Mơ̆ng aguah ưm, ti wăl tač sang kƀĭn yang ƀuôn ƀuôn Ky mâo leh lu mnuih ƀuôn sang nao hlăm knăm mơak. Phung êdam êra đru kơ phung thâo mbruă dap đrĭng čing. Phung mniê êra hŏng kdrăp čŭt hơô djuê ana mprăp kơ klei ngă yang…Mniê êra H’ByLa Ƀuôn Yă brei thâo:

 “Anei jing gưl tal êlâo kâo nao hgŭm hlăm klei ngă yang akâo hjan, ƀiădah kâo ƀuh mơak êdi êjai dưi nao hgŭm hlăm klei ngă yang anei. Klei ngă yang akâo hjan mâo lu knhuah mdê mơ̆ng mnuih Êđê”.

          Ti gŭ ana kyâo prŏng, mnuih ƀuôn sang ngă leh 2 boh pưk leh anăn dŭm mta mnơ̆ng ngă yang. Sa boh pưk kơ yang adiê mbĭt hŏng dŭm mta mnơ̆ng myơr. Bi pưk nah dih jing hjiê ktơr, hjiê mdiê. Ti gŭ pưk anăn jing yang jhat yang liê, pô arăng bi kmhal kyua mčhur čim čap, hlô mnơ̆ng nao bi rai pưk hma. Ti djiêu anăn jing dŭm mta mnơ̆ng ngă yang msĕ si kpiê čeh, mnŭ, mnơ̆ng yua hŏng đrao kram, ruh krah hŏng kyâo dŭm mta hlô mnơ̆ng msĕ si êman, ksua, êmông…

Leh ênai čing kwang, pô ngă yang răk klei ngă yang, hŏng klei hmăng hmưi mâo hjan siam angĭn jăk, mâo lu boh mnga, suô̆t hĕ jih klei amâo mâo jăk mơ̆ng ƀuôn sang. Leh myơr mnơ̆ng ngă yang, pô ngă yang čhuang jơ̆ng rup 4 kiêng bi hmô kơ mbông lŏ, leh ngă klei klei bhiăn rah pla. Ñu nao kơ anăp, 2 bĕ kngan djă 2 bĕ giê smuôr ktăp gŭ lăn, nao êdei jing phung mniê kăp rah mdiê leh anăn čua hĕ lăn. Êjai dŭm aruăt êa lĕ, diñu bi ur driâo, hơ̆k mơak yan buh pla mrâo…

          Nao hlăm klei ngă yang akâo hjan, bà H’Luêč Hđơ̆k, 65 thŭn brei thâo:

          “Kâo mgei ai tiê êdi, kyua ƀuh lŏ mkŏ mjing klei ngă yang hlue si knhuah gru djuê ana Êđê jing grăp thŭn mkŏ mjing sa blư̆ êlâo kơ rah pla, phŭn dô duh msĕ sơnăn. Lŏ hdơr phŭn dô dih dôk điêt kâo kreh nao mơh, ară anei lŏ ƀuh klei ngă yang msĕ sơnăn kâo mơak êdi.

Hluê si mduôn Y- Bang Ƀuôn Yă, ti ƀuôn Ky, ƀuôn hgŭm Thành Nhất, ƀuôn prŏng Ƀuôn Ama Thuô̆t, êlâo dih, klei ngă yang akâo hjan mâo mnuih Êđê kreh mkŏ mjing hlăm wưng mđiă ktang hĭn, čuh êmiêt lŏ hma, guôn hjan hlŏng buh pla. Leh klei hdĭp mlih mrâo, ƀuôn sang đĭ kyar, pưk hma jing jing đang kphê, đang tiu, lu mnuih nao mă bruă kbưi…Bruă mkŏ mjing klei ngă yang ƀrư̆ hruê ƀrư̆ ƀiă. Ƀiădah dŭm thŭn giăm anei, hŏng klei gĭr mơ̆ng knŭk kna, ƀuôn êlan lŏ mkŏ wĭt dŭm klei ngă yang, bi lar knhuah gru dhar kreh, mđing kơ klei hdĭp jăk siam hĭn.

    “Djŏ sĭt čiăng kriê pioh knhuah djuê ana jing klei dleh dlan hŏng ƀuôn Ky, ƀiădah kyua mâo klei uêñ mĭn mơ̆ng ƀuôn hgŭm Thành Nhất, đru leh ngăn prăk brei ƀuôn Ky mkŏ wĭt klei ngă yang akâo hjan. Klei ngă yang anei mâo boh tŭ akâo mâo hjan siam angĭn jăk, ƀuôn sang mâo klei myun, ƀrư̆ hruê ƀrư̆ đĭ kyar, mâo djăp êsei huă djam ƀơ̆ng.”