Dŭm hruê êgao, ti ƀuôn prŏng Kon Tum, čar Gia Lai hơ̆k mơak hŏng klei nao hgŭm mơ̆ng giăm 500 čô bi lông hlăm klei bi lông mjuăt ktang asei mlei dŭm djuê ana mnuih djuê ƀiă kluôm ala gưl tal 13, alŭ wăl II thŭn 2023. Dŭm anôk bi lông hlăm ƀuôn prŏng mâo klei uêñ mĭn leh anăn nao mđĭ ai mơ̆ng mnuih ƀuôn sang alŭ wăl. Phung bi lông bi êdah ai tiê bi lông kdlưn hĭn. Pô bi lông Quách Ngọc Hoan, Êpul bi lông mơ̆ng čar Dak Lak brei thâo.

“Klei bi lông thŭn 2022, Êpul bi lông čar Dak Lak mâo mă klei pah mni kluôm êpul hlăm klei bi lông mnah hna. Êpul bi lông mơ̆ng čar Dak Lak nao hŏng klei bi lông mjuăt ktang asei mlei dŭm djuê ana mnuih djuê ƀiă thŭn anei êpul hmei mâo klei gĭr êdi. Khădah mâo lu êpul bi lông kdlưn hĭn kơ klei mnah hna msĕ si Bình Định, Gia Lai, Kon Tum, Quảng Ngãi, ƀiădah hlăm klei hriăm mjuăt êpul hmei ăt gĭr jih ai čiăng hriăm mjuăt, gĭr jih ai pô čiăng răng mgang boh tŭ klei bi lông msĕ hŏng thŭn êlâo”.

Hlăm gưl bi lông anei, Gia Lai, Dak Lak leh anăn Kon Tum jing dŭm anôk bruă nao hgŭm 7 mta bi lông. Nguyễn Văn Ý – K’iăng khua knơ̆ng bruă Dhar kreh – mjuăt asei mlei leh anăn hiu čhưn ênguê brei thâo: 10 thŭn leh Gia Lai lŏ jing čar mkŏ mjing klei bi lông gưl ala čar. Anei jing hdră bruă prŏng, amâo djŏ knơ̆ng dŭm klei bi lông mjuăt asei mlei, ƀiădah lŏ jing anôk mjĕ êrô, anôk bi kƀĭn mơ̆ng dŭm djuê ana ayŏng adei. Êpul nao bi lông mơ̆ng čar Gia Lai dưi bi mbŏ hŏng phung bi lông mda asei. Boh nik klei bi lông mnah hna mâo lu phung bi nao bi lông kdlưn hĭn. Diñu dưi hriăm mjuăt hlăm dŭm gưl bi lông mjuăt ktang asei mlei kluôm čar thŭn 2022. Pô bi lông Rơ Čom Dác, mơ̆ng êpul bi lông čar Gia Lai brei thâo:

“Anei jing gưl tal 4 phung hmei nao bi lông gưl ala čar, hlăm 3 gưl bi lông êlâo kâo mâo mă 6 mêđai êa mah. Thŭn anei kâo mâo mă sa međai êa mah klei bi lông êran 100m, kâo srăng lŏ gĭr mâo mă mêđai hlăm klei bi lông 300m. Kâo hmăng hmưi mđup brei dŭm mêđai anei kơ phung ƀĭng găp, gŏ sang leh anăn brei amĭ ama mâo klei ktưn hưn”.

