Aguah mbruê 6/10, knơ̆ng bruă klei mrâo leh anăn hâo hưn čar Dak Lak bi mguôp hŏng bruă sang čư êa kdriêk Čư̆ Kuiñ mphŭn pŏk klei rang mdah “Hoàng Sa, Trường Sa jing dŏ Việt Nam – Dŭm mnơ̆ng bi klă hƀuê ênuk leh anăn hdră bhiăn”. Anei jing klei hiu rang mdah gưl tal 6 dưi mkŏ mjing ti dŭm alŭ wăl hlăm čar Dak Lak. Êpul mkŏ mjing rang mdah leh dŭm hră mơar yuôm bhăn mơ̆ng Phŭn bruă klei mrâo leh anăn hâo hưn mkăp brei, hŏng 6 akŏ, dŭm mta rup, klei čih plao ksĭ Hoàng Sa êlâo kơ thŭn 1975. Đa đa pŏk rup kơ plao ksĭ Trường Sa ară anei leh anăn dŭm mta bruă mơ̆ng phung knuă druh, lĭng kahan, mnuih ƀuôn sang ti plao ksĭ Trường Sa.

Wưng anei, êbeh 1.600 hđeh sang hră ti sang hră gưl tlâo Y- Jut leh anăn lu mnuih ƀuôn sang ti kdriêk Čư̆ Kuiñ dưi nao čuă dlăng, ksiêm hriăm klă hĭn kơ klei dưi kiă kriê êa ksĭ, plao ksĭ, boh nik jing 2 plao ksĭ Hoàng Sa leh anăn Trường Sa jing klei dưi kiă kriê mơ̆ng Việt Nam.