Kưt jing klei mmuñ yăl dliê, pia jing čŏng yăl dliê. Hlăm bruă čih klei yăl dliê jing mmuñ yăl dliê, yăl dliê kơ djăp mta hlăm ai tiê pô leh anăn amâo mâo klei blŭ klă, knŏng mâo mă ênhiang. Klei mmuñ kưt lu jing čŏng mčeh mă êjai mmông mmuñ. Hŏng klei čŏng yăl dliê, êngao kơ phung thâo mbruă, grăp čô dưi mmuñ kưt sơăi. Msĕ si hlăm klei djiê brŭ kreh mmuñ čŏk kơ mnuih djiê, amâodah hlăm dŭm knăm mơak, klei mmuñ kưt msĕ si sa klei yăl dliê, mtă mtăng kơ mnuih ƀuôn sang hrtăm mbĭt bi mguôp, čoh bruă ngă hma, mtă mtăn kơ anak čô, mâo đa đa jing bi êdah klei khăp êkei mniê.

Pô thâo mbruă Y-Đhin Niê, ti Ƀuôn Triă, să Ea Tul, kdriêk Čư̆ M’Gar, čar Dak Lak brei thâo: Êjai mmuñ kưt kreh mâo đĭng buôt (lŏ piă jing đĭng kliă amâodah buôt Čhôč) ayŭ kơ pô mmuñ, amâodah pô mmuñ čŏng ayŭ leh dŭm kdrêč mmuñ. Klei blŭ duê hlăm dŭm klei mmuñ kưt mâo rup bi hmô mdê hjăn ƀiădah mâo klei mdê êjai mmuñ khan.

“Klei blŭ duê hlăm klei khan yăl dliê đưm leh anăn mmuñ kưt msĕ yăng đar mâo dŭm klei mdê. Mnuñ kưt msĕ yăng đar kreh duah mčeh mă êjai pô mmuñ, bi hmô kơ dŭm klei mâo, ana kyâo mtâo, rơ̆k tơ̆k. Bi kơ mmuñ khan ñu mâo boh blŭ sa êlan, amâo mâo dưi mă pruê̆ anei dưm kơ pruê dih ôh.”

Klei hdĭp ênuk mrâo mrang anei ngă truh dŭm klei kpĭ hlăm bruă kriê pioh knhuah gru dhar kreh djuê ana, hlăm anăn mâo klei mmuñ kut hlăm klei mmuñ ênhiăng mơ̆ng mnuih Êđê. Pô thâo mbruă Y-Ƀhĭ Ayŭn, 62 thŭn, dôk ti ƀuôn Kna, să Čư̆ Mgar, Kdriêk Čư̆ Mgar, čar Dak Lak brei thâo: phung thâo mbruă khua thŭn hlăm ƀuôn jing phung dôk djă pioh tur knơ̆ng, klei mdê hjăn mơ̆ng klei mmuñ ênhiang djuê ana Êđê, hlăm anăn mâo klei mmuñ kưt. Klei kuič trơ̆ng êlah pui klei khăp, mtrŭt mjhar anak čô lŏ wĭt hŏng klei mmuñ ênhiang djuê ana kriê pioh knhuah dhar kreh anăn jing dleh êdi, kyuadah amâo mâo lu ôh phung thâo mbruă dôk mâo ai dưi mtô kơ phung ana čô pô thâo mbruă Y-Ƀhĭ Ayŭn brei thâo:

“Knŏng phung mduôn đuč thâo mmuñ kưt. Ară anei phung khua thŭn thâo mmuñ kưt wĭt hŏng aduôn aê atâo tiêt jih leh. Bi kơ phung hđeh mda asei ară anei amâo mâo thâo mmuñ kưt ôh. Knŏng thâo mă dŭm klei mmuñ ênuk hđeh ară anei đuč. Mphŭn dô phung thâo mbruă kreh mmuñ kưt hlăm dŭm hruê mâo knăm mơak. Ară anei, amâo mâo pô lŏ thâo mmuñ kưt ôh, tơdah dôk mâo ăt kăn thâo mmuñ msĕ hŏng phung mduôn lei. Kâo ênguôt sơnăk kyuadah anăn jing knhuah dhar kreh djuê ana pô. Hmăng hmưi mâo phung thâo mmuñ kưt leh anăn mă hĕ asăp mmuñ diñu, mtô kơ anak čô êdei anăp, ƀiădah knŏng phung arăng pia jing yang brei kơh mâo msĕ sơnăn.”

