Klă klơ̆ng mphŭn pŏk mơ̆ng hruê 28/8 leh anăn truh kơ hruê 5/9 ti Hà Nội, Klei rang mdah Boh tŭ dưn lăn čar 80 thŭn hră Čŏng pô- Êngiê – Yâo mơak hưn mdah boh tŭ dưn mơ̆ng lăn čar hlăm lu mta bruă. Tạ Quang Đông, k’iăng khua phŭn bruă dhar kreh, mjuăt asei mlei leh anăn hiu čhưn ênguê mñă ktang:

 “Anei jing klei rang mdah drei hưn lu kơ anak mnuih, lăn čar Việt Nam, dŭm boh tŭ dưn mơ̆ng Việt Nam hŏng mah jiăng tar rŏng lăn, hŏng mnuih ƀuôn sang hlăm lăn čar wưng hruê 2/9 anei. Anei jing anôk bi kƀĭn, sa anôk truh srăng iêo jak ênoh lu mnuih ƀuôn sang ƀuôn prŏng phŭn leh anăn dŭm čar ƀuôn prŏng hriê tinei dlăng klei rang mdah leh anăn hŏng anei srăng jing klei bi lar ktang boh tŭ dưn mơ̆ng lăn čar drei”.

Nao hlăm klei rang mdah jing 34 anôk rang mdah jăk êdi, mâo knhuah mdê mdê mơ̆ng 34 čar, ƀuôn prŏng leh anăn dŭm phŭn, dhar bruă gưl dlông. Sa hlăm dŭm gru kruăk mơ̆ng klei rang mdah jing wăl rang mdah phao ktuang lĭng kahan, bi êdah klei ktang mơ̆ng lĭng kahan Việt Nam. Thiếu tướng Tống Văn Thanh, k’iăng khua anôk bruă hâo hưn bi hriăm, Anôk bruă kđi čar lĭng kahan yang ƀuôn Việt Nam hưn:

 “Tinei hmei yua dŭm kdrăp mrâo mrang hlăm klei rang mdah knhuah gru leh anăn mrâo mrang, boh nuk ăt dăp anôk kơ phung tuê čuă dlăng, anôk lông dlăng jing sa anôk ăt jăk êdi. Tal dua jing nao hgŭm rang mdah ti êngao tač hŏng akŏ “Đao leh anăn khil mgang” hŏng ênhă êpul mkŏ mjing dăp êbeh 2ha. Tinei hmei dăp lu mta kdrăp lĭng kahan, kdrăp phao ktuang, kdrăp mrâo mrang mơ̆ng dŭm anôk bruă, knơ̆ng bruă lĭng kahan ksiêm duah leh anăn mđĭ kyar”.

Ti anôk bruă klei mrâo rang mdah “Boh tŭ dưn mơ̆ng lăn čar 80 thŭn hdră bruă Čŏng pô – Êngiê – Yâo mơak”, Lê Hải Bình, k’iăng khua hlăm Phŭn bruă dhar kreh, mjuăt asei mlei leh anăn hiu čhưn ênguê brei thâo:

 “Anôk bruă klei mrâo jing anôk srăng mkăp brei dŭm mta bruă đru kơ phung ngă bruă klei mrâo hlăm leh anăn êngao lăn čar, ăt msĕ mơh mgaih msir dŭm klei čiăng hlăm klei mă bruă mơ̆ng phung čih klei mrâo. Hŏng mta kñăm anăn, hmei srăng ngă djăp klei găl kơ phung čih klei mrâo hlăm leh anăn êngao lăn čar hưn kơ klei rang mdah ăt msĕ mơh diñu srăng mâo klei hưn hnưm hĭn mơ̆ng dŭm mta bruă hlăm klei rang mdah”.

Tinei ăt mkŏ mjing hdră kdŏ mmuñ, klei kƀĭn trông, klei mjĕ êrô, ktuê dlăng lu jơr. Klei rang mdah amâo djŏ knŏng jing bruă kđi čar – dhar kreh yuôm bhăn ƀiădah lŏ đru bi lar ai tiê djuê ana, bi râo klei hmăng hmưi mkŏ mjing lăn čar mdrŏng ktang. Anei ăt jing mta kñăm hlăm dŭm mta bruă bi hdơr klei Krŭ kdơ̆ng mlan 8 leh anăn hruê Mkŏ mjing lăn čar 2/9.