Hlue si klei phung kreh knhâo ksiêm hriăm, ƀăng kơưp C3, C4 mâo mkŏ mjing djŏ tuôm hŏng klei čư̆ pui Čư̆ Bluk bluh sui hŏng anei hlăm brô 600.000 thŭn. Ƀăng kơưp C3, C4 bi hluh mbĭt, hŏng boh taih giăm 1000m. Dua ƀăng kơưp anei hlăm êpul ƀăng kơưp čư̆ pui dlông mâo boh taih kbưi hĭn hĭn ti Ngŏ Dhŭng Asi hŏng klei jing mdê hjăn leh anăn ênoh yuôm kơ klei ksiêm hriăm lu snăk.

Êlâo anăn, čar Dak Nông mkŏ mjing leh Knăm tŭ mă Mêdai dăp anăn Anôk kriê pioh mnơ̆ng dhơ̆ng ala čar ƀăng C6-1, hlăm lu ƀăng kơưp čư̆ pui ti Krông Knô. Ƀăng kơưp C6-1 dưi lač jing mnơ̆ng kriê pioh mâo mă hjăn păn sa anăn ti Việt Nam  leh anăn Ngŏ Dhŭng Asi. Anei amâo djŏ knŏng jing sa ƀăng kơưp čư̆ pui ôh ƀiădah lŏ jing anôk ksiêm dlăng kơ mnơ̆ng dhơ̆ng đưm, anôk ƀuh klang phung mnuih đưm hŏng lu tal dhar kreh sui hŏng ară anei mơ̆ng 6.000 thŭn.

Mơ̆ng klei ksiêm dlăng ti ƀăng kơưp čư̆ pui C6-1 leh anăn C6, phung ksiêm dlăng mnơ̆ng dhơ̆ng đưm ƀuh leh lu mta mnơ̆ng jing kdrăp mnơ̆ng pioh mă bruă hŏng boh tâo, leh anăn mnơ̆ng hŏng lăn čuh, gru klang hlô mnơ̆ng, kan hdang, gru kpur pui. Boh nik jing bruă ƀuh 3 anôk kriê pioh jing msat, gru klang 10 čô mnuih đưm. Bruă tal êlâo ƀuh klang phung đưm hlăm ƀăng kơưp čư̆ pui jing klei êdah kdlưn hlăm klei ksiêm hriăm kơ phung đưm.

 Hlăk akŏ thŭn anei, kdriêk Čư̆ Jut, čar Dak Nông mkŏ mjing Knăm tŭ mă Hră dăp anăn mnơ̆ng kriê pioh gưl čar hŏng Anôk kriê pioh hiu čhưn dlăng ƀăng kơup čư̆ pui Băng Mo, alŭ  4, wăl krah Ea Tling. Hlue si klei ksiêm hriăm mơ̆ng phung kreh knhâo, hlăm krĭng kdrăn ƀăng kơưp čư̆ pui kluôm rŏng lăn UNESCO Dak Nông mâo ƀiă êdi 5 ƀăng čư̆ pui, mâo: Čư̆ pui Nâm B’Lang, čư̆ pui Nâm Ka, čư̆ pui Nâm Gle (kdriêk Krông Knô), čư̆ pui Nâm Dơng leh anăn čư̆ pui Băng Mo (kdriêk Čư̆ Jŭt).

Čư̆ pui Băng Mo siam. Čư̆ pui mâo rup đuôn čôč êtlung ti krah, mbah mâo rup oval, hlăm mblah mâo rup knur leh anăn mâo êlan mđoh êa jing klei mdê hjăn bluh ti krah. Ênhă čuăl krĭng răng mgang anôk kriê pioh hlăm brô 13 ha.

 Bruă lu anôk dưi yap jing anôk kriê pioh ala čar, anôk kriê pioh gưl čar jing knhuang yuôm bhăn đru răng mgang, răng kriê leh anăn mđĭ lar ênoh yuôm mnơ̆ng kriê pioh, lu jơr mnơ̆ng dhơ̆ng hdĭp mơ̆ng Kdrăn ƀăng kơưp čư̆ pui kluôm rŏng lăn

UNESCO Dak Nông. Mơ̆ng anăn iêô jak klei găl bi liê hlăm bruă ba yua hơĭt kjăp kdrăn êa mơak anôk siam, mkŏ mjing mnơ̆ng dhơ̆ng hiu čhưn ênguê, đru mđĭ kyar bruă duh mkra- ala ƀuôn, mđĭ klei hdĭp mda mnuih ƀuôn sang./.