Drei mrâo hmư̆ leh pô mbruă Y-Djoan Mjâo 64 thŭn, ti ƀuôn Wiâo, să Ea Hồ, kdriêk Krông H’Năng, čar Daklak ayŭ đĭng tartar. Đĭng tarta dưi mkra mơ̆ng đĭng đrao, kčao mâo 3 ƀăng, ti akŏ mâo êlah msĕ hŏng êlah mnŭ, dưi mtuôp hŏng boh giêt. Y-Djoan Mjâo brei thâo: “Ruah đĭng đrao êjăng, sa boh giêt krô, hlĭn pioh mkra mjing đĭng tarta. Mâo đrao êjăng kơh srăng thâo mkra ênai siam. Mâo hlĭn pioh mƀlir, êwa amâo mâo kbiă kơ tač ôh. Đĭng tartar msĕ hŏng Buôt Chok kreh ayŭ êjai mmuiñ kưt mdê hŏng đĭng năm jing ayŭ pioh mñê eirei. Anei jing sa ngăn dưn yuôm bhăn mơ̆ng aê ama pô”.

Čiăng dưi mâo mkra sa boh đĭng taktar snăn boh giêt krô leh wĭt pĕ mơ̆ng hma ƀhu hĕ hlăm mđiă mâo 6 mlan, yuôl dlông pra pui mâo sa thŭn, čiăng dưi mâo êa jŭ ƀlĭp. Leh kơ anăn kčao 3 bĭt ƀăng ti mbah lehanăn ti asei boh giêt, leh kơ anăn kơh mtuôp hŏng đĭng đrao, yua hlin mƀlir jŭm tơdah êjai ayŭ hlăm êlah dưi mkra hŏng asăl đrao ktiêt ti mbah boh giêt snăn srăng kbiă hriê sa ênai mñê ktang đăng mdê mdê. Y-Djoan Mjâo brei thâo: Mkra kdrăp ayŭ anei brei mâo klei thâo mdjĕ, lehanăn ngă hŏng klei mbruă: “Čiăng dưi mâo ênai mơ̆ng đĭng taktar, grăp mlan lŏ mă lông ayŭ hĕ ƀiă êdi sa blư̆. Leh drei ayŭ lŏyuôl pioh hĕ bi jăk. jih jang mnuih dưi thâo mkra sơăi đĭng taktar, amâo mâo guôn mduôn khua amâodah hđeh êlăk ôh hlei pô êmăt ală mta, mbruă hĕ ƀiă srăng thâo yơh mkra”.

Ênai đĭng taktar jing mngač đăng snăn kreh ayŭ hlăm aguah ưm čiăng êrâo jih jang mnuih kgŭ ưm nao kơ pưk kơ hma. Mơ̆ng đưm leh, đĭng taktar ba yua hlăm dŭm knăm hơ̆k mơak, êjai adiê mngač mlan. Phung mduôn khua khăp dôk ayŭ đĭng taktar êjai mmuiñ êjai kñăm pioh mtô mtă kơ anak čô, lehanăn bi êdah ai tiê pô hlăm klei blŭ tlao nao hriê hŏng jih jang mnuih, mâo klei hlăp mbul, kñăm mđĭ ai bi hrŏ klei ênguôt hnĭng. Y-Djoan Mjâo, lŏ brei thâo, ênai đĭng taktar ñu mngač đăng, lehanăn ktang mơh, snăn đru bi êrâo phung ƀuôn sang kgŭ aguah ưm nao kơ pưk kơ hma, lehanăn ăt mâo mơh ayŭ mjum anak hŏng ênai êdu êun nao hlăm klei pĭt đih: “Hlăm grăp aguah ưm, leh mâo mnŭ kdjô̆, hlăm brô 3 – 4h aguah, amĭ kgŭ tăp, ama amâodah aê pai mă yơh đĭng taktar ayŭ mjum anak, mjum čô pĭt đih. Kyuanăn mơ̆ng đưm adih anak Êđê kreh tăp mdiê hlăm aguah ưm”.

Nanao hlue thŭn mlan hdĭp mda duah ƀơ̆ng hlŏng mjing hĕ kơ sa dhar kreh jăk siam mơ̆ng anak Êđê hlăk hlê dơ̆ng luič ram. Phung mbruă dôk bi hnĭng kơ dŭm ênai kwang mơ̆ng djăp kdrăp pĕ tông lehanăn ayŭ djuê ana pô, kčŭt ai tiê kyua đĭng năm, đĭng buôt, đĭng tŭt, ênai čing čhar... hlăk hlê ƀrư̆ ƀrư̆ dơ̆ng luič ram. Mbĭt hŏng klei khăp, klei hur har mơ̆ng phung mbruă thŭn leh khua mta mmăt, snăn anôk bruă dhar kreh năng bi mâo mtam dŭm hdră êlan mă bruă klă mngač, hŏng klei tŭ jing kñăm bi kriê pioh, mđĭ bi lar klei tŭ dưn knhuah gru dhar kreh djuê ana pô, hlăm anăn mâo djăp mta kdrăp pĕ ayŭ lehanăn tông mơ̆ng anak Êđê knư̆ hrue knư̆ srăng lŏ lar bra./.