Mkŏ mjing hlăm 2 hruê mơ̆ng 14 – 15/4, hruê knăm mâo giăm 800 čô thâo mbruă, knuă druh, phung mă bruă knŭk kna, dŭm djuê ana ti 17 kdriêk, wăl krah, ƀuôn prŏng hlăm čar nao hgŭm. Nao hŏng knăm mơak, dŭm êpul thâo mbruă srăng lŏ hƀuê wĭt dŭm mta bruă đưm msĕ si: tông čing čhar, klei mmuñ ênhiăng djuê ana, kdŏ, rang mdah kdrăp pĕ tông djuê ana, krah rup, hrĭ mñăm, pơ̆k mñam.

Hruê knăm Dhar kreh dŭm djuê ana čar Gia Lai jing wưng čiăng kơ dŭm djuê ana mnuih djuê ƀiă hlăm čar bi tuôm, mjĕ êrô, kah mbha klei thâo leh anăn hyuă kjăp hĭn klei bi mguôp. Leh knăm pŏk jing klei rang mdah dhar kreh tông čing čhar mơ̆ng dŭm êpul phung thâo mbruă. Lu phung tuê dưi ñŭ kma mbĭt hŏng ai êwa knăm mơak leh anăn klei kdŏ čhuang krĭng Lăn Dăp Kngư.