Djă ĭn grăp pŏk rup mâo mă mbĭt hŏng ayang Khua gĭt gai Đảng Nguyễn Phú Trọng, H’Yăm Ƀuôn Krông, ti ƀuôn Tơ̆ng Jŭ, să Ea kao, ƀuôn prŏng Ƀuôn Ama Thuôt, čar Dak Lak yăl dliê, ñu mâo dua blư̆ dưi bi tuôm hŏng Khua gĭt gai Đảng Nguyễn Phú Trọng. Boh nik thŭn 2011, ñu leh anăn phung amai adei čŏng pô mñam ao Êđê mđup brei kơ Khua gĭt gai Đảng êjai ñu wĭt čuă ƀuôn:

 “Êjai hmư̆ hing hmei hlŏng giêng mrai čiăng pơ̆k mñam mđup brei kơ Awa, mơĭt klei khăp čiăng, klei mpŭ mơ̆ng pô hŏng Awa. Gưl tal dua bi tuôm hŏng Awa jing êjai kâo nao hlăm klei kƀĭn trông pah mni phung hriăm lu, phung knhâo knhăk, phung mnia mblei êdah êdi jing phung mâo kơhưm mnuih djuê ƀiă ti Hà Nội. Kâo ƀuh khăp êdi kơ dŭm klei awa mtă hŏng mnuih ƀuôn sang mnuih djuê ƀiă leh anăn hlăm lăn čar, srăng mkŏ mjing klei bi mguôp, mâo klei bi mguôp kơ dưi tŭ jing”.

Hdơr kơ klei mtă mơ̆ng ayang khua gĭt gai Đảng, dŭm thŭn êgao, aduôn H’Yam mbĭt hŏng 45 čô hlăm êpul hgŭm bruă pơ̆k mñam Tơ̆ng Bông (jih jang jing mnuih Êđê hlăm să Ea Kao), amâo mâo mdei klei bi mguôp kpưn đĭ, kreh kriăng duah hriăm, bi mrâo klei pơ̆ mñam lu mta mnơ̆ng mnơ̆ng mñam mrâo, bi mguôp hŏng bruă kriê pioh knhuah gru dhar kreh čiăng mkŏ mjing ƀuôn hiu čhưn ênguê ala ƀuôn.

Hŏng pô mbruă êdah êdi A Biu ti ƀuôn Klêč (să Ngọc Bay, ƀuôn prŏng Kon Tum, čar Kon Tum), khădah thŭn leh khua, ală mmăt leh, jơ̆ng ktư̆ leh mơh, ƀiădah ñu ăt dôk khăp êdi kơ bruă duah pioh kdrăp pĕ tông leh anăn mtô kơ phung mda asei…Ñu gĭr jih ai tiê čiăng tui duah čĭng čar, brô̆, hgơr, rup krah…mơ̆ng mnuih Bahnar, ba wĭt hlăm sang pô leh anăn mjing anôk anei jing anôk hiu čhưn ênguê yang ƀuôn. A Biu brei thâo:

 “Čiăng hưn mdah kơ dhar kreh krĭng Lăn Dap Kngư ti sang kâo ngă leh sa anôk hiu čhưn ênguê, duah mâo giăm 30 ring čing. Ară anei ăt hiu hưn mdah dhar kreh lu sơnăk, mơ̆ng phung hđeh sang hră truh kơ anak čô hlăm sang, mnuih ƀuôn sang jĕ giăm. Đa đa mrâo anei kâo nao mtô tông čing Bahnar. Hmăng hmưi mâo klei uêñ mĭn mơ̆ng knŭk kna msĕ sơnei, mnuih ƀuôn sang thâo ƀuh klei bi mguôp kjăp hlăm êpul êya pô, hrăm mbĭt krŭ wĭt ênai čing”.

Bruă kriê pioh dhar kreh ti krĭng Lăn Dap Kngư dưi mâo klei uêñ mĭn, lŏ čuê mơ̆ng phung mda asei. Rơ Châm Tứ, ti ƀuôn Mrông Yô̆ 1, să Ia Ka, kdriêk Čư̆ Pah, čar Gia Lai mrâo 15 thŭn ƀiădah tuč leh giăm 10 klei khan mơ̆ng mnuih Jarai. Ñu ƀuh mâo klei myun êdi kyua mâo aê jing pô thâo yăl dliê khan, kyuanăn srăng gĭr hriăm lu hĭn.

“Hriăm ktang lu ktang jăk, tơdah pô amâo mâo thâo truh mmông luč aê srăng luč jị, knhuah gru djuê ana pô pô srăng djă pioh, lŏ čuê kơ ênuk êdi. Khădah amâo mâo thâo lu msĕ hŏng aê ƀiădah ăt djă pioh ƀiă kơ mgi dih”.

   Kriê pioh leh anăn bi lar knhuah gru dhar kreh, pô thâo mbruă A Đuh, ti ƀuôn Trang, să Đăk La, kdriêk Đăk Hà, čar Kon Tum kreh wĭt hŏng ƀuôn sang čiăng duah dŭm klei mmuñ ênhiang. Ñu ăt ksiêm duah, bi mrâo dŭm kdrăp pĕ tông msĕ si čing čhar, brô̆ t’rưng, ting ning, Klông put leh anăn mčeh dŭm klei mmuñ mrâo. Ñu lač anăn jing hdră čiăng mđĭ kyar dhar kreh hlăm wưng mrâo.

 “Ênhiang phŭn ăt dôk msĕ sơnăn, dlăng kơ phŭn anăn drei srăng mđĭ kyar. Mă yua ênhiang anăn ngă kơ ñu jing jăk hĭn čiăng kơ êdei anăp mâo dŭm klei mmuñ ênhiang jăk hĭn hŏng ƀuôn sang”.

   “Dhar kreh jing mngăt êwa djuê ana, dhar kreh adôk djuê ana adôk”, anăn jing klei blŭ hrăm mơ̆ng ayang Khua gĭt gai Đảng Nguyễn Phú Trọng hlăm klei kƀĭn trông dhar kreh kluôm ala thŭn 2021 dôk mâo klei yuôm bhăn. Hdơr kơ ayang khua gĭt gai Đảng, mnuih ƀuôn sang dŭm djuê ana krĭng Lăn Dap Kngư lŏ dơ̆ng kriê pioh, bi lar knhuah gru dhar kreh djuê ana, ăt jing kriê pioh mngăt êwa djuê ana kơ mgi dih./.