Dưi mkŏ mjing hŏng klei kdrăm k’ah, Festival mâo mdah leh hŏng mnuih dlăng lu mta jăk snăk, mpŭ mni kơ klei tŭ dưn čing čhar lăn dap kngư, mpŭ mni kơ pô djă pioh jih jang knhuah gru dhar kreh yuôm bhăn djăp djuê ana msĕ si Jrai, Bahnar, ÊĐê, Xê Đăng, Giẻ Chiêng, Mnông… 

jing phung hdĭp hlăm duôr čư̆ prŏng mơ̆ng Kon Tum, Gia Lai, Đak Lak, Đak Nông, Lâm Đồng. Ti Festival, čar Gia Lai mâo tŭ mă klei tŭ yap knhuah gru dhar kreh hnơ̆ng lăn čar mơ̆ng khua knŭk kna mđup brei, hŏng anôk jing knhuah gru Rộc Tưng – Kbuôn boh tâo, lehanăn tŭ mă mnơ̆ng lăn čar tŭ yap kdrăp ênuk đưm An Khê.

Hlăm “hrue kăm dhar kreh – hiu čhưn ênguê čar Gia Lai thŭn 2023”, êbeh 1000 čô mnuih mbruă hriê mơ̆ng 5 boh čar ti lăn dap kngư nao hlăm klei ruĕ čing čhar hlăm êlan klông, mâo lu mnuih nao dlăng.

Ba čing čhar truh hŏng ƀuôn prŏng, ăt jing klei dŭm boh čar ti lăn dap kngư bi kriê piohlehanăn mđĭ bi lar knhuah gru dhar kreh čing čhar, jing leh knhuah gru dhar kreh amâo mâo êdah klă kơ anak mnuih. Mơ̆ng knăm mơak anei mjing leh anôk mjĕ mjuk, bi tuôm dhar kreh, mđĭ hĭn klei thâo bi mguôp, bi thâo săng lehanăn bi đru hdơ̆ng găp plah wah djăp djuê ana hlăm čar Gia Lai lehanăn jih jang djăp djuê ana hdĭp ti lăn dap kngư anei./.