Jing leh klei mưng ngă, grăp aguah kgŭ pĭt, bruă tal êlâo mơ̆ng Kơ Să Ha Nhiếu (ti să Phú Hội, kdriêk Đức Trọng, čar Lâm Đồng) jing duah hdră mđung asăp blŭ klei K’Ho mơ̆ng Sang mđung asăp blŭ Việt Nam ti Lăn Dap Kngư mkŏ mjing. Ñu brei thâo: Êbeh 20 thŭn êgao, Hdră mđung asăp blŭ klei K’Ho mơ̆ng Sang mđung asăp blŭ Việt Nam jing leh găp siă suôr. Grăp asăp phung mđung asăp jing mưng leh. Kyua anăn, ñu hdơr djăp boh phŭn kdrêč mđung leh anăn jar mmông mđung grăp hruê leh anăn hlăm hruê kăm. Hlăm anăn, ñu khăp hĭn kơ hdră ênhiang mmuiñ djuê ana, ktrâo lač mă bruă, mtô mtă kơ phung êdam êra kreh kriăng mă bruă.

“Kâo ƀuh dŭm hdră mđung hlăm hdră mđung jăk snăk. Khăng mtô kơ mnuih ƀuôn sang ngă bruă duh mkra, mmuiñ ênhiang djuê ana, mmuiñ tòng bơr msĕ si pô thâo mbruă Ka Ding. Mâo lu klei mmuiñ ênhiang djuê ana mtô mtă kơ mnuih ƀuô sang mă bruă knuă, thâo mñam bŭng. Kâo čiăng kơ klei anei dưi mđung lu hĭn čiăng kơ mnuih ƀuôn sang hmư̆ leh anăn mđĭ klei thâo săng”

Hŏng Čil Bri, Khua Êpul hgŭm phung mniê čar Lâm Đồng, Hdră mđung asăp blŭ klei K’Ho mơ̆ng Sang mđung asăp blŭ Việt Nam jing hdră hâo hưn phŭn mơ̆ng Knŭk kna. Amâo djŏ knŏng jing mkăp klei hâo hưn hlăm ala čar leh anăn dlông rŏng lăn ôh, ƀiădah lŏ hưn kơ boh klei ti krĭng Lăn Dap Kngư leh anăn Lâm Đồng. Hlue si Čil Bri,  dŭm boh phŭn mđung hŏng klei blŭ leh anăn boh hră mnuih K’Ho hlăm hdră mđung asă ăt msĕ mơh hlăm hla pok web VOV4.K’Ho mơ̆ng VOV Lăn Dap Kngư, đru kơ mnuih ƀuôn sang thâo săng pral hĭn.

 “Kâo khăp hmư̆ dŭm hdră mđung hŏng klei K’Ho mơ̆ng Sang mđung asăp blŭ Việt Nam ti Lăn Dap Kngư. Kyua hlăm anăn mâo lu hdră lač kơ dhar kreh, kđi čar, bruă duh mkra- ala ƀuôn, răng kriê dhar kreh, mtô kơ amai adei ƀă kkiêng anak, kriê dlăng anak čô mă bruă knuă, hriăm hră mơar, mtô lač kơ hdră tlŏ mgang vaccin djăp ênŭm, kâo ƀuh klei anăn jăk snăk hŏng bruă pô..”

Hŏng pô thâo mbruă êdah êdi K’Brèm, ară anei dôk mă bruă ti Anôk bruă dhar kreh, hâo hưn leh anăn mto mjuăt asei mlei kdriêk Bảo Lâm, čar Lâm Đồng, Hdră mđung asăp blŭ klei K’Ho mơ̆ng Sang mđung asăp blŭ Việt Nam mbŏ dhar kreh djuê ana pô. Kyua mơ̆ng hdră “Ênhiang mmuiñ djuê ana Lănb Dap Kngư”, “Ênhiang mmuiñ djuê ana tlâo kwar”, “Hdră mkŏ kdrông ênhiang mmuiñ djuê ana” mơ̆ng Sang mđung asăp blŭ Việt Nam, Pô thâo mbruă êdah êdi K’Brèm mâo thiăm hdră pioh kơ bruă  dhar kreh ti alŭ wăl. Ƀri gưl bi hdơr 22 thŭn mđung asăp Hdră mđung asăp klei K’Ho mơ̆ng sang mđung asăp blŭ Việt Nam, pô thâo mbruă êdah êdi K’Brèm, mơĭt klei hơêč hmưi:

