Hruê mbruê 19/7, ti ƀuôn prŏng Ƀuôn Ama Thuôt, Pô bi ala mơ̆ng Belanda bi mguôp hŏng sang rang mdah Kphê mkŏ mjing knăm pŏk klei rang mdah “Gĭr ktưn – Dŭm klei yăl dliê kơ phung mniê hlăm klei mlih mrâo”. Anei jing sa mta bruă hlăm hdră bi hdơr 50 thŭn mkŏ mjing klei mjĕ giăm plah wah Belanda – Việt Nam.

Mkŏ mjing mơ̆ng ară anei truh kơ jih hruê 19/8 kơ anăp, tinei rang mdah dŭm pŏk rup mơ̆ng 17 čô mă rup ti 13 ala čar, hŏng mta phŭn jing dŭm klei yăl dliê ba klei thâo săng êlam kơ rup phung mniê tar rŏng lăn găn leh klei lông dlăng, klei dleh dlan. Dŭm pŏk rup mâo mă klei pah mni hlăm dŭm klei rang mdah mkŏ mjing ti Belanda ti thŭn 2021, ngă klei amâo mâo dưi wơr hŏng mnuih ƀuôn sang ti ala čar mnga Tulip, Bi êdah klei bi mni kơ klei đru mguôp mơ̆ng phung mniê leh anăn bi êdah klei mpŭ hŏng klei gĭr mơ̆ng diñu.

Hlăm klei rang mdah ăt mâo klei blŭ hrăm hŏng phung tuê msĕ si mniê êra siam Việt Nam H’Hen Niê leh anăn phung mniê mă bruă mnia mblei. Diñu kah mbha leh dŭm klei yăl dliê kơ pô hŏng klei gĭr ktưn găn klei dleh dlan, klei lông dlăng čiăng dưi mâo mă klei tŭ jing leh anăn kơhưm hlăm yang ƀuôn.