Mơ̆ng leh pin êa ti ƀuôn K’Li A (ƀuôn hgŭm Đạt Hiếu, wăl krah Ƀuôn Hô, čar Daklak) dưi lŏ kơrŭ wĭt bi msiam khădah hlăm sang pô mâo leh êa kbăng, ƀiădah H’En Niê ăt kreh nao djăt êa ti pin êa. H’ En mâo leh amĭ mtô thâo mkra kpei mơ̆ng hla kyâo pioh knă kpiê. H’ En ƀai hĭn mơh mơak leh thâo kơ ƀuôn pô mrâo mkŏ mjing êpul hgŭm bruă lŏ hma truăn kơ bruă pla mjing dŭm mta mnơ̆ng tui si knhuah bhiăn pô đưm, hlăm anăn mâo wăt bruă knă kpiê. Mgi dih mâo mta kpiê čeh djăp ênoh čuăn OCOP ƀuôn K’Li A amâo mâo djŏ knŏng pioh kă hlăm dŭm knăm mơak mñai ôh mơ̆ng ƀuôn huă mnăm ôh, ƀiădah jing mnơ̆ng pioh jum tue hiu čhưn dhing, lehanăn čhĭ lar truh hlăm djăp krĭng kwar kluôm ala.

 “Kâo čang hmăng dŭm gưl bruă sang čư̆ êa, mkŏ mjing adŭ mjuăt bi hriăm kơ phung hđeh hl ăm ƀuôn K’Li A mâo hriăm knhuah gru djuê ana pô. Phung hđeh mniê hriăm đêč giêng, hriăm knă kpiê čeh, phung hdeh êkei hriăm hrĭ mñam, hriăm djăp kdrăp pĕ tông ayŭ mơ̆ng djuê ana pô. Mâo msĕ snăn kơh dưi bi kriê pioh knhuah gru dhar kreh pô”.

 Klei hdĭp mnuih ƀuôn sang Ê Đê ti ƀuôn K’Li A lu jing hdĭp hŏng bruă pưk hma, pla kphê, tiu, boh durian. Amĭ kkiêng lehanăn đĭ hriê kơ prŏng hlăm krĭng lăn anei, Y-Chép Mlô ƀuh leh klei bi mlih prŏng mơ̆ng grăp boh sang, klei hdĭp đĭ kyar, amâo lŏ mâo ôh gŏ sang dôk hlăm klei kplŭt aguah kƀah tlam, kăn lŏ mâo rei klei kƀah kdrăp čŭt hơô. Ƀiădah Y-Chép ăt dôk mâo sa klei hnĭng, klei hnĭng kơ klei čiăng lŏ hmư̆ klei yăl dliê khan, êwa čing mñê, asăp đĭng tŭt đĭng năm, đĭng buôt čŏk, thâodah lŏ hmư̆ ênai dôk tăp mdiê ti dlông adring sang... jih jang klei anăn knŏng msĕ si hlăm klei êpei, ƀiădah ară anei msĕ si lŏ dơ̆ng bi ƀuh.  Y- Chép Mlô mơak êdi.

 “Jih jang mnuih hlăm ƀuôn hmư̆ sơăi asăp khua mduôn, khua ƀuôn mtă mtăn brei thâo gĭr duh ƀơ̆ng čiăng kơ klei hdĭp đĭ kyar, mâo mnơ̆ng pioh. Lu gŏ sang mâo mdơ̆ng leh sang prŏng siam, blei mprăp leh djă mnơ̆ng mnuă yua. Ară anei hmei mđing lŏ kơrŭ wĭt bruă dhar kreh djuê ana pô”.

 Y - Ngia Mlô, Khua bruă Đảng Ƀuôn K’ Li A brei thâo hlăm ênoh 277 gŏ êsei hlăm ƀuôn, ară anei knŏng adôk mă 13 gŏ êsei ƀun, mâo leh truh 43 gŏ sang thâo mâo. Ară anei kluôm ƀuôn ăt adôk truh 40 boh sang krum. Mâo 5 gŏ sang dưi lŏ mkra wĭt sang krum, bi msiam dŭm anôk pioh kơ bruă drông tue. Êpul bruă Đảng mrâo lŏ bi mŭt leh 2 čô đảng viên, mđĭ ênoh đảng viên mơ̆ng êpul bruă Đảng mâo leh 17 čô mnuih. Anei jing êpul knơ̆ng kơ bruă mđĭ kyar klei duh mkra ala ƀuôn, lăm lui klei bhiăn amâo lŏ djŏ, kriê pioh knhuah gru dharr kreh jăk siam mơ̆ng anak Ê Đê.

