Hŏng ênai jăk siam, ênai man mưn, phung êkei êdam Êđê khăng pĕ brô̆ čiăng hưn mdah klei pô čiăng blŭ, klei čiăng yăl dliê hŏng mniê êra. Kdrăp pĕ anei ăt dưi yua čiăng pĕkơ ênhiang kưt hŏng asăp êdu êun, mdhiang… Pô mbruă Ama Đam yăl dliê, knŏng mâo phung êkei đuč dưi pĕ brô̆; leh anăn kdrăp pĕ anei dưi hlăp hlăm djăp klei mơak hlăm êpul êya. Brô̆ jing “mnơ̆ng mkŏ klei khăp” kơ êkei mniê hlăm ƀuôn.

“Hlăk đưm, brô̆ khăng pĕ hlăm knăm đĭ dôk sang mrâo. Mâo phung duê mmuñ kưt. Tal dua, amâo djŏ knŏng bi êdah klei mơak hlăm knăm đĭ dôk sang mrâo ôh, arăng khăng pĕ brô̆ ti adring sang dlông hlăm tlam wai băk kriêp ñăt, angĭn thut êđăp drưm. Tơdah ƀuh mơak hlăm ai tiê leh anăn mâo klei mĭn hlăm ai tiê snăn mă brô̆ pĕ yơh.”

Tơdah pĕ brô̆, êkei êdam amâo hơô ao ôh, kngan điâo gư̆ tŭt brô̆, kngan hnuă pleh klei brô̆, mbĭt anăn bi ăp boh giêt čiăng mâo ênai mnê mdê mdê. Tơdah kdrăp tông ayŭ mkăn, boh giêt bi kwang ênai nah êngao čiăng mjing asăp kwang kơ ênai brô̆ snăn, boh giêt brô̆ ăp hlăm tian phung pĕ brô̆. Pô mbruă Ama Đam brei thâo, mnuih Êđê mkra dŭm mta hlăm brô̆ hŏng kngan mơ̆ng đưm leh, leh anăn yua hlĭm hnuê mƀlir dŭm mta mjing sa ƀĕ brô̆.

“Brô̆ dưi mkra hŏng sa bĕ mơô dlông, knhal tuč arăng dưm sa pŏk mdhă điêt mâo ƀăng čiăng kă klei brô̆. Arăng kă brô̆ hŏng mkrah boh giêt khua knư̆ prŏng snăn srăng kwang hĭn. Brô̆ mâo 5 anôk gư̆ hŏng hlĭm hnuê. Pô thâo mkra mjing kdrăp tông ayŭ, thâo hmư̆ ênai jăk srăng mkra sa ƀĕ brô̆ pral snăk. Mkra aguah tlam leh yơh sa ƀĕ brô̆.”

Ênai brô̆ amâo hlue si sa hnơ̆ng čuăn ôh ƀiădah hlue si ai tiê pô pĕ, leh anăn msĕ si sa hdră bi hmô sa klei mmuiñ ênhiang djuê ana Êđê. Êngao kơ yăl dliê klei mĭn, klei čiăng hlăm klei khăp mniê êkei, brô̆ lŏ dưi yua čiăng hlăp lêñ hlăm klei mă bruă pla mjing hlăm pưk hma čiăng bi hlao klei suăi êmăn. Asăp êdu êun, jăk siam, mñê myuñ ƀơ ƀiă jăk snăk anăn ăt dưi yua pioh mjum anak, čô pĭt. Pô mbruă Ama Đam brei thâo:

"Grăp krĭng mâo ênhiang brô̆ mdê mdê. Hlue si klei thâo hmư̆ ênai grăp čô mnuih. Hlăm sa klei mmuiñ ƀiădah pô pĕ brô̆ mbruă hĭn snăn ênai brô̆ srăng jăk hĭn mơh, leh anăn tơdah pô mbruă mâo lu klei thâo bi êdah klei ênguôt hlăm asăp brô̆ arăng srăng hmư̆ mgei ai tiê mbĭt mơh.”

 Anak Êđê khăp snăk kơ brô̆, amâo djŏ knŏng hlăm klei blŭ ôh ƀiădah lŏ bi êdah hlăm klei mpŭ, jĕ giăm, bi mguôp hŏng klei pĕ kdrăp mñê anei. Tơdah asăp brô̆ kwang, ai tiê mnuih hlai mbĭt, mơak mñai, wơr hĕ klei ênguôt hnĭng, rŭng răng hlăm klei hdĭp. Hlăk đưm, lu gŏ sang anak Êđê mâo sơăi brô̆, leh anăn hlăm ƀuôn êlan mâo lu snăk phung thâo pĕ brô̆. Ƀiădah hlăm klei đĭ kyar ala ƀuôn mrâo mrang, lu mnuih wơr leh asăp êdu êun mmơ̆ng brô̆. Anăn jing klei phung mbruă khua thŭn hlăm ƀuôn sang Êđê dôk bi mĭn. Pô mbruă Ama Đam brei thâo: “Êdei anei hlei lŏ mkra mjing brô̆”, “Asăp brô̆ dôk mâo kwang mơ̆ hlăm ƀuôn sang pô?”

“Hlei čiăng hriăm pĕ brô̆ kâo srăng mtô. Khădah snăn phung hđeh mrâo ară anei knŏng hriăm hră mơar leh anăn mă bruă knuă duah prăk mah kơ klei dhĭp. Amâo djăp prăk bi liê kơ phung hđeh hriăm. Ară anei ƀiă mnuih thâo mkra brô̆, mâo ƀuôn knŏng dôk dua tlâo čô, mâo ƀuôn amâo lŏ mâo ôh leh anăn amâo lŏ bĕ brô̆ ôh.  Anei ăt jing klei ênguôt leh anăn čang hmăng ƀuôn sang drei mđing hĭn. Tơdah amâo lŏ mtô leh anăn răng mgang klă sĭt srăng luč hĕ klei jăk siam aduôn aê pô.”

 Asăp jăk siam mơ̆ng brô̆ amâo djŏ knŏng asăp hlăp mbŭl, sa mnơ̆ng amâo dưi kƀah ôh hlăm klei hdĭp anak Êđê, thiăm klei mkŏ kơ klei hơ̆k mơak ƀiădah lŏ jing klei jăk siam yuôm bhăn mơ̆ng kdrăp tŏng ayŭ anak Êđê./.