Djam pung jing djam ƀơ̆ng amâo mâo dưi kƀah ôh hlăm mnuih djuê ana Sedang , boh nik hlăm dŭm knăm prŏng. Y Num, ti ƀuôn Ea Mao, ƀuôn hgŭm Tân Tiến (Daklak) lač:“Êlâo kơ mkŏ mjing klei đĭ êmuh, thâo dah bi kuôl ung mô̆ anak čô, jih gŏ sang, ayŏng adei, mnuih riêng gah sa ai tiê bi đru. Mnuih nao hlăm dliê nao hak juê mtei, mnuih nao čoh êbŭng, mnuih nao hak guôl hwiê, mnuih nao koh đĭng đrao thâodah m’ô… Grăp čô mâo bruă mdê mdê, lehanăn mđrăm mbĭt bi mkra mjing, tŭk knă. Klei bhiăn anei mâo leh mơ̆ng ênuk aê aduôn pô đưm, lehanăn truh kơ ară anei ăt adôk djă pioh”.

Jih jang mnơ̆ng mkra mjing mă mơ̆ng dliê sơăi, dơ̆ng mơ̆ng juê mtei, klĭt ana êmâo, ana truôl dliê, ana m'ô̆.., Mnuih Sedang tŭk djam bâo mâo mnâo ƀâo mngưi. Aduôn  Y Koh, ti ƀuôn Čư̆ Drăng, brei thâo, djam anei mĭn dah msĕ si ênưih, ƀiădah boh sĭt anei jing djam bi klin jih jang klei jăk thâo mkra mơ̆gn dŭm ênuk gưl mjing sa mta djam jăk. Sa blư̆ dôk huă mâo djam pŭng, trei tian, hŏng mnâo djam jăk mjing leh ai tiê klei khăp, bi mguôp mnuih hlăm sang.

“Čiăng mâo tŭk hĕ sa gŏ djam jăk ƀơ̆ng, hmei ruah braih mdiê hma, tăp hŏng êsŭng pô. Êjai anăn, mnuih nao hlăm dliê nao hak juê mtei, hak pôk kyâo, tlê bi ƀhĭ hŏng hbâo čuh leh mơ̆ng klĭt kyâo ana truôl dliê, ana êmâo… leh mâo djăp mnơ̆ng tŭk djam, snăn dơ̆ng tŭk yơh. Bi juê mtei tlê ƀhĭ êlâo leh anăn dưm hlăm gŏ êlâo, leh ksă leh ksă kơh dơ̆ng dưm kpŭng braih, kwă tar đăm brei ñu bi luôn klŏ ôh, leh kơ anăn dưm kđeh čĭm, kan amâodah klang čĭm tui si klei pô čiăng tŭk djam. Tơdah mâo kđeh čĭm mkrah êmă mbĭt jing jăk hĭn, drei đeh hĕ prăi bi ƀâo mngưi, leh kơ anăn lŏ dưm thiăm êa, juê mtei, knhal tuič jing kpŭng braih.”

Aduôn Y Rum, ăt dôk ti ƀuôn Čư̆ Drăng, ƀuôn hgŭm Tân Tiến (Daklak) lŏ brei thâo:“Čiăng kơ djam pŭng jăk leh tram braih hma hlăm dŭm pluh mnĭt, đăm drei kwă ôh hŏng masin kwă, ƀiădah tlê hŏng êsŭng drei pô, snăn kơh kpŭng jăk kdlik, jăk ƀâo mngưi, drei tŭk hĕ êa êlâo leh êa ktơ̆ng drei dưm yơh kđeh čĭm thâodah klang, gŏ djam lŏ dơ̆ng ktơ̆ng snăn kơh dri dơ̆ng dưm kpŭng ƀrư̆ ƀrư̆, kwă tar, djam srăng jăk amâo khiă tluôn gŏ.”

Ya ngă djam mtei juê mnuih djuê ana Sedang ƀơ̆ng jing jăk êdi? Aduôn Y Hrưp, ti ƀuôn Kon Wang, ƀuôn hgŭm Tân Tiến (Daklak) brei thâo:“Mnơ̆ng tŭk djam mă mơ̆ng dliê jing dŏ doh sơăi, amâo mâo êa dao hluăt . Ƀơ̆ng djam dliê, boh mơ̆ng dliê snăn mnuih ƀuôn sang hơĭt ai tiê hĭn. Čiăng dưi mâo nanao klei jăk anăn, klei tal êlâi jing amâo mâo bi rai dliê ôh. Êjai hiu pĕ djam, bi thâo ruah mkă hnơ̆ng man djăp, mkuôm pioh čiăng kơ ana kyâo dliê ăt mtah siam, kơ mgi dih pô lŏ hiu pĕ lŏ mâo djam doh.”

Amâo mâo djŏ knŏng jing djam ƀơ̆ng aguah tlam mlam hrue ôh, djam pŭng tŭk hŏng juê mtei lŏ jing djam kreh tŭk mkra hlăm grăp wưng tơdah ênŭm ênap găp djuê bi mâo bruă knuă yuôm bhăn, thâodah hlăm klei jum tue, klei bi êmuh, klei bi kuôl ung mô̆, wăt hlăm klei đĭ dôk sang mrâo... Aê A Jon, ti ƀuôn Čư̆ Drăng, ƀuôn hgŭm Tân Tiến (Daklak), lač:“Hlăm hrue bi êmuh ung mô̆ ară anei, anak čô, găp djuê bi hriê kuh kŭm ênŭm ênap. Grăp čô bi đru, mđrăm mbĭt mkra djam pŭng, lehanăn lu mta djam mơ̆ng djuê ana pô. Kyua hruê hơ̆k mơak, kyua klei thâo bi mguôp, drei sa ai tiê mkra čiăng kơ mnơ̆ng ƀơ̆ng huă drei mâo mnâo mnañ mơ̆ng čư̆ dliê drei pô”.

Hlăm sa boh sang điêt, ti kpur pui dôk trơ̆ng, hlăm grăp mngan djam pŭng mnâo bluh ƀâo mngưi bi dai ba mơ̆ng mduôn hlŏng kơ phung hđeh. Klei blŭ tlao mơak mñai, êjai dôk huă ƀơ̆ng hŏng mnâo ƀâo mngưi djam pŭng, ngă mđao tian, trei tian, lehanăn lŏ hyuă kjăp hĭn ai tiê klei khăp, klei thâo bi đru hlăm ƀuôn sang./.