Krŭ wĭt pin êa, mkŏ mjing wăl anôk dhar kreh, sang dlông lehanăn sang mdah mnơ̆ng ti ƀuôn Kli A, ƀuôn hgŭm Đạt Hiếu wăl krah Ƀuôn Hô jing bruă ngă bi sĭt “Hdră kriê pioh lehanăn mđĭ lar knhuah dhar kreh djuê ana hlăm hdră mkŏ mkra lehanăn răng mgang ala čar”. Klei anei hĭn mơh jăk, bi ƀrơ̆k mdih ai tiê mpŭ, kriê pioh, răng mgang knhuah dhar kreh djuê ana hlăk Khua Anôk bruă sang čư̆ êa wăl krah Ƀuôn Hô mâo hră mơĭt: Mtrŭt mjhar êpul êya, mnuih myơr dŭm mta mnơ̆ng, pŏk rup, kdrăp hƀuê ênuk djŏ tuôm kơ hdră mkŏ mkra lehanăn mđĭ kyar wăl krah Ƀuôn Hô. Jih jang mnơ̆ng anei srăng ba jao kơ Sang rang mdah mnơ̆ng ti ƀuôn Kli A.

 “Kâo jing mnuih Êđê. Kâo brei sŭng tlê amrêč. Anei jing mnơ̆ng mâo mơ̆ng đưm, kreh yua hlăm klei hdĭp aguah tlam. Anei jing mnơ̆ng, aê kâo mơ̆ng đưm. Kâo čiăng dưm hlăm sang rang mdah čiăng jih jang mnuih ƀuh lehanăn hdơr nanao kơ dhar kreh djuê ana pô”.

Anei jing klei blŭ hrăm mơ̆ng Y Xuân Ayun, 71 thŭn, phung nai mtô leh wĭt mdei ară anei dôk hdĭp ti ƀuôn Kwăng, să Čư̆ Bao, Y Xuân brei thâo, hlăk dôk mtô, ñu kreh mtă kơ phung hriăm hră mnuih Êđê gĭr hriăm klei blŭ djuê ana pô. Anei jing klei čiăng thâo kơ dhar kreh mơ̆ng sa djuê ana. Năng ênguôt, ară anei lu mnuih dưi hriăm, jing knuă druh, ƀiădah diñu amâo thâo ôh klei blŭ amĭ kkiêng pô. Ăt ti ƀuôn Kwăng, să Čư̆ Bao, Y Khuê Ayŭn brei thâo: Êlâo adih, sang ñu mâo lu čing čeh. Ƀiădah đa ba čhi, đa brei kơ arăng leh. Ñu bi mĭn, Y Khuê ăt mâo dŭm mta mnơ̆ng djŏ si pô čiăng.

 “Kâo mđup brei êsŭng hlâo mkra hŏng kyâo. Kâo čang hmăng phung mda asei ƀuh srăng thâo săng klă hĭn kơ kdrăp mơ̆ng đưm aê aduôn pô. Êsŭng hlâo anei mâo mơ̆ng sui leh, hlăm brô 100 thŭn. Êsŭng hlâo anei mnuih Êđê kreh yua tăp mdiê, tlê kpŭng”.

      Amai H'Nghin Niê, Khua bruă Đảng ƀuôn Krưm B, să Čư̆ Bao brei thâo: Ti anôk bi kƀĭn bruă Đảng, phung đảng viên mnuih Êđê bi trông leh hur har lehanăn sa ai klei mĭn, ba jao dŭm mta mnơ̆ng mâo mơ̆ng djuê ana mơ̆ng đưm ăt jing sa hdră msir čiăng kơ dŭm mta mnơ̆ng anăn dưi kriê pioh kjăp hĭn. Hlăk dŭm mta mnơ̆ng pô myơr dưi rang mdah, mâo lu mnuih nao dlăng ăt jing klei ktưn hưn mơh.

