Hŏng akŏ “Klei êđăp ênang kơ anak mnuih”, mlam mphŭn pŏk DIFF 2023 ba kơ hdră kdŏ mmuiñ jăk siam hŏng 2 klei rang mdah phao briêng mơ̆ng 2 êpul Việt Nam leh anăn Finland lač kơ rup jăk siam kơ klei bi hgŭn leh anăn êđăp ênang.

Mlam mphŭn pŏk lŏ mâo klei rang mdah jăk siam, đru kơ phung dlăng hrăm mbĭt dlăng lu dhar kreh dlông rŏng lăn, hlăm sa wăl kdŏ mmuiñ. Blŭ hrăm hlăm knăm mphŭn pŏk, Lê Trung Chinh,  Khua Knơ̆ng bruă sang čư̆ êa ƀuôn prŏng Đà Nẵng mñă klă: Knăm mơak mnah phao briêng lu ala čar jing klei ktưn hưn mơ̆ng Đà Nẵng, mbĭt anăn ăt jing sa klei lông dlăng čiăng kơ ƀuôn prŏng amâo mdei gĭr ktưn, lŏ dơ̆ng mđĭ hnơ̆ng jăk mkŏ mjing leh anăn rang mdah kñăm mkŏ mjing anăn knăm Knăm mơak mnah phao briêng Đà Nẵng ƀrư̆ hruê năng hŏng klei čang hmăng mơ̆ng grăp čô mnuih.  Leh knăm mphŭn pŏk jing klei rang mdah mơ̆ng êpul mnah phao briêng Việt Nam.