7 thŭn sa blư̆, hlue si klei bhiăn, mnuih Chăm ti kdriêk Tuy Phong, čar Bình Thuận lŏ mkŏ mjing Knăm akâo klei êđăp ênang. Anei dưi dlăng jing klei yuôm bhăn hŏng êpul êya mnuih Chăm. Khua kiă kriê klei đăo Thường Xuân Hữu, Khua êpul hgŭm phung đăo Bàlamôn čar Bình Thuận brei thâo:

 Knăm anei 7 thŭn mkŏ mjing 1 blư̆. Êlâo dih kyua  bruă duh mkra dleh dlan anăn mnuih ƀuôn sang amâo dưi mkŏ mjing ôh knăm anei, truh thŭn 2023 anei kơh mkŏ mjing Knăm akâo klei êđăp ênang ti êa ksĭ anei. Knăm anei jing prŏng snăk, amâo ênưih ngă ôh. Čiăng dưi ngă knăm anei brei mâo djăp ênŭm phung đăo Chăm Bàlamôn leh anăn Chăm Islam Bàni mguôp mbĭt, bi tŭ ư ruah hruê mlan pioh ngă”

Hlue si klei bhiăn, Knăm akâo klei êđăp ênang dưi mkŏ mjing hlăm dua hruê. Djăp êpul đăo srăng mdơ̆ng wăl hjăn leh anăn ngă klei ngă yang hlue si klei đăo pô, ƀiădah ăt hlue si boh klei klă klơ̆ng, ti gŭ klei gĭt gai mơ̆ng phung khua kiă kriê klei đăo.

Knăm akâo klei êđăp ênang dưi ngă hŏng bruă phung Kapah, Paseh (phung khua đăo Chăm Bàlamôn) hlue ngă knăm suôt klei amâo myun mơ̆ng wăl lăn mkŏ mjing knăm ngă yang, kñăm suôt klei jhat, ba klei êđăp ênang kơ bruă mkŏ mjing knăm ngă yang. Leh anăn, Ka-ing (khua phung đăo Chăm Bàlamôn) ngă knăm

Rija Harei, msĕ si sa klei bhiăn hưn hŏng phung yang kơ bruă ruah anôk mkŏ mjing knăm mơak msĕ si mta phŭn mơ̆ng bruă mkŏ mjing. Mjưh ruê̆ knăm Rija Harei snăn truh dŭm gưl phung khua êmua hlăm djăp êpul đăo hrăm mbĭt mkŏ mjing klei ngă yang hjăn pô. Jih jang klei ngă yang mđing kơ mnuih ƀuôn sang čang hmăng klei suaih pral, akâo kơ adiê hlĭn hjan djŏ yan, boh mnga lu, kơ mnuih ƀuôn sang trah mă kan hdang hơĭt ai tiê nao mă bruă.

Phung Chăm dlăng Knăm akâo klei êđăp ênang jing yuôm bhăn snăk. Êlâo dih, lu ƀuôn sang Chăm mkŏ mjing, boh nik dŭm ƀuôn hdĭp giăm êa ksĭ. Diñu lač aduôn aê êlâo dih ăt hdĭp mda hŏng bruă trah mă kan kbưi hŏng hang. Knăm akâo klei êđăp ênang mkŏ mjing ti hang ksĭ ăt čiăng hdơr kơ aduôn aê đưm leh anăn wah lač akâo kơ diñu ngă bruă tŭ jing. K’iăng nai prŏng, nai prĭn Thành Phần, Khua hđăp Anôk bruă ksiêm hriăm kreh knhâo Việt Nam leh anăn Ngŏ Dhŭng Asi brei thâo:

Knăm akâo klei êđăp ênang anei mâo mơ̆ng đưm, ƀuôn Chăm mkŏ mjing sơăi (ƀuôn Chăm ti Parang, Parik, Kraong, Pajai) ƀiădah êdei anei luč ram, knŏng dôk ti ƀuôn Chăm ti kdriêk Tuy Phong adôk ngă. Knăm akâo klei êđăp ênang dưi mkŏ mjing ti hang ksĭ, anôk êa đoh hlăm êa ksĭ. Hdră kñăm knăm anei akâo kơ lăn čar, ƀuôn sang êđăp ênang, êa hlĭm hjan djŏ yan, boh mnga mâo lu.  Knăm anei jing yuôm bhăn, bi êdah klei bi mguôp mơ̆ng dua klei đăo Bàlamôn leh anăn Islam Bàni.

    Amâo kdrưh kơăm msĕ si Knăm mơak Katê amâodah Ramưwan ƀiădah Knăm mơak akâo klei êđăp ênang hmăi kơ ai tiê prŏng snăk hlăm êpul êya Chăm hlăm kluôm kdriêk, đru hyuă kjăp klei bi mguôp dua klei đăo hlăm êpul êya Chăm. Amai

Thường Thị Mỹ, ti alŭ Lạc Trị, să Phú Lạc, kdriêk Tuy Phong brei thâo:

“Hriê hlăm knăm anei ƀuh ai êwa mơak snăk. Mơ̆ng anei, răng kriê klei bhiăn hdĭp mda mnuih Chăm kơ ênuk anak čô êdei anei. Mnuih Chăm tinei mâo dua klei đăo, sa jing Bàni, sa jing Bàlamôn hrăm mbĭt mkŏ mjing sa knăm mơak jing jăk snăk”

 Djuê ana Chăm ti kdriêk Tuy Phong mâo êbeh 2000 gŏ êsei hŏng êbeh 10 êbâo cô. Hlăm dŭm thŭn êgao, mbĭt hŏng klei mđing mơ̆ng Đảng, Knŭk kna, klei hdĭp mda mnuih ƀuôn sang Chăm ti kdriêk Tuy Phong, čar Bình Thuận dưi mđĭ hlăm jih jang bruă duh mkra, dhar kreh, ala ƀuôn.

 Bruă mkŏ mjing Knăm akâo klei êđăp ênang amâo djŏ knŏng suôt klei jhat, amâo jăk, amâo myun hlăm klei hdĭp grăp hruê ôh, dŭm mta klei amâo jăk kơ anak mnuih ƀiădah lŏ jing akâo klei suaih pral, hlĭm hjan djŏ yan, boh mnga mâo lu. Boh nik jing klei bi hgŭm, bi mguôp dua klei đăo hlăm êpul êya Chăm. Mơ̆ng anăn, hyuă kjăp klei bi mguôp plah wah dŭm ƀuôn Chăm./.