Djam kpŭng ktơr (Trau pai) mnuih Mnông ti Ƀuôn Đon dưi mkra mjing mơ̆ng dŭm mta mnơ̆ng mâo hlăm pưk hma. Čiăng dưi tŭk djam kpŭng jăk, amâo djŏ knŏng mprăp djăp mta mnơ̆ng ôh, ƀiădah lŏ kyua klei thâo tŭk mơ̆ng grăp čô mnuih. Mta phŭn mâo: êbŭng msăm, êsŭn, kpŭng ktơr, kpŭng braih leh anăn dŭm mta mnơ̆ng bi mƀăt msĕ si hra, bột ngọt. Êbŭng bi mđam msăm, kpŭng braih jing mta phŭn amâo dưi kƀah ôh tơdah tŭk djam anei. Phung mniê Mnông tlê kpŭng braih jing sa mta hlăm dŭm mta pioh tŭk djam kpŭng anei.

 Tal êlâo, diñu tram braih hlăm êan mơ̆ng 30 truh 1mmông. Leh braih êun snăn bi thu êa, dưm hlăm êsŭng tlê bi lik. Ară anei dưi mơh ba bi lik hŏng masin, ƀiădah čŏng tlê braih srăng ƀâo mngưi mmih hĭn. Amai H’Nụ Budam, Ƀuôn Ea Rông, să Krông Ana, kdriêk Ƀuôn Đon, čar Dak Lak brei thâo, klei yuôm bhăn tơdah tŭk djam anei jing klei tuh êa braih hlăm gŏ kar kngan bi mdrăng čiăng mjing klei jăk kơ djam leh anăn jhar pui man dưn čiăng djam ksă mdrăng.

“Djam pŭng jăk leh anăn ênưih tŭk jing mta djam ti ƀuôn sang hmei, kyua dưi mkra mjing mơ̆ng êbŭng, ktơr, êsŭn mprăp êlâo. Djam anei tŭk êbŭng, ktơr êlâo, leh anăn pô dưm kpŭng braih kar leh êa dưm leh anăn bi mƀăt bi djŏ guôp kơ grăp čô hlăm gŏ sang, mduôn, hđeh dưi ƀơ̆ng sơăi kyua mâo mta tŭ jăk kơ asei mlei.”          

Tơdah ƀơ̆ng djam anei mâo mnâo ƀâo mngưi leh anăn jăk. Djam anei dưi ƀơ̆ng hrô kơ êsei amâodah huă hŏng êsei. Lu mnuih khăp djam anei kyua mâo mta mmoih, ƀâo mngưi mơ̆ng ktơr, msăm mơ̆ng êbŭng mguôp hŏng êsei êun jăk snak. Djam anei mâo mnơ̆ng tŭ jăk leh anăn jăk kơ tian prôč anăn khua mduôn, hđeh kjăp sơăi.

 Lu mnuih Mnông thâo tŭk leh anăn dlăng anei jing sa hlăm dŭm mta djam jăk djuê ana pô. Anei jing djam amâo dưi kƀah ôh hlăm klei huă čhưn mơak, bi kuôl, djiê brŭ hlăm ƀuôn sang, mâo mnuih ƀuôn sang tŭk hlăm dŭm knăm mơak drông phung tuê taih kbưi thâo kơ dhar kreh mnuih Mnông. Amai H’Nụ Buda, ƀuôn Ea Rông, să Krông Ana, kdriêk Ƀuôn Đon, čar Dak Lak brei thâo:

            “Tinei hmei ƀŏng djam anei grăp hruê amâodah mâo klei hưa mnăm, sitôhmô klei bi kuôl ung mô̆, gŏ sang mâo klei djiê brŭ snăn djam anei jing djam phŭn mnuih Mnông, Djam kpŭng anei dưi yua grăp hruê hlăm gŏ sang leh anăn ăt dưi tŭk drông kơ tuê hlăm êpul êya.”

 Ară anei, klei hdĭp mnuih Mnông đĭ kyar hĭn ƀiădah djam kpŭng ktơr amâo dưi kƀah ôh hlăm klei huă ƀơ̆ng grăp hruê. Sa mta djam amâo mkra mjing dleh ôh ƀiădah jiă mnâo ƀâo mngưi, jăk snăk ngă kơ hlei pô tuôm lông ƀơ̆ng mnơ̆ng ƀơ̆ng jăk mnuih Mnông ti Ƀuôn Đon srăng khăp hĭn kơ dhar kreh leh anăn anak mnuih tinei./.