Dưi mđĭ kyar mơ̆ng tur knơ̆ng rang mdah yan hla luh dap kngư êlâo dih, klei rang mdah čih kač rup čar Dak Lak tal sa thŭn anei mâo giăm 90 klei čih kač rup mơ̆ng êbeh 40 čô hlăm leh anăn êngao čar. Dŭm klei čih kač rup dưi bi êdah hŏng lu mta mnơ̆ng, msĕ si ktur hŏng kyâo, êa mil, mnal, mica… Grăp pŏk rup bi êdah jăk siam klei hdĭp ala ƀuôn, klei jăk siam dliê kmrơ̆ng čư̆ êa anak mnuih, klei khăp kơ ƀuôn sang lăn čar, klei bhiăn hdĭp mda, dhar kreh mdê hjăn mơ̆ng dŭm djuê ana dôk hdĭp mda ti Lăn Dap Kngư. Dŭm pŏk rup mưng ƀuh msĕ si ƀuôn sang hlăm knăm mơak, klei ngă yang, klei ngă bruă mkra mjing amâodah dŭm anôk jĕ giăm hŏng Dak Lak ăt mâo lu phung čih kač ruah. Trương Nguyễn Hoàng Mai, ti ƀuôn hgŭm Ea Tam, ƀuôn prŏng Ƀuôn Ama Thuôt nao dlăng klei rang mdah brei thâo:

Dŭm pŏk rup dưi rang mdah hlăm adŭ bruă rang mdah ngă kơ kâo ƀuh klei jăk mơak ti lăn dap kngư hrah, si tô hmô rup Tlam ti čư̆ mơ̆ng Dương Thị Thúy Hiền, amâodah rup Pin êa mơ̆ng Y Buih, amâodah klei jăk siam Lăn Dap Kngư mơ̆ng Hoàng Duyên. Rup ngă kơ kâo khăp hĭn jing Klei khăp lĭng kahan hŏng ƀuôn sang mơ̆ng Phạm Văn Hải.  Rup lŏ lač kơ klei hur har hlăm yan hrui pĕ ti dap kngư leh anăn bi êdah klei khăp lĭng kahan- ƀuôn sang jăk siam. Êngao anăn snăn pô čih kač yua êa mil mngač, mơak, ngă kơ rup jăk siam hĭn.

Êngao kơ dŭm phung čih kač mâo klei hing ang leh anăn klei thâo lu, klei rang mdah lŏ mâo lu phung mrâo hŏng pŏk rup jăk, mâo klei thâo săng kơ dhar kreh klei hdĭp. Mbĭt anăn diñu ăt mâo klei hđuh hĭn, jhŏng bi êdah klei mrâo hlăm klei čih kač. Pô čih kač rup mda asei Y Buih Niê Kđăm (kkiêng thŭn 1997) ti ƀuôn prŏng Ƀuôn Ama Thuôt nao hlăm klei rang mdah hŏng rup kač: Pin Ea.  Rup anei mâo klei hâo hưn mtô mblang kơ bruă răng mgang wăl hdĭp mda leh anăn răng kriê dhar kreh, dưi mâo klei pah mni ênoh A hlăm klei bi lông thŭn anei.  Y Buih Niê Kđăm brei thâo:        

Klei anei jing kâo lŏ bi mĭn mơ̆ng hlăk điêt, amĭ êlâo kơ nao mă bruă weh djăt êa ti pin êa, čiăng aguah mgi mâo êa mnăm nao ti pưk hma. Ară anei snăn pin êa Lăn Dap Kngư ƀrư̆ hruê ƀrư̆ hrŏ. Đa đa ƀuôn sang kăn lŏ mâo mơh, kâo ciăng mơĭt klei hâo hưn răng mgang pin êa. Anăn jing sa klei dleh snăk ƀiădah kâo ăt čiăng hâo hưn čiăng răng mgang wăl hdĭp mda, čiăng mâo sa pin êa mtah doh siam.

 Dưi pŏk ngă mơ̆ng akŏ mlan 10 thŭn anei leh anăn găn lu klei brei puăng hưn mdah, anôk bruă mkŏ mjing klei rang mdah čih kač rup čar Dak lak tal sa mđup brei leh kơ 14 pŏk rup kdlưn hĭn, hŏng 3 klei pah mni ênoh A, 3 ênoh B, 3 ênoh C leh anăn 5 klei mđĭ ai. Dŭm pŏk rup hlăm klei rang mdah dưi ruah mdah ti Anôk bruă dhar kreh čar Dak Lak, mâo lu mnuih ƀuôn sang mđing dlăng. Nai prŏng, pô čih kač rup Y Nhi Ksơr - Khua Êpul gơ̆ng ksiêm dlăng klei rang mdah lač:

Dŭm klei rang mdah jiă kma dhar kreh, boh nik mâo knhuah dhar kreh Lăn Dap Kngư mâo ênoh yuôm hlăm klei rang mdah anei. Bi kơ hnơ̆ng jăk, hmei ruah tlâo pŏk rup jiă kma knhuah dhar kreh Lăn Dap Kngư leh anăn mâo ênoh yuôm kơ klei čih kač rup. Hlăm klei pah mni yuôm hĭn snăn mâo pô jing nai prŏng, nai mtô ti sang hră gưl prŏng kdŏ mmuiñ čih kač gưl dlông. Anăn jing sa klei kâo ƀuh mơak. Kyua jih jang phung čih kač rup hlăm tal anei khăp sơăi kơ ƀuôn sang pô. Leh anăn kâo čang hmăng hlăm klei rang mdah tal dua klă sĭt srăng mâo lu pŏk rup jăk siam hĭn, mâo ênoh yuôm hĭn./.