Dưi mtrŭt mjhar mơ̆ng hruê 23/11 thŭn dih leh anăn truh kơ hruê 21/2 thŭn anei, Klei bi lông rup Kphê Việt Nam – Hdră mkŏ mjing mnơ̆ng kriê pioh dhar keh tar rŏng lăn mâo 4 akŏ klei bi lông kơ bruă mkra mjing kphê Việt Nam , mđĭng truh kơ mta knăm bi mni kơ kphê Việt Nam. Anei ăt jing sa hlăm 18 mta bruă phŭn mơ̆ng Knăm mơak kphê Ƀuôn Ama Thuôt gưl tal 8, thŭn 2023.

Leh 3 mlan mtrŭt mjhar, Êpul mkŏ mjing mâo mă êbeh 1.100 klei bi lông mơ̆ng 170 čô bi lông hriê mơ̆ng 30 čar, ƀuôn prŏng hlăm kluôm ala. Hlăm klei hrong ruah, dưi ruah mă 76 pŏk rup bi lông čiăng rang mdah leh anăn mđup brei klei pah mñi kơ phung bi lông, mâo 4 klei pah mni kldưn hĭn hŏng 4 akŏ klei bi lông, 10 klei pah mni mđĭ ai leh anăn 1 klei pah mni mơ̆ng phung ktuê dlăng hrŏng ruah. Hluê si klei bi klă mơ̆ng Êpul mkŏ mjing, mâo lu pŏk rup siam, boh hŏng ai tiê, đru bi lar rup kphê Việt Nam, bi lar rup kphê Ƀuôn Ama Thuôt truh hŏng êpul êya khăp kơ kphê dlông rŏng lăn.