 “Ƀri gưl bi hdơr 22 thŭn, kâo hơêč hmưi kơ Sang mđung asăp suaih pral, mđĭ bruă wĭt ti ƀuôn sang čiăng duah kơ klei dhar kreh jăk siam djuê ana pô. Amâo djŏ knŏng hjăn klei mmuiñ djuê ana msĕ si đơs ting đơs loong, tam pơ̆t, kồng yai mnuih

K’Ho- Mạ ôh, kâo čang hmăng jih jang mnuih ƀuôn sang hrăm mbĭt lŏ čuê leh anăn kriê pioh klei jăk siam djuê ana yuôm bhăn.”

Bŏ 22 thŭn mđung asăp, phung mkŏ mjing Hdră mđung asăp klei K’Ho mơ̆ng Sang mđung asăp blŭ Việt Nam mâo lu klei thâo. Jih jang phung čih mkra hdră, phung mblang, mđung asăp jing hriê mơ̆ng ƀuôn sang ti čar Lâm Đồng, hriê hŏng sang mđung asăp blŭ Việt Nam ti Lăn Dap Kngư, ti ƀuôn prŏng Ƀuôn Ama Thuôt, Dak Lak čiăng hlue ngă bruă yuôm bhăn anei. Êbeh 20 thŭn siă suôr hŏng hdră, phung čih mkra hdră amâo djŏ knŏng ngă jăk bruă mblang, răng hŏng klei blŭ djuê ana pô hlăm hdră mđung asăp ôh, ƀiădah lŏ mâo dŭm gưl hiu čih ti ƀuôn sang krĭng taih kbưi, bi tuôm hŏng ƀuôn sang, hmư̆ ênhiang mmuiñ djuê ana leh anăn mkŏ mjing klei čih, klei bi trông mâo mngăt êwa Lăn Dap Kngư. K’Brọp, K’iăng Khua adŭ bruă klei blŭ djuê ƀiă, Sang mđung asăp blŭ ti Lăn Dap Kngư, Khua hđăp Êpul mđung asăp klei K’Ho bi êdah:

 “Êbeh 22 thŭn siă suôr hrăm mbĭt hŏng Hdră mđung asăp klei K’Ho, 7 thŭn jing K’iăng Khua adŭ bruă klei blŭ djuê ƀiă, wăt hlăm ya bruă ngă, kâo ăt gĭr bi leh bruă dưi jao. Ƀri gưl bi hdơr 22 thŭn Hruê mđung asăp tal êlâo Hdră mđung asăp klei K’Ho, kâo hơêč hmưi kơ jih jang ayŏng amai adei mkŏ mjing hdră mđung asăp klei K’Ho mâo klei suaih pral, kjăp klei kđi čar, thâo hĭn kơ bruă knuă, lŏ jing phung mkŏ hdră êlan mơ̆ng Đảng leh anăn Knŭk kna truh hŏng mnuih K’Ho hŏng klei blŭ djuê ana pô, đru răng kriê dhar kreh djuê ana K’Ho mơ̆ng hdră mđung asăp leh anăn hla pok web, čiăng kơ hdră mđung asăp klei K’Ho jing mnơ̆ng amâo dưi kƀah ôh leh anăn jĕ giăm hŏng mnuih K’Ho.”

22 thŭn êgao, Hdră mđung asăp klei K’Ho mbĭt hŏng 5 hdră mđung asăp blŭ mnuih djuê ƀiă mkăn ti krĭng Lăn Dap Kngư: Êđê, Jarai, Bahnar, Sêdang leh anăn Mnông răng kriê kjăp ai tiê bi hgŭm, hrăm mbĭt ngă jăk bruă hâo hưn hdră êlan mơ̆ng Đảng leh anăn Knŭk kna truh hŏng mnuih djuê ƀiă. Hdră mđung asăp blŭ klei K’Ho jing ƀĭng găp siă suôr hŏng mnuih ƀuôn sang Lăn Dap Kngư./.