 “Hmei djă pioh nanao knhuah gru djuê ana Ê Đê pô msĕ si: Ngă yang akŏ pin êa, ngă yang asei kơ mnuih ƀuôn sang. Mnuih ƀuôn sang bi thâo knă kpiê čeh, dôk djă pioh sang krum dlông, lehanăn djăp mta kdrăp pĕ tông ayŭ, boh nik jing čing čhar”.

Nguyễn Thị Trúc, Khua bruă Đảng ƀuôn hgŭm Đạt Hiếu lač: Hdră êlan kơ: “Mđĭ kyar klei hiu čhưn dhing hlăm yang ƀuôn, lehanăn bi lar knhuah gru dhar kreh čing čhar, bruă knă kpiê čeh năng bi mjing mnơ̆ng mnuă djăp ênoh čuăn   OCOP” mâo klei bi sa ai mơ̆ng jih jang mnuih hlăm ƀuôn K’Li A. Bruă Đảng jao grăp kdrêč bruă kơ dŭm êpul êya, êpul bruă kđi čar hlăm ƀuôn hgŭm bi hlue ngă. Nguyễn Thị Trúc lač:

 “Bi lar jih jang klei tŭ mơ̆ng dhar kreh hlăm bruă hiu čhưn dhing. Mdưm mta kñăm mđĭ kyar bruă hiu čhưn dhing hlăm yang ƀuôn nao mđrĭng hŏng bruă mđĭ bi lar knhuah gru dhar kreh čing čhar. Lŏ bi kơrŭ bruă knă kpiê čeh, dưi mjing sa mta mnơ̆ng djăp ênoh čuăn OCOP pioh čhĭ kơ phung tue hiu čhưn dhing.”

Čiăng mâo đru kơ êpul hgŭm bruă pơ̆k mñam ƀuôn K’Li A mâo ngă bruă hŏng klei jăk, Êpul hgŭm bruă mniê wăl krah ƀuôn Hô bi mguôp leh hŏng anôk bruă mtô bi hriăm pŏk adŭ mtô bruă dêč giêng, lehanăn mđup brei kơ amai adei mniê 3 kdrăp pơ̆k mñam. Nguyễn Phạm Minh Tiết, Khua êpul hgŭm bruă mniê wăl krah Ƀuôn Hô dôk bi mĭn: Si srăng ngă čiăng mâo hdră hrui blei jih mnơ̆ng amai adei mñam, kñăm đru mđĭ ênoh mâo ba wĭt kơ digơ̆? Digơ̆ dưi hdĭp hŏng bruă anei kơh čhĭndah bruă anei srăng dưi rơ̆ng.

 “Êngao kơ klei đru prăk kăk, mtô bi hriăm hdră duah ƀơ̆ng, snăn asei pô phung jing ƀĭng hgŭm brei mâo mơh hdră êlan pô duah ƀơ̆ng bi jăk, čiăng kơ jih jang mnơ̆ng pô leh mñam mâo čhĭ mnia hŏng klei jăk, truh hŏng mnuih blei yua. Brei mâo ai tiê thâo gĭr, hủ har gĭr ktĭr hlăm jih bruă pô ngă, kñăm mđrăm mbĭt bi kriê pioh knhuah gru dhar kreh djuê ana pô”.

Dôk djăt êa ti pin êa êđăp drưm, mâo aruăt êa kbiă mơ̆ng gŭ lăn, jur hlăm čeh kpiê mâo kă leh ti gơ̆ng. Kngan djă đĭng kpiê, hŏng mnâo ƀâo mngưi kpiê čeh. Ênai čing kwang hlăm dŭm boh sang krum dlông, lă liă hlăm krah kdrăn đang kphê mơ̆ng ƀuôn K’Li A, ƀuôn hgŭm Đạt Hiếu, wăl krah Buôn Hồ./.