Hŏng ênai tông ayŭ, 6 čô mniê êra Mông hŏng kdrăp čŭt h’ô ƀlêč ƀliê lu mta êa mil dôk kdŏ êdu ê’un ênhiang Sênh Tiền. Amai Ma Thị Huế, ti să Čư̆ Kroă, kdriêk Mdrak brei thâo: Sênh Tiền jing sa ênhiang kdŏ mơ̆ng đưm mnuih Mông, kreh kdŏ hlăm dŭm knăm m’ak, Têt hat. Khă snăn, ti krĭng ƀuôn sang mrâo Dak Lak, ênhiang kdŏ anei ƀiă snăk mnuih thâo. Knŏng truh mâo klei bi lông Phung êdam êra mmuñ ênhiang mmuñ djuê ana lehanăn mdah kdrăp tông ayŭ djuê ana snăn kơh mâo mmông lŏ hriăm lehanăn tui ksiêm kơ ênhiang kdŏ jăk siam anei. “Êpul mâo 6 čô, hriăm hlăm brô 1 mlan kơh dưi kdŏ msĕ snei, ară anei hriăm mâo phung mduôn mtô. Kâo m’ak lehanăn ktưn hưn êdi, dưi hriăm ênhiang kdŏ anei kâo dưi thâo djuê ana pô mâo sa knhuah dhar kreh jăk siam êdi. Kâo thâo knhuah dhar kreh djuê ana, dhar kreh pô mâo lu êdi, pô ka thâo đuič”. 

Bi hŏng adei H Chuyên Knul, ti ƀuôn Mblơt, să Êa Bông, kdriêk Krông Ana, klei bi lông jing wưng čiăng bi êdah klei ktưn hưn hŏng hdră tông čing jăk siam mơ̆ng mnuih Êđê Bih. Amai H’Chuyên brei thâo, mơ̆ng yan bhang thŭn êlâo, adei hriăm tông čing Jhô. Hŏng klei mtô mơ̆ng phung mbruă ti alŭ wăl, adei dưi thâo mnuih Êđê Bih mâo čing Jhô brei hjăn kơ phung mniê tông. Kâo ƀuh khăp êdi kơ djuê ana lehanăn dhar kreh djuê ana pô. Lehanăn kâo čang hmăng dưi lar bra knhuah dhar kreh jăk siam mơ̆ng djuê ana pô truh hŏng jih jang mnuih.

Klei bi lông phung êdam êra mmuñ ênhiang djuê ana lehanăn mdah kdrăp tông ayŭ djuê ana pô jing hdră hlăm Hruê m’ak kâo khăp čiăng kơ ƀuôn sang kâo mâo bruă Đoàn čar Dak Lak mrâo mkŏ mjing. Giăm 30 hdră kdŏ mmuñ, 300 čô nao hgŭm jing phung đoàn viên, êdam êra lehanăn phung hđeh êlăk ti 15 kdriêk, wăl krah, ƀuôn prŏng hlăm čar mâo bi êdah leh dŭm ênhiang mmuñ djuê ana, ênhiang kdŏ mơ̆ng đưm, kdrăp tông ayŭ djuê ana ti dŭm krĭng kwar hlăm kluôm ala. Mơ̆ng dŭm hdră rông čing Jhô, čing kông, čing kram, brô̆ T’rưng, đĭng năm truh kơ brô̆ tĭnh, sáo mèo, dŭm klei ngă Eiỉei, mmuñ then, mmuñ lý, ví dặm, ênhiang mmuñ kwar Dhŭng… mjing leh sa wăl anôk kdŏ mmuñ jăk êdi. Amai H’ Tuyết Niê, ti ƀuôn Čuôr Dăng A, să Čuôr Dăng, kdriêk Čư̆ Mgar brei thâo:Hlăm dŭm klei bi lông msĕ snei, mjing leh lu klei găl čiăng kơ hmei lŏ tui ksiêm hriăm lu klei thâo mơ̆ng dŭm êpul bi lông mkăn. Lehanăn ăt đru kơ hmei lŏ mâo klei thâo săng čiăng hriăm mbŏ klei khap hlăm bruă tông čing lehanăn dŭm kdrăp tông ayŭ mkăn mơ̆ng djuê ana pô.

Hluê si klei tĭng dlăng mơ̆ng Anôk bruă mkŏ mjing, klei bi lông dưi bi êdah leh klei lu jơr knhuah dhar kreh mơ̆ng dŭm djuê ana dôk hdĭp ti čar Dak Lak. Grăp klei bi lông mâo klei duh wăt kơ boh phŭn, kdrăp mnơ̆ng, kdrăp čŭt h’ô lehanăn hdră mdah. Mbĭt hŏng anăn, mă klei hriăm mơ̆ng dŭm êpul bi lông êlâo anăn mâo leh klei hgŭm mơ̆ng lu phung hđeh. Lê Văn Hồng, Sang hră gưl krah ksiêm hriăm bruă dhar kreh – kdŏ mmuñ čar Dak Lak, Khua anôk bruă mkŏ mjing klei bi lông brei thâo: Anôk bruă mkŏ mjing thŭn anei tĭng dlămg myuôm êdi klei hgŭm mơ̆ng dŭm êpul, boh nik klei bi lông tông ayŭ kdrăp djuê ana, jăk êdi. Boh nik dŭm klei nao hgŭm mơ̆ng phung hđeh ti dŭm kdriêk taih kbưi, msĕ si Krông Bông, Lăk. Khădah dôk điêt ƀiădah phung hđeh hrăm mbĭt hŏng grăp ênhiang kdŏ, ênhiang mmuñ, ba wĭt leh klei tŭ jing kơ hruê m’ak anei”.

Klei tŭ jing mơ̆ng klei bi lông đru krŭ wĭt lehanăn lar bra hlăm phung đoàn viên, êdam êra, hđeh êlăk Dak Lak klei khăp kơ dŭm ênhiang mmuñ, dhar kreh djuê ana čiăng krơ̆ng kjăp lehanăn mđĭ lar hĭn./.