Hruê knăm anei hŏng mta kñăm tŭ drông klei bi hdơr 133 thŭn hruê k’kiêng khua gĭt gai Hồ Chí Minh 19/5. Nao hgŭm hlăm hruê knăm mâo êbeh 400 čô thâo mbruă, phung kdŏ mmuñ leh anăn phung bi lông dŭm djuê ana dôk hdĭp mda ti dŭm să, wăl krah hlăm kdriêk. Mkŏ mjing hlăm 2 hruê 9 -10/5, hruê knăm mâo lu mta bruă msĕ si: mkŏ wĭt dŭm klei ngă yang mơ̆ng dŭm djuê ana ti alŭ wăl kdriêk, tông čing leh anăn kdrăp pĕ tông djuê ana, klei bi hmô sang krum leh anăn rang mdah mnơ̆ng dhơ̆ng phŭn ti alŭ wăl.

Bi lông gơ̆ng ngă yang leh anăn dŭm mta mjuăt asei mlei djuê ana. Bi lông kdrăp čŭt hơô djuê ana, bi lông tŭk knă leh anăn dŭm klei hlăp đưm.

Pô thâo mbruă Y Ân, mnuih Mnông ti alŭ Phú Lợi, să Quảng Phú, kdriêk Krông Knô, čar Dak Nông brei thâo, bruă mkŏ mjing hruê knăm anei srăng đru mkŏ mjing, răng mgang leh anăn bi lar knhuah gru dhar kreh djuê ana mơ̆ng êpul êya dŭm djuê ana ti alŭ wăl kdriêk.