Hruê knăm mkŏ mjing hlăm dua hruê mơ̆ng 12 – 13/4, hŏng 800 čô thâo mbruă, mnuih ƀuôn sang dŭm djuê ana mơ̆ng 17 kdriêk, wăl krah, ƀuôn prŏng ti čar Gia Lai nao hgŭm. Hŏng akŏ “Ênai Kwang čư̆ čhiăng”, hdră mphŭn pŏk hŏng bruă lŏ bi êdah rup êpul êya dŭm djuê ana bi kƀĭn ti ƀuôn mbĭt – anôk bi mklin dhar kreh, mkŏ klei đăo knang, mđing truh kơ mta kñăm mkŏ mjing čar Gia Lai mdrŏng siam, bi mguôp leh anăn đĭ kyar hơĭt kjăp. Lŏ čuê jing dŭm klei rang mdah klei tông čing bi êdah kơ klei hdĭp dhar kreh, klei hmăng hmưi kpưn đĭ mơ̆ng dŭm djuê ana.

Leh mlam pŏk hdră, dŭm êpul phung thâo mbruă rang mdah, mkŏ wĭt lu hdră bhiăn, knhuah gru djuê ana leh si gui êa wĭt kơ ƀuôn, tlŏ kbao, knăm bi mni, knăm Sơmă Kơcham, klei mmuñ tuồng, kdrăp pĕ tông djuê ana, krah rup, hrĭ mñam, pơ̆k mñam.

Aduôn Lê Thị Thanh Thủy, khua anôk bruă dhar kreh – hưn mthâo leh anăn mjuăt asei mlei kdriêk Mang Yang, čar Gia Lai brei thâo:

 “Mang yang truh hrue knăm mơak mâo dŭm klei jăk siam hĭn. Êngao kơnăn, hmei hmăng hmưi hruê knăm dưi lŏ cuê čiăng kriê pioh knhuah gru dhar kreh mơ̆ng mnuih Bahnar leh anăn dŭm djuê ana mkăn ti alŭ wăl”.

Thŭn anei, êpul phung thâo mbruă wăl krah Ayun Pa mâo 46 čô nao hgŭm hlăm dŭm mta phŭn msĕ si tông čing, pơ̆k mñam, dŭm klei hlăp lêñ đuem. Pô thâo mbruă Nay Ka ti ƀuôn Phu Ama Nhuer 2, să ia Rtô, wăl krah Ayun Pa brei thâo:

 “Êpul phung thâo mbruă wăl krah Ayun Pa hmei srăng mkŏ wĭt klei huă blăm mnăm thŭn- sa knhuah gru jăk siam mơ̆ng mnuih Jarai. Anei jing hdră bhiăn ngă yang kơ phung djuê mơ̆ng yang ƀuôn mnuih Jarai Cheo Reo. Bruă mkŏ wĭt klei ngă yang anei čiăng lŏ bi êdah knhuah dhar kreh jăk sim mơ̆ng mnuih Jarai, mtă mtă kơ phung mda asei thâo leh anăn mpŭ kơ knhuah gru djuê ana pô.”

Pô thâo mbruă Siu Thưm – ti Peli Ku Roh, ƀuôn prŏng Pleiku brei thâo, êpul kdŏ mmuñ mơ̆ng ƀuôn mâo 40 čô, srăng tông kwang ênai čing hơ̆k mơak klei mblah dưi, mbĭt hŏng dŭm ênhiang knhuah gru djuê ana. Anei jing wưng hưn mdah hŏng phung tuê knhuah gru jăk siam djuê ana pô:

 “Wưng anei amâo djŏ bi lông hŏng dŭm êpul mkăn, ƀiădah jing mjĕ êrô. Kyuanăn hmei čiăng ba dŭm klei kdŏ mmuñ jăk hĭn mơ̆ng mnuih Jarai ti Pleiku hưn mdah hŏng êpul găp leh anăn phung tuê hriê ti Gia Lai. Kyuanăn phung thâo mbruă hơ̆k mơak leh anăn hur har”.

Hruê knăm bŏ hŏng êa mil dhar kreh hŏng dŭm mta bruă bi êdah klei hdĭp yang ƀuôn, rang mdah kdrăp čŭt hơô djuê ana, mnơ̆ng ƀơ̆ng huă knhuah gru leh anăn dŭm klei hlăp lêñ đưm, dŭm anôk rang mdang mnơ̆ng dhơ̆ng alŭ wăl msĕ si kphê, kpiê čeh, điŏ brông, kđeh čĭm ăm.. đru hưn mdah kơ klei jơr dhar kreh dŭm djuê ana hlăm čar.