, čar Dak Lak, mkŏ mjing knăm mơak êman Ƀuôn Đon. Klei jăk siam anei iêô jak dŭm êbâo čô mnuih alŭ wăl hlăm ala čar leh anăn ala tač êngao nao hgŭm. Nao bi lông hlăm knăm anei mâo 7 drei êman mơ̆ng dŭm anôk bruă hiu čhưn ênguê, gŏ sang ti kdriêk Ƀuôn Đon.

Knăm  mơak êman Ƀuôn Đon thŭn anei amâo mâo ôh dŭm bruă ngă msĕ si: êman bi lông êran, bi lông čưng boh, đĭ êman găn êa krông Sêrêpok; hrô kơ anăn mâo klei hiu čhưn ênguê jĕ giăm hŏng êman mâo knơ̆ng bruă hiu čhưn ênguê dlông rŏng lăn ba yua msĕ si: Bi lông bi msiam kơ êman, êman kkuh kơ tuê siam hĭn, êman ƀơ̆ng buffet, mă ruo hŏng tue. Mjưh ruê̆ klei bi lông, êman Khăm Sing mơ̆ng pô mgăt êman Y Wưn Ƀuôn Yă mâo klei oah mni mrô sa hlăm klei bi msiam kơ êman. Êngao anăn, Anôk bruă mkŏ mjing lŏ mđup brei kơ phung mgăt êman leh anăn êman lu klei pah mni mkăn.

Ti wăl anôk hiu čhưn ênguê yang ƀuôn Kŏ Tam, ƀuôn prŏng Ƀuôn Ama Thuôt, Êpul mkŏ mjing knăm mơak kphê Ƀuôn Ama Thuôt mkŏ mjing klei bi lông krah rup, mkra mjing mnơ̆ng dhơ̆ng mơ̆ng ana kphê. Klei bi lông anei iêo jak 53 čô thâo mbruă hriê mơ̆ng dŭm čar, ƀuôn prŏng hlăm čar Dak Lak leh anăn dŭm čar Dak Nông, Gia Lai, Kon Tum leh anăn Lâm Đồng nao hgŭm. Hlăm 3 hruê, phung bi lông mkăp leh mmông leh anăn ai tiê čiăng mkra mjing dŭm mta mnơ̆ng hŏng dŭm akŏ kơ klei hdĭp grăp hruê mơ̆ng dŭm djuê ana krĭng Lăn Dăp Kngư, răng mgang wăl hdĭp mda, hlô mnơ̆ng yuôm bhăn, klei hmăng hmưi kpưn đĭ, mđĭ boh tŭ mơ̆ng kphê leh anăn dŭm mta mnơ̆ng bi siam hlăm klei hdĭp. Ruê̆ klei bi lông, Êpul mkŏ mjing mđup brei 1 klei pah mni mrô 1, 2 klei pah mni mrô 2, 3 klei pah mni mrô 3, 5 klei pah mni mđĭ ai kơ 11 čô bi lông, mđup brei klei pah mni mơ̆ng anôk bruă đru kơ 15 klei bi lông, mđup brei hră tŭ yap kơ phung thâo mbruă nao hlăm klei bi lông.