Mmăt mbruê 21/1, ti wăl tač Hùng Vương, ƀuôn prŏng Việt Trì, čar Phú Thọ bi mguôp hŏng Phŭn bruă dhar kreh, mjuăt ktang asei mlei leh anăn hiu čhưn ênguê mkŏ mjing knăm pŏk knăm mơak sang k’kuh kơ mtao Hùng, Hruê kăm dhar kreh – Hiu čhưn ênguê thŭn 2023.

Klei rang mdah kluôm ala knơ̆ng kriê pioh amâo êdah klă mâo UNESCO čih yap leh anăn bi hdơr 20 thŭn hluê ngă klei kuôl kă thŭn 2003 mơ̆ng UNESCO. Blŭ hrăm hlăm knăm pŏk, k’iăng Khua knŭk kna Trần Hồng Hà lač klă, kriê pioh, mkŏ mjing leh anăn mđĭ kyar boh tŭ dưn dhar kreh djuê ana jing kmeh gơ̆ng klei hdĭp, msĕ si Khua gĭt gai Đảng Nguyễn Phú Trọng mñă leh hlăm klei hưn mơ̆ng phung nao êlâo hlăm klei kƀĭn trông Dhar kreh kluôm ala thŭn 2021 “Dhar kreh adôk, djuê ana adôk”. Hŏng 15 mnơ̆ng kriê pioh amâo êdah klă mâo leh UNESCO čih yap, Việt Nam jing sa hlăm dŭm ala čar mâo lu mta dhar kreh yang ƀuôn dưi tŭ yap dlông rŏng lăn. Leh kdrêč pŏk mkŏ mjing hdră rang mdah hŏng akŏ “Myưng m’ang phŭn agha, krĭng lăn Hùng Vương”. Hdră mâo 3 kdrêč: Myưng m’ang phŭn agha, krĭng lăn Hùng Vương”, mnơ̆ng kriê pioh leh anăn klei hmăng hmưi Lạc Hồng.