            Klei bi lông mjuăt ktang asei mlei dŭm djuê ana mnuih djuê ƀiă kluôm ala gưl tal 13, alŭ wăl II amâo djŏ knŏng jing sa tač hlăp lêñ kơ phung bi lông, ƀiădah lŏ jing sa klei găl čiăng bi lar knhuah gru dhar kreh leh anăn klei bi mguôp dŭm djuê ana ayŏng adei. Klei bi lông ăt đru mđĭ kyar bruă mjuăt ktang asei mlei leh anăn hiu čhưn ênguê mơ̆ng alŭ wăl II leh anăn hlăm kluôm lăn čar. Nguyễn Liên Phương k’iăng khua kiă kriê knơ̆ng bruă dhar kreh, mjuăt asei mlei leh anăn hiu čhưn ênguê čar Quãng Ngãi, brei thâo:

“Ai êwa dŭm hruê bi lông jing dŭm êpul hriê bi lông tinei, jih jang 13 êpul mâo klei mơak mnai êdi. Mta kñăm jing mjĕ êrô dhar kreh leh anăn mjuăt ktang asei mlei, čiăng kơ mnuih ƀuôn sang jing mnuih djuê ƀiă dưi bi mjĕ êrô leh anăn ƀrư̆ bi mguôp hĭn”.

Klei bi lông thŭn anei mâo giăm 500 čô bi lông mơ̆ng 13 alŭ wăl mâo mnuih djuê ƀiă hdĭp mda ti alŭ wăl nah dhŭng ƀuôn prŏng Đà Nẵng msĕ si: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Dak Nông, Bà Rịa-Vũng Tàu, Bình Định, Dak Lak leh anăn Quảng Ngãi. Mkă hŏng gưl bi lông tal 12 dưi mkŏ mjing ti Quãng Ngãi thŭn 2022, gưl bi lông thŭn anei lŏ mâo thiăm êpul bi lông mơ̆ng Bà Rịa-Vũng Tàu. Hlăm klei bi lông gưl anei, phung bi lông srăng bi lông 7 mta: bi lông êran, čưng boh, pah boh êkei – mniê, mnah hna, đĭ kwưng, trŭt hlâo leh anăn ktŭng klei. Nao hlăm klei bi lông, pô bi lông Y-Thơ Hwing mơ̆ng êpul bi lông čar Dak Lak brei thâo:

“Kâo leh anăn phung ayŏng adei hlăm êpul bi lông čar Dak Lak hơ̆k mơak êdi kyua klei bi lông anei msĕ si hruê knăm bi mguôp dŭm djuê ana pô leh anăn phung ayŏng adei mâo klei mơak sơnăk. Anei jing wưng čiăng kơ jih jang dŭm mta bi lông dưi mâo klei bi lông hŏng ayŏng adei djuê ana mkăn. Hŏng klei bi lông anei ăt mđĭ ai klei khăp kơ bruă mjuăt ktang asei mlei leh anăn mjuăt pô hluê si gru mngač Awa Hồ dưi bi lar hlăm êpul êya dŭm djuê ana. Hŏng bruă anei ăt jing jing phung bi lông mđĭ hĭn klei thâo leh anăn mâo mă klei tŭ dưn kơ alŭ wăl pô.”

            Klei bi lông mjuăt ktang asei mlei dŭm djuê ana mnuih djuê ƀiă alŭ wăl II dưi mkŏ mjing 2 thŭn 1 blư̆, jing bruă kñăm hluê ngă dŭm hdră êlan mơ̆ng Đảng leh anăn knŭk kna kơ klei mđĭ kyar bruă duh mkra ala ƀuôn, dhar kreh, mjuăt ktang asei mlei kơ mnuih ƀuôn sang dŭm djuê ana mnuih djuê ƀiă. Mđĭ kyar bruă mjuăt ktang asei mlei kñăm mđĭ klei suaih pral, mđĭ hnơ̆ng klei hdĭp dhar kreh, ai tiê kơ mnuih ƀuôn sang, mtrŭt mđĭ bruă hưn mthâo mrâo mrang, mtrŭt mjhar mnuih ƀuôn sang dŭm djuê ana hur har nao hgŭm hlăm hdră “Jih jang mnuih ƀuôn sang mjuăt ktang asei mlei hluê si gru mngač Awa Hô” hŏng ai tiê “Suaih pral čiăng răng mgang ala čar” nao mbĭt hŏng hdră bruă “Jih jang mnuih ƀuôn sang bi mguôp mkŏ mjing klei hdĭp dhar kreh” mơ̆ng nah gŭ.