 “Khua bruă Đảng mtrŭt mjhar phung đảng viên mđup brei dŭm mta mnơ̆ng anăn. Anăn jing dŭm mta mnơ̆ng bi mjĕ mjuk, hiu lua mnah, dŭm kdrăp tông ayŭ, čeh đưm, gŏ ƀŭng đưm pô kriê pioh čiăng kơ anak čô pô êdei anei dưi ƀuh, amâo wơr ôh kdrăp mnơ̆ng aê aduôn pô yua. Êlâo adih, sa boh gŏ ƀŭng amâo dah čeh đưm bi mlih hŏng 1 – 2 drei kbao mơh”.

Mâo leh 11 êpul, anôk bruă lehanăn 34 čô mnuih mđup brei 60 mta mnơ̆ng. Mơ̆ng mnơ̆ng bi mjĕ mjuk aguah tlam, kdrăp ngă bruă, hiu lua mnah truh kơ kdrăp tông ayŭ… hlăm anăn mâo lu mnơ̆ng yuôm msĕ si: Čeh, gŏ ƀŭng, čing đưm. Nguyễn Văn Tài, Khua Adŭ bruă Dhar kreh, hâo hưn lehanăn Mjuăt ktang asei mlei wăl krah Ƀuôn Hô brei thâo: Êpul dôk bi mklă wưng thŭn čiăng ngă hră mơar bi mklă dŭm mta mnơ̆ng anăn. 

Adŭ bruă Dhar kreh lehanăn hâo hưn tŭ mă mnơ̆ng mơ̆ng dŭm anôk bruă, êpul êya, phung knuă druh, mnuih mă bruă, grăp čô mnuih ƀuôn sang mơ̆ng êpul êya yang ƀuôn ba mđup brei čiăng kriê pioh lehanăn mâo hdră rang mdah.

Ƀri bi hdơr 134 thŭn Hruê kkiêng Khua gĭt gai Hồ Chí Minh hruê 19/5 leh êgao, Anôk kriê dlăng bruă Đảng wăl krah Ƀuôn Hô mkŏ mjing leh Klei kƀĭn thơ̆ng kơ bruă “Ksiêm dlăng pô, kra mlih hlăm bruă kriê pioh lehanăn mđĭ lar knhuah knhuah dhar kreh mnuih djuê ƀiă ti wăl krah să”. Ti knăm anei, phung khua wăl krah Ƀuôn Hô jao leh hră bi mni kơ dŭm êpul, mnuih ba myơr kdrăp mnơ̆ng. Nguyễn Thị Thu Nguyệt, Khua bruă Đảng wăl krah Ƀuôn Hô bi mklă.

 “Thŭn 2024 anei wăl krah mkŏ mjing leh Klei bi kbĭn “Čŏng pô ksiêm dlăng, mkra mlih” hlăm bruă kriê pioh lehanăn mđĭ lar knhuah dhar kreh mnuih djuê ƀiă ti alŭ wăl. Bruă Đảng mâo leh hră mtrŭn klă klơ̆ng, ieu mthưr djăp klei găl mâo mđĭ kyar wăl krah, mđĭ kyar anôk bruă nah gŭ, dŭm klei bhiăn dhar kreh. Mơ̆ng anăn, klei đua klam mơ̆ng Anôk bruă Đảng, mơ̆ng đảng viên dưi mkra mđĭ hŏng lu bruă ngă klă sĭt.

 Sang rang mdah mnơ̆ng ƀuôn K’Li A srăng pŏk ƀăng drông tue ehriê čhưn dlăng hlămmlan 11 thŭn 2024 anei, djŏ hŏng wưng Dak lak mkŏ mjing knăm bi hdơr 120 thŭn hruê mkŏ mjing čar. Dŭm bruă ngă tŭ yuôm klă sĭt, mkăp djŏ hŏng klei čiăng mơ̆ng mnuih ƀuôn sang hlăk dôk lar truh kơ êpul êya mnuih ƀuôn sang dôk. Bruă Đảng, bruă sang čư̆ êa wăl krah dôk gĭr bi mâo mta kñăm: Thŭn 2025 wăl krah Ƀuôn Hô srăng jing ƀuôn prŏng mta III – sa ƀuôn prŏng “Mdrŏng sah, kreh dhar, lăn mnga, khăp čiăng”./.