Dơ̆ng mơ̆ng čang rang aguah ưm ôk, ung mô̆ K’Tồch, ti alŭ anôk dôk Kon Tách Đăng, wăl krah Đinh Văn, kdriêk Lâm Hà, čar Lâm Đồng kgŭ ưm čiăng mprăp djăp mnơ̆ng mnuă nao atăt anak êkei jing K’Thăi nao wĭt kơ sang mô̆. Jih jang djăp mta mnơ̆ng mâo mprăp leh ênŭm, ƀiădah ka hơĭt mơh ai tiê, diñu lŏ dơ̆ng ksiêm bi mklă sa blư̆ dơ̆ng. K’Tồch lač:  “Klei bhiăn atăt êkei nao kơ sang mniê dưi mkŏ mjing mtam leh ruĕ klei bi êmuh. Diñu srăng hưn êlâo kơ sang mniê thâo. Tơdah dua gŏ sang jing kbưi srăng nao hưn êlâo kơ sang mniê mâo hlăm sa hrue kăm. Bi tơdah giăm snăn bi nao hưn êlâo kơ anăn 1; 2 hrue”.

Hlăm klei bi dôk ung mô̆ mnuih K’ho, tơdah mâo sa čô mniê khăp čiăng kơ sa čô êkei, ñu srăng nao hưn hŏng amĭ ama, nao bi mtruh brei klei blŭ hŏng sang êkei. Tơdah mâo klei bi tŭ ư sang êkei brei ngă klei kuôl kă, ruah hrue mkŏ mjing klei bi kuôl, lehanăn jih jang bruă mprăp kơ klei bi kuôl anăn mơ̆ng sang mniê sơăi mprăp.

Klei bhiăn atăt êkei nao kơ sang mniê, kreh lŏ mkŏ mjing êdei kơ klei bi êmuh hlăm brô sa hrue kăm. mdê hŏng klei đĭ êmuh kreh mkŏ mjing êjai mlam, snăn klei atăt êkei nao kơ sang mniê mkŏ mjing hlăm aguah ưm. K’Tồch brei thâo:  Mnuih K’ho amâo mâo čoh čuăn hrue jăk hrue siam ôh, ƀiădah knŏng ruah sa hrue djŏ hlăm wưng bi mdei bruă pưk hma. Klei bi kuôl ung mô̆ mnuih K’ho jing tui hlue hŏng pô pŏk êlan, snăn atăt êkei nao sang mniê ăt mơ̆ng pô bi truh asăp anăn mơh. “Mphŭn dô nao atăt êkei nao kơ sang mniê knŏng ƀiă mnuih đuič, nao mbĭt hŏng pô atăt. Pô atăt jing amiêt khua awa mduôn nao atăt êkei dôk mô̆ truh kơ sang mniê. Nao mbĭt mâo amĭ ama, ayŏng amai adei êkei dôk mô̆ anăn đuič”.

Drông êkei nao sang mô̆, snăn sang mniê mprăp ŭn, mnŭ, kpiê čeh jum sang êkei. Hrue anăn, sang mniê srăng čuh dua drei ŭn. Tui si klei bhiăn, sa drei pioh drông sang êkei hua knăm, bi sa drei jing mbha mdua, mkrah kơ sang êkei huă ƀơ̆ng, mkrah pioh kơ sang êhei ba wĭt, pioh bi mbha kơ mnuih nao atăt êkei hrue anăn. Lehanăn klei brei mâo, amâo mâo dưi kƀah ôh anăn jing kpiê čeh. Bi tĭng kơ sang êkei, ăt mâo mơh mnơ̆ng djă ba êjai nao kơ sang mniê. “Hrue atăt êkei nao kơ sang mniê bi djă ba jing bŭng, kgă, añuê, abăn aê, čhum ao lehanăn dŭm boh hmăm. Anei yơh jing mnơ̆ng sang êkei djă ba truh kơ sang mniê”.

Êlâo kơ phung mơ̆ng sang êkei čhuang đĭ boh êñan, snăn tĭng kơ sang mniê mkŏ mjing klei drông sang êkei snei. Sang mniê siap hla mtei ti anăp boh ƀăng mŭt hlăm sang, lehanăn truh kơ klei lŏ mâo klei bhiăn sač êa kơ pô bi ala kơ sang êkei kñăm čang hmăng kơ ung mô̆ mrâo mâo nanao klei êđăp ênang, hdĭp jăk yâo. Leh čhuang mŭt hlăm sang mniê, phung mơ̆ng sang êkei, srăng mâo sang tĭng kơ mniê bi băk añŭ čih yap klei bi mguôp dua djuê anei mbĭt. K’Tồch lač: “Sang mniê drông sang êkei hŏng klei bhiăn sač êa. Sang mniê dôk ti anăp boh ƀăng, sač êa ngă klei bi ala hlăm mnuih mơ̆ng sang êkei. Diñu sač êa ti adhei amâodah ti kđiêng jơ̆ng. Sang mniê bi băk añŭ hơêč hmưi kơ sang êkei, bi tơdah amâo mâo ôh añŭ, snăn sang mniê tĭng hŏng prăk mđup brei kơ sang êkei, ƀiădah amâo mâo bi myuôm ôh dŭm ênoh, knŏng khă bi mđup brei hŏng klei bi ala”.

Leh mŭt hlăm sang, sitôhmô êkei dôk mô̆ yap jing mnuih sang mniê leh. Mmông anei pô atăt srăng djă ti kngan êkei dôk mô̆ dưm ti kngan mô dôk ung, jao êkei dôk mô̆ kơ sang mniê. Čang hmăng kơ sang mniê yap jing msĕ si anak kkiêng hlăm sang pô yơh. Leh kơ anăn dua gŏ sang srăng ruah hrue mkŏ mjing ƀơ̆ng huă klei bi kuôl ung mô̆.Tui hlue hŏng klei thâo mâo mơ̆ng sang mniê, srăng mkŏ mjing klei huă ƀơ̆ng bi kuôl ung mô̆ leh ruĕ ênŭm klei bhiăn atăt êkei kơ sang mniê. Bi tơdah gŏ sang mniê dôk hlăm klei dleh dlan, snăn sang mniê knŏng čuh ŭn jum sang êkei huă ƀơ̆ng, lehanăn čuh ŭn pioh kơ sang êkei djă ba wĭt”.

Leh bi ruĕ ênŭm jih jang klei bhiăn drông sang êkei, snăn sang mniê srăng jao ênoh ngăn pnŭ tui si sang êkei čoh čuăn. Bi tơdah ka djăp ôh snăn srăng ƀuăn tla êdei. Knăm atăt êkei kơ sang mniê bi ruĕ hŏng klei huă ƀơ̆ng mâo sang mniê mkŏ mjing. jih jang mnuih bi huă mnăm hơ̆k mơak kơ dua čô ung mô̆ mrâo./.