Mkŏ mjing mơ̆ng ară anei truh kơ jih mlan 4, klei rang mdah “Kdrăp čŭt hơô knhuah gru dŭm djuê ana ti čar Dak Lak” mâo 175 kdrăp čŭt hơô leh anăn rup, mnơ̆ng dhơ̆ng mơ̆ng 48 djuê ana dôk hdĭp mda ti čar Dak Lak.

Dŭm mta mnơ̆ng anăn dưi rang mdah jing 8 akŏ bi djŏ hŏng 8 êpul klei blŭ, hưn mdah kơ knhuah dhar kreh, klei hdĭp mda mơ̆ng êpul êya dŭm djuê ana hŏng dŭm kdrăp čŭt hơô djuê ana, mnơ̆ng bi msiam leh anăn mnơ̆ng yua grăp hruê. Mbĭt hŏng anăn, hlăm klei rang mdah lŏ mâo dŭm mta bruă msĕ si: pơ̆k mñam, hưn mdah dŭm mta mnơ̆ng jăk yâo mơ̆ng Dak Lak, tŭk knă leh anăn lông ƀơ̆ng dŭm mta mnơ̆ng ƀơ̆ng jăk yâo mơ̆ng mnuih Êđê. Wưng anei, sang rang mdah hƀuê ênuk Dak Lak ăt hưn mdah bruă mlih mrô dưi hluê ngă ti anôk bruă msĕ si: ba mdah leh anăn ba yua kdrăp čŏng hlăk mblang đru kơ phung tuê hiu čhưn ênguê, mtô kơ phung tuê yua app čuă dlăng hlăm dŭm kdrăp điển tử thâo mĭn, ktuê dlăng dŭm mta mnơ̆ng hŏng kdrăp wăl 3D, lông ngă dŭm mta bruă hŏng kdrăp thực tế ảo.