Knơ̆ng bruă sang čư̆ êa čar Daklak mrâo mâo leh hdră êlan brei ƀuôn prŏng ƀuôn Ama Thuôt ngă anôk bi hmô êlan êbat jơ̆ng lehanăn êlan đĭ êdeh wai hlăm ƀuôn prŏng. Bruă anei mâo klei čang hmăng srăng mjing djăp klei găl kơ sa anôk yang ƀuôn hdĭp jăk ba klei tŭ dưn kơ ƀuôn sang. Hlue anăn, alŭ wăl anei srăng mkra ti êlan Phan Đình Giót (kdrêč mơ̆ng êlan Lê Duẩn truh kơ êlan Lê Hồng Phong).

 Ktuê êlan êbat jơ̆ng anei srăng dăp čhĭ lu mnơ̆ng bi msiam, mnơ̆ng pioh bi hdơr, lehanăn lu mta mnơ̆ng ƀơ̆ng mơ̆ng lăn dap kngư. Bi hŏng mnuih đĭ êdeh wai srăng dăp mâo 20 anôk hlăm alŭ wăl lu mnuih, ti krah sang mnia, dŭm anôk dhar kreh hiu čhưn ênguê, dŭm kdrŭn êdeh buit. Ênoh bi liê jih bruă anei srăng mâo bruă yang ƀuôn bi mkrum./.