Anei jing bruă hlăm jar Knăm mơak alum kkuh Việt Nam thŭn 2023 mơ̆ng Anôk bruă bi ala India ti ƀuôn prŏng Hồ Chí Minh, mjĕ êrô dhar kreh plah wah Inida hŏng čar Dak Lak. Hlăm hdră, phung nao dưi dlăng klei kdŏ jăk siam hŏng lu klei dhar kreh India kyua êpul kdŏ Kuchipudi mâo 6 čô kdŏ mrô sa mơ̆ng India. Klei mdah mphŭn kčưm hŏng dŭm klei bhiăn hlăm knưl, leh anăn grăp čô blŭ čhưn leh anăn hưn mthâo kơ pô hĭng boh phŭn mơ̆ng jih klei kdŏ mmuiñ hưn mdah čiăng hưn mthâo knhuah jăk siam, ai tiê phung dưi lač hlăm klei kdŏ mmuiñ.

Jih jang klei kdŏ, mmuiñ jing sa klei yăl dliê kơ klei myang, bi mni kơ sa čô yang hlăm klei đăo phung India msĕ si: Yang kŏ êman Ghanesha, yang Shiva, yang Rama, yang Vishmu, yang Krishna. Hŏng ênhiang jăk siam, mbruă, dŭm klei kdŏ đru kơ phung kăp dlăng thâo săng thiăm kơ dhar kreh jăk siam mơ̆ng India. Mahesh Giri, Khua anôk bruă bi ala India ti ƀuôn prŏng Hồ Chí Minh brei thâo: “Hmei čiăng pŏk mlar amâo djŏ knŏng klei bi hgŭm dua nah ôh ƀiădah wăt klei bi hgŭm bruă mnia blei leh anăn klei bi hgŭm dhar kreh, klei anei yuôm bhăn. Anăn jing mta phŭn ya ngă hmei hriê tinei leha năn srăng lŏ dơ̆ng bi trông kơ hdră anei. Klei anei mjing dŭm klei bi hgŭm gưl čar hlăm klei bi hgŭm drei, ñu srăng đru kơ klei drei bi hgŭm kjăp hĭn. India leh anăn Việt Nam mâo klei bi hgŭm jăk siam, kyua anăn hmei čiăng mđĭ klei bi hgŭm anei”.