Hluê si Y-Mang, k’iăng khua adŭ bruă dhar kreh, hâo hưn kdriêk Čư̆ Mgar, čar Dak Lak brei thâo, ară anei kdriêk Čư̆ Mgar knŏng dôk mă 318 čô pô thâo mbruă dôk thâo klei duê, klei mmuñ ênhiang, lu hĭn ti să Ea Tul. Čiăng kriê pioh klei mmuñ ênhiang kơ ênuk êdei, hlăm wưng leh êgao, bruă dhar kreh alŭ wăl mâo leh klei gĭr mtô mjuăt hlăm dŭm sang hră, dŭm adŭ hriăm dưi pŏk hlăm dŭm alŭ ƀuôn, ƀiădah anei jing bruă suaih êmăn leh anăn čiăng mâo klei gĭr.

“Bi hŏng dhar bruă ksiêm ksiêm dlăng dhar kreh, bruă kriê pioh jing sa klei dleh dlan êdi, mâo lu klei dleh kpăk. Ƀiădah amâo djŏ klei klei anăn pô lui hĕ ôh, drei srăng mâo dŭm mta bruă djŏ tuôm hŏng bruă kriê pioh. Hlăm anăn mâo klei mmuñ ênhiang mơ̆ng mnuih ÊĐê leh anăn srăng rơ̆ng brei bi mâo lu bruă ngă hĭn, grăp thŭn mkŏ mjing lu mta bruă kñăm hâo hưn truh hŏng ênuk mda asei leh anăn krŭ wĭt dŭm mta bruă kriê pioh. Ngă sơnăn kơh dưi rơ̆ng, kriê pioh leh anăn amâo mâo luč ôh.”

Aduôn Linh Nga Niê Kđăm – Pô ksiêm duah knhuah dhar kreh đưm krĭng Lăn Dăp Kngư brei thâo, ară anei amâo mâo anôk rang mdah, knŏng ƀiă mnuih mtô bi hriăm. Bruă lŏ čuê dŭm klei mmuñ ênhiang djuê ana Êđê, hlăm anăn mâo klei mmuñ kưt jing dleh dlan êdi. Knŏng phung čŏng mâo klei thâo kơh thâo čŏng mmuñ kưt.

            “Kriê pioh jing klei dleh dlan êdi. Phŭn dô, grăp čô bi tuôm săng mmuñ kưt, mmuñ eirei, phung hđeh êdam êra hmư̆ leh anăn tui. Knŏng dlăng, hmư̆ leh anăn hluê ngă. Hlei yang brei pô anăn thâo ngă. Tơdah ih amâo mâo thâo jing yang amâo mâo brei ôh. Amâo mâo pô mtô mmuñ kưt leh anăn mmuñ eirei ăt msĕ mơh. Dŭm klei bhiăn hlăm klei bi tuôm diñu srăng mmuñ kưt. Klei yăl dliê hŏng ƀăng êgei dưi mđing hmư̆ leh anăn djă pioh. Ară anei dŭm bruă anăn amâo mâo lŏ mâo ôh. Phung hđeh dleh sơnăk thâo klei mmuñ kưt leh anăn eirei. Amâo mâo wăl rang mdah leh anăn adŭ mtô bi hriăm srăng bi luč hĕ ênhiang klei mmuñ. Hlăm hdră mtô klei mmuñ ti sang hră gưl 1 kâo mâo klei mñă kơ Ƀuôn Dur Kmăn čiăng dưi kriê pioh leh anăn lŏ čuê kơ ênuk êdei.”

Mơ̆ng đưm đă, klei mmuñ kưt jing sa mta klei mđĭ ai hlăm ai tiê, amâo mâo dưi kƀah ôh hlăm hlăm klei hdĭp mnuih Êđê.  Kyuanăn mnuih djuê ana ÊĐê čiăng thâo mpŭ knhuah jăk siam djuê ana pô. Tơdah anôk bruă djŏ tuôm amâo mâo hdră êlan djŏ guôp hlăm bruă mtô bi hriăm, rơ̆ng leh anăn kriê pioh, klei mmuñ kưt mơ̆ng mnuih djuê ana Êđê srăng luč yơh.