Account facebook “H'Tuyết bruă pơ̆k mñam Jrai" mâo dŭm êbâo gưl phung ktuê dlăng, jing sa mbah hưn mdah, đru kơ amai H’Tuyết ti alŭ 10, wăl krah Phú Thiện, kdriêk Phú Thiện čhĭ mơ̆ng 70 – 100 mnơ̆ng dhơ̆ng, hnư hrui wĭt dŭm pluh êklăk prăk hlăm sa mlan. Amai H’Tuyết brei thâo, ti sang čhĭ mnia mtam 4 nah tĭng jing yuôl masin kčoh leh anăn mnal ao mơ̆ng mnal pơ̆k mñam, amai kreh livestream yăl dliê kơ dŭm klei mâo hlăm klei hdĭp, mâo mmông mă êjai mmuñ êjai čiăng iêo jak phung dlăng. Mnal pơ̆k mñam Jarai mâo kčoh jing ai dao, kdrăp čŭt nao bi kuôl ung mô, ao gi lê êkei, amâodah mơiêng ao kơ phung hđeh điêt… msĕ hŏng klei čiăng mơ̆ng phung blei yua. Kyuanăn, amai mkŏ mjing bruă mă kơ 4 čô kčoh, hŏng prăk mlan 6 êklăk prăk leh anăn blei dŭm mta mnơ̆ng pơ̆k mñam mơ̆ng phung thâo mbruă ti să Ia Sol, kdriêk Phú Thiện hlăm lu thŭn hŏng anei. Amai H’Tuyết brei thâo:

 “Kâo mă rup, mdar film klă anăn hŏng facebook, Zalo, mơ̆ng anăn mâo lu phung tuê thâo leh anăn hriê duah kâo. Pô pô mơĭt klei čih hlăm đĭng blŭ, mâo pô bi klă blei mnơ̆ng. Kâo pô ăt mâo lu klei hưn mơ̆ng facebook, Zalo čiăng hluê hriăm mơ̆ng phung amai adei mơ̆ng anôk mkăn msĕ si Dak Lak, Lâm Đồng, Kon Tum… Kâo ăt lač jăk kơ phung mkŏ mjing leh mbah hla pŏk yang ƀuôn. Kyua mâo ñu yơh đru kơ kâo dưi hriăm čiăng mđĭ klei thâo bruă. Ăt kyua mâo mbah hla pŏk yang ƀuôn mâo lu mnuuih mơĭt klei čih leh anăn bi klă blei mnơ̆ng dhơ̆ng, amâo djŏ knŏng phung tuê hlăm lăn čar, ƀiădah lŏ mâo phung tuê mơ̆ng lăn čar tač êngao”.

Klei siam mơ̆ng bruă pơ̆k mñăm Gia Lai mâo leh pô mkra mjing Minh Hạnh – khua kiă kriê klei mkra mjing Knơ̆ng bruă Việt Mốt, pô ba ao dai, mnal, mnơ̆ng pơ̆k mñam mơ̆ng dŭm krĭng kwar hlăm lăn čar truh kơ anôk mnia mblei tar rŏng lăn, uêñ mĭn leh anăn hưn mdah. Knhal jih mlan 10/2023 mrâo êgao, hlăm sa hdră klei kdŏ mmuñ “Gia Lai Ơi” mơ̆ng bruă sang čư êa čar Gia Lai mkŏ mjing, gưl tal êlâo mnơ̆ng pơ̆k mñam mơ̆ng mnuih Jarai, Bahnar mâo pô mkra mjing Minh Hạnh kčoh mjing dŭm mta kdrăp čŭt hơô siam msĕ si mơiêng, ai dai, mâo akŏ 4 yan, yan mnga, yan hjan, yan hlah luh, yan puih.

Tinăn, amâo djŏ knơ̆ng mâo boh đêč pơ̆k mñam, ƀiădah lŏ mâo rup knhuah gru krĭng Lăn Dăp Kngư msĕ si sang rong, kyâo prŏng ti djiêo hnoh êa leh anăn dŭm boh mran…dưi bi mguôp bi kna hŏng mta mnal, mkŏ mjing dŭm mta mnơ̆ng dhơ̆ng jăk yâo. Pô mkra mjing Minh Hạnh brei thâo, mĭn tĭng đru kơ bruă pơ̆k mñam mơ̆ng dŭm djuê ana mnuih djuê ƀiă ti Gia Lai kpưn đĭ kơ anôk mnia mblei, čiăng lŏ bi râo dŭm ƀuôn mă bruă đưm hlăm čar:

“Diñu mñam siam êdi, boh mnga mơ̆ng diñu mâo ba boh tŭ hlăm klei hdĭp, dlăng jăk êdi. Bruă tal êlâo hmei hmăng hmưi čiăng mđĭ ênoh mnơ̆ng pơ̆k mñam. Klei anei hŏng hmei jing ênưih, hrô kơ bruă diñu mñam hŏng mrai, hmei srăng gĭr mkŏ čiăng mñam dŭm blah mlah hŏng mnal êun. Anăn jing hdră bi mđĭ ênoh mnơ̆ng pơ̆k mñam”.

Ară anei čar Gia Lai dôk hluê ngă lu mta bruă kñăm krŭ wĭt, kriê pioh leh anăn bi mni kơ dŭm boh tŭ dưn knhuah gru, đru bi lu jơr dhar kreh dŭm djuê ana krĭng Lăn Dăp Kngư. Hlăm anăn, kriê pioh kjăp dưi bi klă nao mbĭt hŏng bruă mă yua boh tŭ dhar kreh, mnia mblei, đru kơ pô pơ̆k mñam dưi mđĭ kyar bruă duh mkra. Aduôn Nguyễn Thị Thanh Lịch - k’iăng khua bruă sang čư êa čar Gia Lai brei thâo:

 “Hmei hmăng hmưi bi mni kơ phung thâo mbruă, lo čuê kơ phung mda asei čiăng kriê pioh bruă knhuah gru, nao mbĭt hŏng klei mbruă. Tal 2 hmei hmăng hmưi rang mdah, čiăng kơ phung ksiêm duah dhar kreh, phung mkra mjing, phung mkra čhum ao čiăng mjing mnơ̆ng pơ̆k mñam jing mnơ̆ng mâo ênoh, mđĭ kyar bruă duh mkra kơ mnuih ƀuôn sang jing mnuih djuê ƀiă ti čar Gia Lai”.